¹ بۆیە، ئەی برایانی خۆشەویستم تامەزرۆتانم، ئەی خۆشییەکانم و تاجەکانم، بەو شێوەیە لە پەروەردگاردا چەسپاو بن ئەی خۆشەویستان. ² داوا لە ئەفودیا دەکەم، وەک چۆن داوا لە سینتخی دەکەم، یەک بیر بن لە پەروەردگاردا، ³ بەڵێ، داوا لە تۆش دەکەم، هاوکارە دڵسۆزەکەم، یارمەتیان بدەیت، چونکە ئەوان لەگەڵ مندا تیکۆشاون لە خزمەتکردنی مزگێنییەکەدا، ئەوان و ئەکلیمەندۆس و هاوکارەکانی دیکەم، کە ناوەکانیان لە تۆماری ژیاندا نووسراوە. ⁴ هەمیشە لە یەشوای پەرەوەردگاردا شاد بن، دیسان دەیڵێمەوە: شاد بن. ⁵ با پشوودرێژیتان بۆ هەموو خەڵک ناسراو بێت. پەروەردگار نزیکە. ⁶ نیگەرانی هیچ شتێک مەبن، بەڵکو لە هەموو شتێکدا با داواکاریەکانتان بۆ خودا زانراو بێت، بە نزا و داواکاری، لەگەڵ سوپاسگوزاری. ⁷ ئارامی خودا، کە بە هزرتان ناتوانن لێی تێبگەن، دڵ و بیرکردنەوەتان لە مەسیحدا دەپارێزێت. ⁸ لە کۆتاییدا، خوشکان و برایان: هەموو ئەو شتانەی کە ڕاستن، ڕێزدارن، دادپەروەر، و پاکن، خۆشەویستن و ناوبانگ باشن، ڕەوشت بەرز، و شایانی ستایشن، هۆشتانی بدەنێ. ⁹ کار بەوە بکەن لە من فێربوون و وەرتانگرت و بیستتان و بینیتان ئەوە جێبەجێ بکەن. پەروەردگاری ئاشتی لەگەڵتان دەبێت. ¹⁰ پاشان من دڵخۆش بووم بە پەروەردگار بە خۆشییەکی مەزن کە جارێکی تر گرینگیدانتان بە من نوێ کردەوە. هەر چەند پێشتر ئارەزووی ئەوەتان هەبوو، بەڵام ئەو دەرفەتەتان لە بەردەستدا نەبوو. ¹¹ ئەوە ناڵێم لەبەر ئەوەی پێویستییەکم هەبێ، چونکە فێربوم لە هەموو بارودۆخێکدا ڕازیبم. ¹² دەزانم چۆن لە هەژاریدا بژیم، و چۆن بە تێری بژیم. چونکە، لە هەموو شتێک، و لە هەموو بارودۆخێکدا، ڕاهێنراوم لەسەر تێر و برسییەتی، و لە هەبوونی و نەبوونیدا بژیم. ¹³ من هەموو شتێک دەتوانم، لە مەسیحدا کە بە هێزم دەکات. ¹⁴ بەڵام باش بوو یارمەتیتان دام و هاوبەش بوون لە کەمکردنەوەی تەنگانەمدا. ¹⁵ هەروەها دەزانن ئەی باوەڕدارانی فیلیپی، کاتێک دەستم بە خزمەتکردنی مزگێنیەکە کرد، وەک چۆن لە پارێزگایەکی مەکەدۆنیاوە ڕۆیشتم، جگە لە ئێوە هیچ کڵێسایەک لەگەڵمدا بەشداری نەکرد لە حسابی بەخشین و وەرگرتن. ¹⁶ ئەوەی پێویستم بوو بۆتان ناردبووم، نەک جارێک بەڵکو زیاتر. ¹⁷ لە ڕاستیدا من بەدوای بەخشیندا ناگەڕێم، بەڵکو بەدوای قازانجی زیادکراودا دەگەڕێم بۆ بەرژەوەندی ئێوە. ¹⁸ ئێستا هەموو شتێکم هەیە کە بە زیادەوە پێویستییەکانم پڕدەکاتەوە. ئیتر من لە هیچ شتێکم کەم نیە بەوەی کە لە ئەپافرۆدیتسم وەرگرت کە تۆ بۆت ناردبووم، بۆنێکی بۆنخۆش، و قوربانییەکە خودا پەسندی دەکات و پێی دڵخۆشە. ¹⁹ خودای من هەموو پێداویستیەکانتان بە تەواوی دابین دەکات، بەپێی دەوڵەمەندییەکەی لە شکۆمەندیدا، لە مەسیحی یەشوادا. ²⁰ شکۆمەندی بۆ خودای باوکمان بۆ هەتاهەتایە. ئامین! ²¹ سڵاو لە هەموو پیرۆزکراوێک بکەن لە یەشوای مەسیحدا. ²² ئەو برایانەی لەگەڵمن سڵاوتان لێدەکەن. هەموو پیرۆزکراوان ، بە تایبەت ئەوانەی لە دەوروبەری قەیسەرن. ²³ با بەخششی پەروەردگارمان یەشوای مەسیحی لەگەڵ گیانتان بێت. ئامین!