¹ Sa qai vakatakila vei au na agilosi a udwai ni bula, sa makare sese me vaka na karisitala. Sa drodro jiko mai enai jikojiko vakaturaga ni Kalou kei na lami ² Ka drodro mai kina loma donu ni wakolo ina loma ni koro. Sa tu talega ena baji ni uciwai ruarua a kau ni bula, ka sa matakina a vuana vakajini ka rua ina dua a yabaki, vakadua ina dua a vula. Ia a drauna sa medra wai ni bula a lewe ni veivanua. ³ Ena tawa laubo tale ena loma ni koro e dua a meca vakasisila. Ia ena jiko kina ai duriduri vakatui ni Kalou keina lami, ka ra na qaravi ko koya ko ira a ona tamata. ⁴ Era na boka a matana ka na volai ena yadredra a yacana. ⁵ Sa na sega bau tale a bogi, ka sa na tawa yaga vei ira ai cina se rarama ni siga ni sana odra rarama ga a turaga na Kalou. Kara na veiliutaki jiko ka tawa mudu. ⁶ Sa qai kaya vei au a agilosi, "Sa djina a vosa ka iei ka sa dodonu me vakadjinaji. Ia a turaga, na Kalou ko koya ka sa solia a yalona vei ira a ona parofita, sa tala mai a ona agilosi me vakatakila ki vei ira a ona bobula a meca sana vakarau me yaco." ⁷ "Raica! Sa kaya ko Jisu, sa voleka sara niu lesu tale yani! Sa kalougata ko koya sa talai rawarawa kina vosa ni parofisai ni vola ka ei." ⁸ Ia koi au, ko Joni, kau sa rogoca ka boka a meca ka ei. Ia niu sa rogoca ka boka oji, au sa qai cuva sobu kina yava ni agilosi ka vakatakila vei au a meca ka'iei ka vaka rokoroko kina. ⁹ Ia ea qai kaya vei au ko koya, "Kakua ni cuva vei au! Ko i au e dua a omui tokani bobula. A odrai tokani a wedamu a parofita, kei ira era muria a vosa ni vola kaiei. Vakarokoroko ga kina Kalou!" ¹⁰ Ia sa qai kaya vei au, kakua ni dregata a vosa ni parofisai ni vola kaiei, ni sa voleka a ona gauna. ¹¹ Biuta a dau valavala ca, me valavala ca jiko. Ko koya sa qeleqelewa, me qeleqelewa jikoga. Ko koya sa yalo dodonu, me valavala dodonu jiko ga. Kei ko koya sa yalo savasava, me savasava jiko ga. ¹² Sa qai kaya ko Jisu, "Raica! sa voleka sara niu lesu tale yani. Au na kauta jiko yani a qou i cocovi, meu na solia ki na tamata yadua me vaka a meca era sa valata. ¹³ Ko i au a Alifa kei na Omeka, ai vakatekivu keina i vakataojioji. ¹⁴ Sa kabugata ko ira era sa savata a odra i sulu me odra kina a dodonu me ra kania a vua ni kacu ni bula ka curu kina koro ina ona matamata. ¹⁵ Ia e dakuni koro era sa tu kina ko ira era sa dau vakatanitakina a bula, ko ira a dau vakajimoni, a dauyalewa keina dautagana a dau laba, ko ira a dau qaravi Kalou matakau, kei ira a dau dai. ¹⁶ Ko i au ko Jisu, kau sa tala vei iko a qou agilosi me vakatakila a meca kaiei kina vei soqosoqo lewe ni lotu. Ko i au a vu keina kawa i Tevita, a kalokalo i vola siga e serau tu. ¹⁷ A sa kaya a Yalo Tabu keina yalewa vou, "Lako mai!" Biuji ko koya sa rogoca kai me kaya talega, "Lako mai!" Ka biuji ko koya sa via unu, me lako mai, biuji ko koya sa vinakata me lako mai, ka mai unuva a wai ni bula ka tawa sauma. ¹⁸ Ko i au ko Joni au sa vakasalatakina a tamata yadua sa rogoca a vosa ni parofisai ni vola kaei. Kevaka ena vakuria kina edua ka e dua tamata, ena vakuria vei koya a Kalou a meca rarawa sa vakamacalataki oji enai vola kaei. ¹⁹ Ia kevaka ena kauta laivi e dua tamata e dua a ka mai na vosa ni parofisai sa tu enai vola kai, ena kauta laivi a Kalou a onai votavota mai na kacu ni bula kein a koro tabu me vaka sa vakamacalataki tu enai vola kai. ²⁰ E sa kaya ko koya e sa vakatakila veika kaiei, "Sa jdina sara! Sa voleka sara niu lesu tale uani." Emeni! Ni lako mai, turaga Jisu! ²¹ Me jiko mada ga kei kemunu taucoko a loloma ni turaga ko Jisu Karisito. Emeni.