^{1 2} 1 Na ki dia Jesus sai di kasa i sinta lungu di mar. 2 Djintis tchiu dal volta. I yentra na un barku si sinta djinti tudu firma na praia. ^{3 4 5 6} 3 Jesus konta elis manga di kusas pa meiu di storias. I fala: Un simaidur sai pa simia. 4 Tementi i na simia, algun simenti kai na roda di kaminhu, pastrus kumel. 5 Utru kai na kau di pedra nunde ku ka tene ba reia tchiu i nansi dipresa pabia tchon ka fundu. 6 Otcha sol mansi e kemadu, pabia e ka tene ba rais, e seku. ^{7 8 9} 7 Utrus simentis kai na kau ku tene planta ku fidida, kilas kirsi e bafa ki simentis. 8 Utrus simentis kai na bon tchoni padi garan, alguns sen bias mas, utrus sasenta, i utrus trinta. 9 Kil ku tenenoredja pa i obi. ^{10 11 12} 10 Disipulus bin e fala Jesus: Pabia ku bu te nsina djintis ku storias. 11 Jesus ruspundi i fala elis: Abos bo sortiadu pa dadu kunhisimentu di sigridu di reinu di Deus, ma elis e ka dadu. 12 Pabia kil ku tene tchiu i na buridu inda, ma kil ku tene puku te kil ki tene i na tiradu el. ^{13 14} 13 Npapia ku elis ma meiu di storia, pabia, e ta djubi e kata odja, mesmu ke obi, e kata ntindi. 14 Pa elis prufesia di Isaias kumpri dja ku fala: Obi bo na obi, ma na nin un manera bo kana ntendi, bo na odja, ma nin manera bo kana pirsibi. ¹⁵ 15 Pabia korson di povi bida risu, e ta obi ku mau vontadi, e fitcha se udjus, si ka asin ki sedu, e na pirsibi ba ku se udjus, ku se oredjas, e na ntindi ku se korson e na ripindi, i ami na kura elis. ^{16 17} 16 Ma bo udjus i bensuadu pabia i na odja, bo redja pabia i na obi. 17 Na bardadi na kontadi manga di prufeta misti odja ke ku bo na odja, e ka odjal, pa obi kusas ku bo na obi, e ka obil ^{18 19} 18 Bo ntindi gosi storia di simiadur. 19 Ora ku algin obi palavra di reinu, ma i ka ntindil, kil malvadu ta bin furta kil ku simiadu na se korson. Es i simenti ku kai lungu di kaminhu. ^{20 21} 20 Kil ku simiadu na tchon di pedra i kil ku obi palavra i risibil djanan ku kontentamentu, 21 Ma suma i ka tene rais , i ta fika sn puku tempu. Ora ku pirsigison ku tribulason lanta pabia di palavra, e ta kai djanan ^{22 23} 22 Kil ku simiadu na planta di fidida, i kil ku ta obi palavra, ma purkupason de mundu ku nganu di rikesa,e ta bafa palavra i kata disenvolvi. 23 Kil ku simiadu na bon tchoni kil ku obi palavra i ntindil, es ta padi fruta na bardadi, algun sen bias mas, dike kil ku simiadu, alguns sasenta, alguns trinta bais mas. ^{24 25 26} 24 Jesus konta utru storia, i fala: Reinu di Seu i parsi kun omi ku simia si kampu ku bon simenti. 25 Ma tementi djintis na durmi si indimigu bin i sumia planta brabu na metadi di trigu, i bai. 26 Otcha simenti di trigu lanta i padi spigas, planta brabu parsi tambi. ^{27 28} 27 Tarbadjaduris di kil omi ku tene kampu e falal: Sinhor no ka simia bon simenti na bu kampu. Kuma gora ki tene planta brabu.. 