¹ Apai yaongk udoh ado dayi olu, yaongk udoh kami dinggo, yaongk udoh kami pantau dengan mato kami, yaongk udoh kami saksikan dant yaongk udoh kami gasap dengan jayi kami tentang Firman hidup - ituklah yaongk kami tulihkan kepado ikau. ² Idup ituk udoh dinyatokant, dant kami udoh mantau iyok dant betuk kami besaksi dant membeyitokan kepado ikau tentang idup kokal, yaongk ado besamo-samo dengant Bapa dant yaongk udoh dinyatokant kepado kami. ³ Apai yaongk udoh kami pantau dant kami dinggo iyok, kami kesohkan kepado ikau gam, supayo ikaupun bulih pesekutuan dengant kami. Dant pesekutuan kami adolah pesekutuan dengant Bapa dant dengan AnakNya, Yesus Kristus. ⁴ Dant semuonya ituk kami tulihkan kepado ikau, supayo suko cito kami menyadi sempurna. ⁵ Dant itukglah kesoh, yaongk kami dinggo dayi Iyo, dant yaongk kami sampaikan kepado ikau: Allah adolah toangk dant di dalamp Iyo samo sekali bonsik ado kepotangan. ⁶ Jiko kito katolan, bahwo kito bulih pesekutuan dengant Iyo, namun kito idup di dalamp kecolumpman, kito bedusto dant kito abon muloh kebonaran. ⁷ Tetapi jiko kito idup di dalamp toangk samo macamp Iyo ado di dalamp toangk, mako kito bulih pesekutuan seuwaongk dengant yaongk laent, dant daoh Yesus, AnakNya iyok, menyucikan kito dayi pado segalo doso. ⁸ Jiko kito bekato, bahwo kito abon bedoso, mako kito menipu deyik kito kedeyik dant kebonaran abon ado di dalamp kito. ⁹ Jiko kito mengaku doso kito, mako Iyo adolah setio dant adel, sehingga Iyo akant mengampuni segalo doso kito dant menyucikan kito dayi segalo kejahatan. ¹⁰ Jiko kito bekato, bahwo kito budas bebuat doso, mako kito muloh Iyo menjadi pendusto dant FirmanNya budas di dalamp kito.