¹ Mi Pol, mi aposol blong Jisas Kraes tru long wil blong God, we i folem ol promes blong laef we i stap long Masta Jisas Kraes, ² long yu Timoti we mi lavem yu tumas, prea blong mi se oltaem bambae God Papa i stap givhan long yu long gladhat blong hem, mo pis blong Masta Jisas Kraes i stap wetem yu. ³ Mi talm tankiu long God, we oltaem mi stap prea long hem, we tingting blong mi i klin gud, mo evri dei mo naet mi stap tingbaot yu long prea blong mi. ⁴ Mo taem mi stap tingbaot ol krae blong yu, mi wantem tumas blong kam luk yu, blong bambae mi save harem gud. ⁵ Mi stap harem gudfala feit blong yu, we fastaem feit ia i stap long bubu woman blong yu, Lois mo mama blong yu Eunis, mo mi save gud se feit ia tu i stap long yu. ⁶ Long ol tingting mi, mi stap tingbaot yu blong yu stanap strong long paoa blong God we i stap wetem yu long taem bifo we mi putum han blong mi long hed blong from yu. ⁷ From we Papa God i no givim spirit blong fraet long yumi, be hemi givim spirit blong paoa mo lav mo i blong mekem yu naf blong mekem samting we yu wantem. ⁸ Nao yu no mas fraet blong talemaot testimoni blong Masta blong yumi, mo yu no mas fraet blong talemaot testimoni blong mi Pol, we mi mi presina blong hem. Be i gud, yu harem nogud from we yu stap serem gud nius wetem paoa blong God, ⁹ we i sevem yumi mo i singaotem yumi wetem wan holi singaot. Hemi no mekem olsem, from we yumi mekem ol gudfala wok from, be hemi mekem folem plan mo gladhat blong hem. Hemi givim olgeta samting ia lo Jisas Kraes long taem bifo we ol samting oli stap finis. ¹⁰ Be naoia God i sevem yumi tru long pikinini blong hem we hemi Jisas Kraes we i kam tru finis. Hemi Jisas Kraes we i putum en long ded mo i givim laef we i no save finis blo i laet tru long gud nius. ¹¹ From hemia, God hemi jusumaot mi olsem wan prija, wan aposol mo wan tija blong hem. ¹² From samting ia, mi stap harem nogud long olgeta. Be mi mi no sem, from mi save God ia we mi biliv long hem. Mo mi talem tru long yu we hemi stap givhan gud long mi long olgeta samting we mi putum long han blong hem. ¹³ Oltaem yu mas holem strong ol gudfala toktok we yu harem long mi, wetem feit mo, lav we i stap long Jisas Kraes. ¹⁴ Ol gudfala samting we God i givim long yu, lukaotem gud tru lo Holi Spirit, we i stap insaet lo yumi. ¹⁵ Timoti, yu save se olgeta frens blong mi long Esia, wetem tufala man ia Fugelas mo Hemogenes, we oli ronwe finis long mi. ¹⁶ Prea blong mi se, Masta blong mi i gat sori long famli blong Onesiforas, from hemi helpem mi, mo hemi no sem nating from we mi stap long kalabus. ¹⁷ Be taem hemi stap long Rom, hemi stap lukaotem mi evri ples, gogo i faenem mi. ¹⁸ Prea blo mi se Masta blong mi bae hemi save sori long hem lo dei ia. Yu save gud we hemi givhan tumas long mi long Ephesus.