28 I fala elis: Un indimigu ku fasil. Si servus falal: Bu misti pa no rinkal.. ^{29 30} 29 Dunu di kampu fala: Nau. P abia tementi bo na djunda pplanta brabu, bo pudi tambi djunda trigu djuntu ku elis. 30 Bosa elis pa e kirsi djuntu te na kebur, na konta nkaregadus: purmeru bo rinka planta brabu bo djunta elis bo mara pa kema, dipus bo ta djunta trigu na nha bemba. ^{31 32} 31 Jesus konta trus storia, i fala: Reinu di Seu i suma un simentera di mostarda kun omi sumia na si kampu. 32 Bardadi e simenti i mas pikininu di tudu. Ma otcha ki kirsi, i bida arvuri mas garandi na Jardin, i torna un arvuri, pastrus e ta bai la e kumpu nunhu na si ramus. ³³ 33 Jesus konta utru storia: Reinu di Seu i suma suma farmentu ku un mindjer mistura ku tris kaneka di forinha tok u masa formenta. ^{34 35} 34 Tudu kusas Jesus fala p djintis i pa meiu di storias, sin stori i ka fala nada. 35 Es i pa kil ku faladu pa prufeta sedu bardadi, otcha ki fala: Nna konta kusas ku sukundidu des di fundason di mundu. ^{36 37 38 39} 36 Jesus disa djintis i yentra na kasa. Si disipulu bin pa el e fala: Splikanu stoeia di planta brabu di kampu. 37 Jesus ruspundi: Kil ku ta simia i fidju di omi. 38 Kampu i mundu, bon simenti i fidjus di reinu, planta brabui fidjus di malvadu, 39 indimigu ku planta i malvadu. Kebur i fin di mundu, ki nkaregadu di kebur i andjus. ^{40 41 42 43} 40 Pa kil suma planta brabu na rikudjidu i kemadu na fugu, asin ki na sedu na fin di mundu. 41 Fidju di omi na manda si si andjus pa djunta na si reinu tudu kusas ku ta kausa pekadu, ku kilis ku ta kumiti pekadu, 42 i na lansa elis na furnu ku fugu, nunde ke namiskinha e na nheme dintis. 43 Djintis djustu e na brilia suma sol, na reinu di se pape. Kil ku tene oredja pa i obi. ^{44 45 46} 44 Reinu di Seu i suma un tisoru ku sukundidu kun omi odja i sukundil. Ku kontentamentu i bai, i bindi tudu kil ki tene i kumpra ki kampu. 45 Reinu di Seu i suma un djila ku na buska pedras di balur. 46 Otcha i otcha kil pedra di balur, i bai i bindi tudu ki tene i kumpral. ^{47 48} 47 Utru bias, reinu di seu suma ridia ku lansadu na mar i panha tudu tipu du kriatura. 48 otcha ridia intchi, piskaduris e rastal pa praia, e sinta e djunta kusas bon na balei, ku ku ka bali e botal. ^{49 50} 49 Ain ki na sedu na fin di mundu: andjus na bin e na sipara maus na metadi di djustus, 50 i na bota elis na furnu di fugu, nunde ke na miskinha e nheme dintis. ^{51 52 53} 51 Bo ntindi e kusas.. Disipilus falal: sin. 52 Jesus fala elis: Tudu mestri di lei ku bida disipulu di reinu di seu i suma un omi ki dunu di un kasa, ku tira kusas bedju ku nobu na si tisoru. 53 Otcha Jesus kaba konta storias i disa ki lugar. ^{54 55 56} 54 Jesus yentra na si propi rijion, i nsina djintis na sinagogas, e dimira e fala: Nunde ke omis konsigi e djiresa ku milagris.. 55 nau e omi i fidju di karpinteru.. I ka Maria ki si mame.. I ka Tiagu, Djuse, Simon, ku Judas i se ermons,.. Si irmas e ka sta li ku nos..Anta, nunde ku e omi tira e tudu e kusas.. ^{57 58} 57 E ka kontenti ku Jesus. Ma I fala elis: Un prufeta ta rispitadu na tudu si tera menus na si tera ku si familia. 58 I ka fasi milagris tchiu la pabia e ka fia.