¹ Doh nyok,sidok diok bediri bobeh ngan maik Yesus ke adap Pilatus. ² Ngan sidok betanga nuduh Yesus ngan bekato,"Kami napat urakng ituk udoh nyosat bangso kami ngan ngidoh kami maya pajak ke kaisar,ngan modoh gak kederik e Kristus,Inyo rajo ." ³ Pilatus betanyok ke Yesus,"apai Ikau tuk am rajo urakng Yahudi?" cohot Yesus,"inyok ikau yakng modoh." ⁴ Doh nyok ,Pilatus bekato ke katn imam kepalo ngan urakng banyak,"aku bon napat penyaloh Urakng ituk." ⁵ Akan tetapi,sidok nuntot samel bingan nguman amat,"Io moncong urakng-urakng makai pengaja Inyo di wilayoh Yudea roreh betanga ari Galelia sampai kituk!" ⁶ Pas Pilatus ningoh ahal iyok,io betanyok amat pe Yesus urakng Galelia. ⁷ Ngan, badi io doh panai ke Yesus reseli ari wilayoh kuaso Herodes, Pilatus pe ngirem Yesus ke Herodes yakng waktu nyok agik ado di Yerusalem. ⁸ Pas Herodes mantau Yesus,io ayoh-ayoh. Io doh lamoh nak bedapat ngan Yesus badi io doh rapat ningoh ke ahal Yesus badi io ngarap panai mantau mukjizat yakng dipuloh Yesus. ⁹ Lalu,Herodes banyak amat nanyok Yesus, tapi Yesus bonsik nyohot marakng sigik pe. ¹⁰ Imam kepalo ngan katn ahli taurat yakng bediri dien nuduh io bukan gampang agik. ¹¹ Maloh,Herodes ngan katn tentaro e ngedoak ngempotot Yesus.Doh yok,sidok ngonok jubah yakng bagak ke Yesus ngan ngirem Io ke Pilatus agik. ¹² Sereok de Herodes ngan Pilatus abon cuçok,tapi pas ari inyok sidok duo bekaban. ¹³ Doh yok,Pilatus ngunong katn imam kepalo,katn pemimpen Yahudi,ngan urakng banyak, ¹⁴ nih bingan ke sidok,"Iketn maik urakng ituk ubok urakng yakng doh nyosat urakng banyak . Tapi,waktu aku meriso io diadap iketn ku bon napat penyaloh e ubok yakng iken podoh. ¹⁵ Herodes pe ja abotn gak napat penyaloh Io nyok ke io ngirem kituk lagik. Pantau am Io bon penyaloh yakng berumas ke di ukom mati. ¹⁶ Badi inyok,ntik udoh ku peingat Io nak ku lopas Io, ¹⁷ ( pas sajuh beroto ngan ari Paskah,Pilatus aros ngelopas sikuk yakng ditahan ke urakng banyak.) ¹⁸ Ngapai nih, urakng banyak ngemo beroto,"pelosi am urakng ituk!"Barabas dilopas ke kami!" ¹⁹ (Barabas nyok urakng telibat alapm perontak di kota ngan ado gak munuh urakng.) ²⁰ Badi Pilatus nak ngelopas Yesus,io pe bebantoh lagik ke urakng banyak. ²¹ Akan tetapi,sidok mala ngemo,"saleb am Inyo!saleb am Inyo!" ²² Yakng ketigo kali e Pilatus nanyok sidok,"ngapai?"apai penyahat yakng udoh puloh Io ituk?Io bon besaloh. Aku bonsik napat sutik pe penyaloh yakng panai nyuruh Io di ukom mati. Badi iyok,aku nak morik peringat ke Io baruk dilopas." ²³ Maloh,sidok mala ngerampak ngan ingan bakoh sok Yesus disaleb. Ngan, ingan sidok pe monang. ²⁴ Kepunoh e,Pilatus pe nunok kengonak sidok. ²⁵ Io ngelopas mensio yakng dipintok urakng banyak,yakng dipenyaro lago io merontak ngan munuh. Akan tetapi,nyoroh Yesus nunok kengonak sidok. ²⁶ Keboroh katn tentaro maik Yesus bingkas,sidok nahan urakng sikuk namo e Simon ri Kirene yakng baruk datakng ari deso. Katn tentaro ngelotak saleb Yesus ke atas bahu inyo nyuruh io nyahan nyusoi ari belakakng Yesus. ²⁷ Banyak amat urakng yakng nunok Yesus,sebagi ado katn betinok yakng nongeh e ngan ngonang Io. ²⁸ Akan tetapi Yesus nyinek sidok,ngan bekato,"ei katn betinok Yerusalem,onang iketn nongeh Aku.tongeh am derik iken ngan katn anak iketn." ²⁹ Agih nampot waktu e pas urakng agih modoh,"senang lapang am katn betinok