¹ Mi Pol, wan aposol blong Jisas Kraes, we mi stap folem ol toktok blong God, we i givim hop long yumi tru long Jisas Kraes we hemi sevia blong yumi, ² long yu Timoti, wan pikinini we i gat strong biliv long God, tru long gladhat, pis mo sori we hemi blong Masta blong yumi Jisas Kraes. ³ Mi stap talem strong long yu, yu mas stap long Ephesus blong talem strong long ol man oli tijim ol narafala doktrin, from mi stap go long Macedonia. ⁴ Mo tu bae ol i no lisen long ol narafala kiaman storian mo ol rabis fasin olsem bae i save spolem plan blong Masta Jisas Kraes olsem sevia blong yumi. ⁵ Nao yu mas tijim ol man blong gat lav, wan laef we i klin gud, ol gudfala tingting mo oli mas gat strong biliv long olgeta. ⁶ Sam man oli folem ol toktok blong God, be oli lusum rod blong olgeta finis long ol rabis toktok nomo. ⁷ Be oli wantem blong kam wan tija blong loa, be oli no save wanem blong talem mo oli no save wanem blong tij. ⁸ Be yumi save se loa ia hemi gud, spos yumi folem gud loa ia. ⁹ Yumi save se ol loa ia oli ptutm blong olgeta we oli stap mekem ol rapis samting, olgeta we oli no biliv long tok blong God mo we oli sin oltaem, olgeta we oli no laekem Tabu laef mo no gat rispect, olgeta we oli kilim ded ol papa mo mama blong olgeta, oli kilim ded ol man olbaot, ¹⁰ mo tu ol man mo woman we oli mekem ol rabis fasin blong slip wetem woman olbaot we ino maretem, ol man we oli maretem ol man mo ol woman we oli maretem ol woman, olgeta we oli stilim ol man blong wok slev, ol kiaman man, ol kiaman man we oli se oli wokman blong God be nokat mo eni narfala samting we i go agens long tok blong trutok. ¹¹ Advaes ia, i stap long gud nius blong God finis we mi talem long yufala we mi trastem. ¹² Mi talem tankiu long papa God olsem Masta mo Sevia we i kivim mi pawa mo trastem mi olsem wan feitful wok man long seves blong Hem. ¹³ Mo mi wan man blong kilim tet man, mo mi mekem tumas rabis fasin be naoia God i akseptem bak mi finis no mata we mi no bin biliv long hem fastaem. ¹⁴ Mo gladhad blong Papa God we i bigwan tumas wetem lav we i stap long Masta blong yumi we hemi Jisas Kraes. ¹⁵ Jisas Kraes bambae i kam long wol ia, blong sevem ol man we oli stap mekem ol rabis fasin, olsem tok ia i talem, from mi mi wan long ol man ia nogud. ¹⁶ Be God i gat sori long mi, from Jisas Kraes hemi wantem soemaot fasin blong hem long ol man, blong ol man oli save biliv strong long hem, mo bambae oli save gat wan longfala laef we i no save finis. ¹⁷ From hemi God we hemi king mo hemi rul long wol ia, mo hemi God we i no save ded, mo hemi God we yumi no save luk hem, mo oltaem yumi mas onarem hem, mo yumi mas leftemap nem blong hem gogo i no save finis. Amen. ¹⁸ Timoti, hemia hemi tok blong mi blong givhan long yu, we i kamaot long profet we oli givim long yu, yu mas holem toktok blong olgeta blong mekem tingting blong yu i strong, blong yu save faetem wan gudfala faet. ¹⁹ From we biliv blong yu i no foldaon, mo long tingting blong yu, yu long fes blong God, i gat sam man we oli mekem sam samting we i no stret long fes blong God, long fasin ia, we biliv blong olgeta i foldaon finis. ²⁰ Olsem Hymenaeus mo Alexander, we mi putum tufala long han blong Setan blong lanem tufala blong tufala i lego fasin we tufala i stap tok nogud long God.