¹ Ngohojung kasih di kabun nganek o dain jian-jian karunia rohani di, sak yang muno kok tou bernubuat. ² Karna, abek yang bejantuh pakai roin jorak do, ero bea tou bejantuh ngatoh dorang telino, tapi ngatoh Allah; karna bekan urun yang tou ngereti o, iyo adi dohok hal yang rahasia nek uhang roh. ³ Kabun, urun yang bejantuh ngatoh dorang telino makan do nampak, nasehat, madi penghiburan. ⁴ Urun-urun yang bejantuh dain roin jorak do ero nampak arop do, tapi urun yang bernubuat nampak nek uhang jemaat. ⁵ Aku ngarap ngatoh kam nyamon nek bejantuh pakai roin jorak nek, madi rebik pain pak kam bernubuat. Urun yang bernubuat rebik tongun tat urun yang bejantuh dain roin jorak do, kecuali ningkeh iyo tou ngereti tirik dorang jemaat kanek nerimak peneguhan. ⁶ Isit alek, ningkeh aku dape ngatoh kam madi bejantuh nek uhang roin roh, anun untung o makan kok, kecuali ningkeh aku bejantuh ngatoh kok dain penyataan, penau, nubuat, madi pengajaran? ⁷ Tirik, ang yang bea ngehasong, amak no dorang suling madi kecapi yang naan bohok, ningkeh iyo bea bebohok mamo ko to tou ngeringok soun o kabun adi to ngembeda soun o, mamo ko urun tou alat anun yang kenendaik do, suling atau kecapi? ⁸ Madi sak, ningkeh terompet bea bebohok dain jian ningkeh teneringok to, abek yang siap tokak perang? ⁹ Madi sak kok. Ningkeh dain jorak nuk, kok bejantuh anun yang bea kenereti, mamo ko urun di tou anun yang tenendohok nuk? Amak no kok bejantuh dain baheu. ¹⁰ Orong o, naan nyangkak dorang roin urun nek pidak dou ihik madi bekan jik lambek pun yang bekan arti o. ¹¹ Madi, ningkeh aku bea tuan ku anun reti roin adi, nanh aku jadi uun asing makan iyo yang bejantuh di, madi urun yang bejantuh di jadi urun asing makan aku. ¹² Madi sak kok, karna kok berusaha dain orong-orong o makan karunia rohani, berusaha dain jian makan nuk membangun jemaat nuk. ¹³ Karna adi, pak urun yang bejantuh nek uhang roin jorak do bedoa sak iyo tou ngereti o. ¹⁴ Karna, ningkeh kok bedoa dain roin jorak nuk, roh nuk bedoa sak, kabun adi utok ku bea ngembuak. ¹⁵ Madi, anun yang mesti kenuan ku? Aku bedoa dain roh ku kabun aku pun bedoa dain pikiran ku. Aku benyanyi dain pikiranku. ¹⁶ Ningkeh kok cuma ngucap sukur dain roh nuk, mamo ko urun yang bokon, yang bekan karunia adi, tou bejantuh, "Amin," dain ucapan sukur nuk di tapi iyo bea ngereti dain anun yang kenenjantuh nuk di? ¹⁷ Mensirik pun kok ngucap sukur dain jian, tapi urun bokon bea noin nuk. ¹⁸ Aku besukur ngatoh Allah ningkeh aku bejantuh pakai roin jorak yang nerebik tat kam nyamon nek. ¹⁹ Kabun, dorang jemaat, aku rebik jian pain bejantuh dain rimo roin mak dain pikiran ku paak aku pun tou payok urun yang bokon pain, dari pada puruk kata yang tenohok ku dain roin jorak ku. ²⁰ Dorang isit alek , ayo no kam amak anak kenyam pikir nek. Jadi anak kenyam nek uhang kejaat, tapi nek uhang cara bepikir di haboi dain urun yang bereh o no! ²¹ Amak naan yang tenulis nek uhang hukum Taurat, "Urun yang bejantuh roin asing madi sak boak urun asing, Aku bejantuh ngatoh bangsa ihik, tapi ero bea kanek ngeringok Aku, firman Tuhan.'' ²² Madi, roin-roin jorak iyo no tanda, bokon makan urun yang pecayak, tapi urun yang bea pecayak, kabun pain bernubuat iyo no tanda, bokon makan urun yang bea pecayak, tapi makn urun yang pecayak. ²³ Ningkeh dorang jemaat munduk haboi-haboi nek icok ukan, kabun nyamon o di bejantuh dain roin-roin jorak, kabun naan urun yang bea ngereti atau naan urun yang bea pecayak masok, bea kah ero nnah dohok kok hak urun yang mereang? ²⁴ Madi, ningkeh nyamon do bernubuat, urik adi naan urun yang bea pecayak atau urun yang bea ngereti masok, nanah iyo pasti sadar kenuan urun nyangkak madi iyo tenilai kenuan sauh urun. ²⁵ Rahasia nek uhang songan o jadi nyata, iyo tesungkur, madi nyembah Allah, kabun ngakuk ningkeh sesungguh o Allah di naan nek ihang kam nyamon nek hik. ²⁶ Madi, tat adi mamo ko pain, dorang isit alek? Jik kam bekumpul, kam nyamon nek naan mazmur nek kedirik, pengajaran, pernyataan, roin jorak, madi penafsiran. Sak iyo no nyamon ihik kenuan makan to membangun. ²⁷ Ningkeh naan yang bejantuh dain roin jorak o, sak iyo duo atau paling sauh toru bah mak, madi pak ero betibah besuak kedirik, kabun adi naan yang tukang ngarti o. ²⁸ Kabun, ningkeh bekan urun yang ngarti o, iyo di harus ondok ko nek uhang jemaat madi sak iyo bejantuh ngato arop o kabun ngatoh Allah. ²⁹ Sak iyo no duo atau toru nabi yang bejantuh madi yang bokon o pain mikir o. ³⁰ Madi, ningkeh pernyataan di kenuan makan urun bokon yang munduk nedi, urun yang muno di ayo bebohok. ³¹ Karna, kam di tou nyamon nek nguan nubuat jik jik lambek, pak nyamon tou belajar madi nyamon l di tou kenebaas. ³² Roh dorang nabi nanah tunduk ngatoh dorang nabi sak. ³³ Karna, Allah bokon no Allah tat yang bea senunuh, tapi damai sejahtera, amak no nek uhang dorang jemaat yang kudus ³⁴ Dorang bawek suan ondok ko mak nek uhang jemaat karna ero bea suan bejantuh, tapi ero di meriah o mak amak anun yang tenohok kenuan Hukum Taurat. ³⁵ Ningkeh naan yang kanek kenelajar do, pak ero nyetong o mak ngatoh dorang oruh do nek ropou karna rauk ahak peawak-awak nek usuk dorang jemaat ningkeh naan bawek yang bejantuh. ³⁶ Anun po firman Allah di asal o tat kok? Atau, kabun adi cuma ngatoh kok mak kah firman adi tenendohok? ³⁷ Ningkeh naan yang dohok arop o iyo adi nabi atau urun rohani, sak iyo no iyo nyengkonok ningkeh aku di naan nulis perintah Tuhan makan ngatoh kam. ³⁸ Ningkeh naan urun yang bea nyengkonok ngatoh ihik, berarti iyo bea senyengkonok. ³⁹ Madi, dorang isit alek ku, usaha orong-orong o mak kam makan nek bernubuat, madi ayo peroak urun yang bejantuh dain roin jorak do. ⁴⁰ Kabun, nyamon o ihik kenereja to dain sopan kabun teratur.