yakng matai,yakng porot e bon kalok belopas,ngan yakng susu e bon kalok disusu,' ³⁰ Waktu inyok sidok agik bingan ke katn buket,'teruruh am ke atas kami !' ngan ke katn natai,'limuh am kami !' ³¹ Badi, ntik sidok ngelago ituk waktu koyuk e agik idop,apai yakng agih tejadi ntik koyuk nyok doh rangkai ?" ³² Ado gak duo ikuk urakng jahat yakng dibaik nak diukom beroto ngan Yesus. ³³ Pas sidok doh datakng ke sutik orokng yakng namo e,"Tengkorak,"katn tentaro nak nyaleb Yesus beroto ngan duo ikuk urakng jahat nyok,sikuk disepiak kanan e,yakng sikuk agik disepiak kibok e, ³⁴ Doh iyok Yesus bekato," Ya Bapa, ampon limuh penyaloh sidok,badi sidok abon panai apai yakng sidok puloh." Lalu katn tentaro nyabot undi nyaman kebeduok seloa baju Inyo di antaro sidok. ³⁵ Urakng banyak bediri dien kapeng nyinek obeh, tapi katn pemimpe Yahudi ngencotot Yesus ngan ngeto'ok e. Sidok modoh,Io nyagu urakng laen,tuk bia Io nyagu derik e ntik amat Io Kristus,yakng udoh dipintik Allah!" ³⁶ Katn tentaro ngedoak Io gam,nih kiok nak morik ango masam ke Io, ³⁷ jokuk ingan sidok," Ntik Ikau rajo urakng Yahudi,sagu am derik Ikau!" ³⁸ Ngan ado gak tuleh diatas e:"INILAH RAJA ORANG YAHUDI." ³⁹ Sikuk ari urakng jahat yakng digantokng beroto diok ngedoak Yesus,"Ukatn pe Ikau tuk Kristus ? Sagu am derik Ikau ngan kami !" ⁴⁰ Akan tetapi urakng jahat yakng sikuk nogo io jokuk e,"abon biak ikau golak ke Allah ikau tuk bah nerimoh ukom yakng samo gak ? ⁴¹ Kito tuk saja doh tumas nerimoh ukopm yakng samo ngan penyaloh kito,tapi Urakng ituk bah bonsik penyaloh sutik apai pe. ⁴² Lalu,io bekato ke Yesus,"Ya Yesus kingat aku antik Ikau tamoh ke alapm kerajaan-Mu, " ⁴³ Baruk Yesus nyohot e," Aku modoh yakng pengamat e ke ikau,ari ituk gak ikau doh tamoh Aku di alapm Firdaus." ⁴⁴ Waktu inyok sekita ijam duo bolas tongoh ari,kepotakng ngelabuh semuo orokng inyok jungkol ijam tigo mari e, ⁴⁵ badi matoari nih potang ngan tirai alapm Bait Allah teboloh menyadi duo utik. ⁴⁶ Lalu Yesus ngoro ngan ingan nguman,"Ya Bapa ke alapm longan Ikau Ku soroh nyawo-Ku,"Doh mengiok,Yesus ngosuh penyowo yakng pengabeh e. ⁴⁷ Keboroh kepalo pasukan mantau apai yakng udoh tejadi,io muji Allah,ngan modoh,"amat-amat am, Urakng ituk abotn besaloh!" ⁴⁸ Keboroh urakng banyak datakng beroto nak mantau ahal iyok ngan nyinek apai yakng tejadi,sidok pulakng samel maluk-maluk dado derik dak. ⁴⁹ Semuo yakng ngecolik Yesus ngan betinok yakng nyusoi Inyo ri Galelia bediri ari jauh nyinek ahal inyok. ⁵⁰ Ado sikuk lelaki namo e Yusuf,inyo anak buoh Dewan Penasihat,inyo baek ngan bena. ⁵¹ ( Derik io bon setuju ke pemangsang ngan keputos sidok ).Yusuf asal e ari Arimatea,sutik kota urakng Yahudi. Io gak temasok urakng yakng nunguk Kerajaan Allah. ⁵² Io bingkas ke orokng Pilatus ngan mintok bangkai Yesus, ⁵³ Lalu io pe nurun bangkai Yesus ari kayu saleb ngan malot e makai kaen linen. Doh iyok,io ngoleng alapm kubo yakng dipahat di buket batu. Diok,upan kalok marakng sikuk pe di golekng diok. ⁵⁴ Ari iyok deh ari Persiapan,ngan ari sabat agih gusong di lago. ⁵⁵ Katn betinok yakng datakng tamoh Yesus ari Galelia nyusoi Yusuf. Sidok mantau kubo inyok ngan bekati bangkai Yesus digoleng diok. ⁵⁶ Doh iyok sidok pulakng nyiap alat gerabat ngan minyak nak ke ngulai bangkai Yesus. Pado ari Sabat sidok beronti ubok alapm ukom Taurat Muso.