¹ لە پۆڵس و تیمۆساوس، خزمەتکاری مەسیحی یەشوا، بۆ هەموو پیرۆزکراوان لە مەسیحی یەشوادا، کە نیشتەجێی شاری فیلیپین، لەگەڵ شوان و سەرپەرشتیکاران. ² با بەخشش و ئاشتی بۆ ئێوە بێت لەلایەن خودای باوکمان و پەروەردگار یەشوای مەسیح. ³ هەرکاتێک یادتان دەکەمەوە، سوپاسی خودای خۆم دەکەم، ⁴ لە هەموو نزاکانمدا بە دڵخۆشی بۆ هەمووتان دەپاڕێمەوە، ⁵ بەهۆی بەشداریکردنتان لە بڵاوکردنەوەی ئینجیل لە ڕۆژی یەکەمەوە تا ئێستا. ⁶ منیش لەو بابەتە دڵنیام: خودا کە ئەو کارەی دەست پێکردووە لە ئێوەدا هەتا ڕۆژی مەسیحی یەشوا تەواوی دەکات. ⁷ کەواتە ڕاستە کە من ئەو هەستەم بەرامبەر هەمووتان هەبێت، چونکە لە دڵمدا دەتانهێڵمەوە، دەتانکەمە هاوبەشی خۆم لە بەخششەکە، جا لە کۆت و بەند بم یاخود لە کاتی بەرگری کردن وچەسپاندنی مزگێنیەکە ، ⁸ چونکە خودا شایەتحاڵی منە کە لە سۆزەکانی مەسیحی یەشوا تامەزرۆی هەمووتانم. ⁹ نزای من بۆ ئێوە ئەمەیە: تا خۆشەویستیتان بە ئەوپەڕی زانست و تێگەیشتنەوە زیاتر و زیاتر بکات، ¹⁰ بۆ ئەوەی شتە نایابەکان پەسند بکەن، و لە ڕۆژی مەسیحدا پاک و دور لە تاوان بن، ¹¹ کامڵ بن لە بەروبوومی ڕاستی و دروستی، کە بە یەشوای مەسیح دێت بۆ شکۆمەندی و ستایشی خودا. ¹² بەڵام دەمەوێت بزانن برایان، کە لە ڕاستیدا بارودۆخەکەم بووەتە هۆی بڵاوبوونەوەی مزگێنیەکە بە شێوەیەکی سەرکەوتووانە، ¹³ بەجۆرێک کە هەموو پاسەوانانی ئیمپراتۆر و هەموو ئەوانی دیکە زانیان کە کۆت و بەندییەکم لە پێناو مەسیحدایە؛ ¹⁴ هەروەها زۆربەی ئەو برایانە، کە بەهۆی کۆت و بەندی منەوە متمانەدارن بە پەروەردگار، بوێرانە و بەبێ ترس مزگێنی وشەی خودا ئەدەن. ¹⁵ بەڕاستی هەندێک لە بەر ئیرەیی و ناکۆکی بە مەسیح مزگێنی دەدەن؛ سەبارەت بەوانیتریش، بە نیاز پاکییە. ¹⁶ ئەمانە خۆشەویستییەکە پاڵنەریانە، دەزانن کە من بۆ بەرگریکردن لە مزگێنییەکە دەستنیشانکراوم؛ ¹⁷ وە ئەوانەی لایەنگری پاڵنەریانە، بانگەشە کردنیان بە مەسیح دڵسۆزانە نیە، وا بیر دەکەنەوە کە دەبنە هۆی تەنگانەی زیاتر بۆ کۆت و بەندەکانم. ¹⁸ کەواتە چی؟ هەرچییەک بێت و لە هەر دۆخێکدا مەسیح ڕایدەگەیەندرێت، جا بە ڕووکەش بێت یان بە ڕاستی. بەمەش دڵخۆشم و دڵخۆش دەبمەوە! ¹⁹ چونکە دەزانم کە ئەمە دەبێتە هۆی ئازاد کردنم، بە نزاکانتان و یارمەتی گیانی یەشوای مەسیحەوە؛ ²⁰ بەپێی ئەوەی چاوەڕێم دەکرد و هیوام بۆ دەخواست: لە هیچ شتێک شکەستم نەهێنا، بەڵکو لە هەموو بوێرییەکدا و وەک هەمیشە، ئێستاش مەسیح لە جەستەمدا مەزن دەبێت، جا بە ژیان بێت یان بە مردن. ²¹ بۆ من ژیان مەسیحە، و مردنیش قازانجە بۆ من. ²² بەڵام ئەگەر بتوانم لە جەستەدا بژیم، ژیانم بۆ کاری بەرهەمدار ئامادەم دەکات. نازانم کام لەو دووانە هەڵبژێرم! ²³ من لە ژێر فشاری هەردووکیدام: ئامادەم بڕۆم و لەگەڵ مەسیحدا بمێنمەوە، ئەوەش بە ڕاستی زۆر باشترە؛ ²⁴ بەڵام مانەوەم لە جەستەدا لە پێناو ئێوەدا پێویستە. ²⁵ تا متمانەم بەم شتە هەبێت، دەزانم لەگەڵ هەمووتان دەمێنمەوە و نیشتەجێ دەبم، بۆ پێشکەوتن و خۆشیتان لە باوەڕدا، ²⁶ بەهۆی منەوە شانازیتان بە مەسیحەوە زیاد دەکات لەگەڵ بوونی من لە نێوانتاندا. ²⁷ تەنها ژیانێک بژین کە شایستەی مزگێنی مەسیح بێ، بۆ ئەوەی ئەگەر هاتم و چاوم پێتان کەوت یان لێتان دوور بم، هەواڵتان ببیستم، بزانم کە ئێوە لە یەک گیاندا چەسپاون، بە یەک هەستەوە پێکەوە هەوڵ دەدەن بۆ ئەو باوەڕەی کە لە مزگێنیەکەدا ڕاگەیەندراوە، ²⁸ لە هیچ شتێکدا مەترسە لەلایەن ئەو کەسانەی کە بەرەنگارتان دەبنەوە، چونکە بەرەنگارییان بەڵگەیە بۆ لەناوچوونی خۆیان و ڕزگاربوونی ئێوە، و ئەمەش لە خوداوەیە. ²⁹ لە پێناوی مەسیحدا، پێتان دراوە، نەک تەنها باوەڕتان پێی هەبێت، بەڵکو لە پێناویدا ئازار بچێژن، ³⁰ هەمان تێکۆشانتان هەیە ئەوەی لە مندا بینیوتانە و ئەوەی ئێستا لە منی دەبیستن.