¹ Salam ampat ka Paulus, Silwanus ba Timotius, ka jamaat di Tesalonika doop Allah, Bapo' diri', ba Tuhan Yesus Kristus. ² Pamare' ba idupngu nang nyaman, ampat ka Allah, Bapo' diri', Tuhan Yesus Krstus. ³ Kami arus salalu ba syukur ka Allah untuk kau, Kamaru'-kamaru', memang dah sapatutelah jakoo. Sabab, imanngu tumuh malimpah ba kasih ngu ka Tiap sabayangu samakin ayo'. ⁴ Sabab koo, kami sandiri' ayo' ati nyaritoot Kau ka adapotn jamaat-jamaat Allah karamo kasabarot ba imanngu katangoh samuo panyiksoot ba kasusohot nang kau ngalami. TANTANG PANGAKIMAN ALLAH ⁵ Nyianlah bukti pangakiman nang adil ampat ka Allah, karamo kau di nganggap cocok ka karajaan Allah karamo kau ugo' dah bajaro. ⁶ Agi pula, adil ka Allah maasio' ba pamaksoot ka ne'ido' nang ngamuat kau bajaro, ⁷ tapi mare kanyamanan ka kau nang dinyikso, ka kami ga'e, waktu Tuhan Yesus dah nyato ampat ka sarugo ba manyak malaekat-E nang koat, ⁸ doop api nang nyalo, sa' maaso' ka ne'ido' nang ano' kanal ka Allah ba nang ano' nurut ka Injil* Yesus, Tuhan diri. ⁹ Ne'ido' pasti nyacapi' ukuman kabinasoot nang kakal, jauh ampat ka adirat Tuhan ba ampat ka kamuliaan ka kuasootNe ¹⁰ waktu Io atokng sa' dimuliootno' ka antaro urokng-urokng kudus-E ba disukai' ka antaro samuo urokng nang dah picayo' sabab kasaksiot kami ka kau di picayo'. ¹¹ Karamo koo, kami salalu nyampokng kau, kirae Allah diri' nganggap kau cocok ka bakatngu nyukupi tiap kamao'an sa' babuat baik ba pakarajaan iman malalui' kuasa-E, ¹² supayo damo Tuhan Yesus diri' dimuliot ka kau, kau doopm Io, sasuai ba pamare' Allah diri' ba Tuhan Yesus Kristus.