¹ Taem mi kam long yufala, ol brata mo sista, mi mi no tok flas o mi talem tingting blong narafala man.Taem mi kam mi talem ol samting abaot God we oli bin haed bifo. ² Tingting blong mi i no stap long wan samting, taem mi stap wetem yufala, be Jisas Kraes nomo. ³ Taem we mi stap wetem yufala mi mi no save mekem wan samting from mi fraet mo mi seksek tumas. ⁴ Ol mesej we mi stap talem aot long yufala ino wetem paoa blong toktok blong save, be wetem paoa blong Spirit, ⁵ blong bae biliv blong yufala ino stap long save blong man, be long paoa blong God. ⁶ Nao mifala i stap talem ol waes tok i ko long olgeta we oli save moa long tok blong God, be i no save blong wol ia, o ol man we oli stap rulum wol ia, from olgeta tu bae oli ded. ⁷ Be mifala istap talem aot ol tru samting we i haed long tok blong God tru long save blong God, waes tok ya God i jusumaot bifo long olgeta bambae hem i jusum blong leftemap nem blong hem long yumi. ⁸ Ino gat man we i stap rul ofa long wol ia, long taem blong tede bae i save andastanem ol samting ya,from spos olgeta oli andastanem ol samting ia, bae olgeta oli no save kilim Jisas we hemi Masta blong glori. ⁹ Be i olsem we oli raetem, ''ino gat samting we ae bae ino luk, sorae bae ino harem, ino gat hat we bae man i save tingbaot wanem we God i priperem blong ol man we oli lavem hem." ¹⁰ From God i bin talemaot ol samting ia tru long Spirit. From we Spirit i save evri samting, hemi save evri samting abaotem God, be yumi ol man yumi no save. ¹¹ From yumi no save tingting blong nara man be Spirit ya nomo we i stap wetem hem bae i save save? I olsem, no gat man i save ol samting we God i stap mekem be Spirit blong God nomo i save. ¹² Be yumi no risivim spirit we hemi blong wol be Spirit we i blong God, blong bae yumi save se ol samting blong God we hem i givim long yumi hemi fri. ¹³ Yumi stap talem ol samting ia, long toktok be ino long tingting mo save blong man be long Spirit, talemaot ol samting we spirit i stap givim long olgeta man we spirit i stap wetem olgeta. ¹⁴ Ol man we spirit ino stap wetem olgeta oli no risivim ol samting we hemi blong spirit blong God, from olgeta oli no save hem. Hem i no save andastanem olgeta from we spirit i mekem olgeta blong oli save samting we i gud mo we ino gud. ¹⁵ Olgeta we oli risivim spirit oli save mekem jajmen long evri samting, be i no gat wan man we bae i save jajem olgeta. ¹⁶ ''No gat wan man i save tingting blong Masta blong yumi, we bae i save tijim hem long ol samting, from we hemi save ol samting ia finis?''