¹ Be yu save samting ia: long ol lasdei we bambae i kam bae taem i kam strong moa. ² Bambae ol man bambae oli lavlavem olgeta nomo, mo bae oli wantem mani, bambae oli ol man blo tok flas, we tingting blo olgeta i go antap tumas, mo oli save tok nogud long ol man, bambae oli no save ona lo papa mo mama blong olgeta, oli ol man blo no talem tankiu mo oli no save tingbaot God. ³ Bambae oli ol man blong nogat sori long ol man, mo bambae oli mekem strong tumas long narafala man, bae oli ol man blong spolem nem blong narafala man, mo oli ol man blong lusum hed mo oli wael olgeta. Bambae oli no wantem fasin we i gud bae oli agens long hem. ⁴ Bambae oli ol man blo spolem fren blong olgeta, mo oli ol man we oli no kea nating, mo oli flas tumas, oli ol man blong harem gud tumas long ol samting we oli stap harem gud long hem bitim we oli stap lavem God. ⁵ Long fes blong ol man bambae olgeta stap folem fasin blong ol kristin man, be oli no wantem paoa blong God nating long olgeta. Kam aot long ol man olsem. ⁶ From sam long olgeta oli ol man we oli stap go insaed long ol haos blong holem taet ol kranke woman. Oli ol woman we oli stap trabol long sin blong olgeta, mo we fasin nogud i stap pulum olgeta. ⁷ Oli ol woman we oli wantem man i tijim olgeta long trutok, be oli no save lanem trutok ia. ⁸ Long sem fasin, Jannes mo Jambres oli agens long Moses, tufala ol kiaman tija, mo tufala i agens long trutok. Ol man olsem tingting blong olgeta i no stret, mo fasin blong biliv blong olgeta i blong kiaman nomo. ⁹ Be ol wok blong olgeta bae i no save stap long taem. From we ol man bae oli luk ol kranke fasin blong olgeta, olsem we ol man bifo oli luk kranke fasin blong olgeta man ia. ¹⁰ Be yu karem olsem ol eksampol blong ol tijing blong mi, yu luk finis ol fasin blong biliv blong mi,mo blong mekem tingting blong mi i longfala, mo yu luk finis fasin blong mi blong lavem ol man, mo mekem wok gogo i finis. ¹¹ Yu luk ol panismen blong mi mo ol harem nogud blong mi, ol panismen mo harem nogud blong mi taem we mi stap long Antiok, Ikoniam mo long Listra, we ol man oli mekem i nogud tumas long mi. Be Masta blong yumi i tekemaot mi long olgeta samting ia, mo i sevem mi. ¹² Yufala we yufala i wantem stap long wan laef we hemi blong Jisas Kraes, bambae i gat some man we oli stap wantem blong kilim yufala. ¹³ Olgeta man we oli stap mekem ol rabis fasin, bambae oli go nogud moa, we i save lidim ol narafala man blong oli go long we long ol gudfala fasin mo bae long man ia tu we i lidim olgeta. ¹⁴ Be long yufala, yufala i mas holem strong fasin blong biliv blong yufala, long ol samting we yufala i bin lanem mo save finis. ¹⁵ Yu save ol skripja blong God we oli raetem i stap finis taem yu wan pikinini, ol toktok ia, i save mekem yu waes, mo i save tjim yu hao Jisas Kraes i sevem yumi, taem we yumi trastem hem. ¹⁶ Olgeta toktok long skripja ia, oli kam long God. I tijm yumi taem yumi ridim blong talem aot tru long ol man blong oli gat biliv, gat koreksen olgeta long taem we oli sin, mo oli blong mekem wanem we i raet. ¹⁷ Olgeta toktok ia, oli blong helpem yumi ol man blong God blong yumi mas gat komplit priperesen i blong yumi mas stap mekem ol gud fasin long evri wok we bae yumi stap wokem.