¹ لە کاتێکدا پەترۆ و یۆخەنا قسەیان لەگەڵ ئامادەبووان دەکرد، کاهینەکان، و فەرماندەی پاسەوانی پەرستگاکە و سەدوکیمەکان هاتن بۆ لایان، ² ئەوان بێزار بوون چونکە ئەمان خەڵکیان فێر دەکرد و ڕایاندەگەیاند کە هەستانەوەی مردووەکان ئەو ڕاستییەیە کە بە هەستانەوەی یەشوا پشتڕاستکراوەتەوە، ³ بۆیە دەستگیریان کردن و تا ڕۆژی دواتر خستیاننە زیندانەوە، چونکە ئێوارە بوو. ⁴ زۆرێک لەوانەی گوێیان لە وشەکە بوو باوەڕیان هێنا کە ژمارەی پیاوە باوەڕدارەکان نزیکەی پێنج هەزار کەس بوون. ⁵ بەیانی ڕۆژی دوایی سەرکردە و پیران و مامۆستایانی یەهوود لە یۆرشەلایم کۆبوونەوە، ⁶ ئەنانیای سەرۆک کاهینان، و کەیافا، و یۆخەنا، و ئەسکەندەر، و هەموو ئەوانەی لە خێڵی سەرۆک کاهینەکان بوون لەگەڵیان بوون. ⁷ پەترۆ و یۆخنایان بانگ کرد و لێیان پرسین: «بە چ هێزێک و بە ناوی کێ ئەم کارەتان کردووە؟» ⁸ ئینجا پەترۆ پڕ بوو لە گیانی پیرۆز و وەڵامی دانەوە: «ئەی رێبەران و پیرانی گەل، ⁹ ئەگەر ئەمڕۆ بەهۆی چاکەیەک لەگەڵ پیاوێکی نەخۆش لێپرسینەوەمان لێ بکەن، ¹⁰ کەواتە بزانن، و با هەموو گەلی یەسرائیل بزانن، کە بە ناوی یەشوای مەسیحی ناسیرەیی، کە لە خاچتان دا، و لە مردن هەستایەوە، بە ناوی ئەوەوە ئەم پەککەوتە بە تەندروستییەکی تەواوەوە لەبەردەمتان وەستاوە! ¹¹ یەشوا ئەو بەردەیە کە ئێوەی تەلارسازان ڕەتتان کردەوە، و خۆی بوو بە یەکەم بەردی بناغە. ڕزگاربوون لە هیچ کەسێکی تردا نییە، ¹² هیچ ناوێکی تر لە ژێر ئاسماندا نییە کە بە مرۆڤ بەخشرابێت تا بەهۆیەوە ڕزگارمان بێت!» ¹³ ئامادەبووان سەرسام بوون بە بوێری پەترۆ و یۆخەنا، کاتێک زانیان کە ئەوان خوێندەوار نین و لە خەڵکی ئاسایین، تێگەیشتن کە ئەوان لەگەڵ یەشوا بوون. ¹⁴ کاتێک بینیان ئەو پیاوە کەم ئەندامەی کە چاک بۆتەوە لەگەڵیان وەستاوە، هیچیان نەدۆزیەوە کە دژایەتییان بکەن! ¹⁵ بۆیە فەرمانیان پێکردن کە ئەنجومەنەکە بەجێبهێڵن، تا لە نێوان خۆیاندا ڕاوێژ بکەن. ¹⁶ و گوتیان: «چی لەم دوو پیاوە بکەین؟ بۆ هەموو خەڵکی یۆرشەلایم ڕوونە کە پەرجوویەکی گەورە لەسەر دەستی ئەوان ڕوویداوە، و ناتوانین نکۆڵی لێبکەین! ¹⁷ به ڵام بۆ ئه وەی ئەم بابەته له نێو گەلدا زیاتر بڵاو نەبێتەوه، با هەڕەشەیان لێبکەین که له ئێستاوه ئەم ناوه لای کەس نەهێنن». ¹⁸ پاشان هێنایان و فەرمانیان پێکردن بەناوی یەشوا قسەمەکەن یان خەڵکیش ئاوا فێر مەکەن. ¹⁹ بەڵام پەترۆ و یۆخەنا گوتیان: «خۆتان بڕیار بدەن: ئایا لەبەردەم خودادا ڕاستە کە گوێڕایەڵی فەرمانەکانی ئێوە بین و یاخود فەرمانەکانی خودا؟ ²⁰ ناتوانین واز لە باسکردنی ئەوە بێنین کە بینیومانە و بیستوومانە». ²¹ ئەنجومەنەکە توندتر هۆشداری پێدان، بەبێ ئەوەی ڕێگەیەک بۆ سزادانیان بدۆزێتەوە، لە ترسی ڕاپەڕینی گەل فەرمانی ئازادکردنیانی دەرکرد و هەمووان خودایان بۆ ئەو پەرجووە شکۆمەند کرد ، ²² چونکە ئەو پیاوەی ئەم نیشانەی چاکبوونەوە لێی ڕوودا تەمەنی لە سەرووی چل ساڵەوە بوو! ²³ هەر کە پەترۆ و یۆخەنا ئازاد کران، گەڕانەوە بۆ لای هاوڕێکانیان و هەموو ئەو شتانەی کە سەرۆک کاهینەکان و پیران گوتبوویان بۆیان گێڕانەوە، ²⁴ بۆیە بە یەک دڵەوە بە نزا ڕوویان لە خودا کرد، و گوتیان: «ئەی پەروەردگار، بەدیهێنەری ئاسمان و زەوی و دەریا و هەموو ئەو شتانەی تێیدایە، ²⁵ ئەی تۆ کە بە گیانی پیرۆز لە ڕێگەی داڤیدی خزمەتکارتەوە وتت: بۆچی گەلان ئەوەندە توڕە بوون؟ بۆچی کاتەکانیان بە پلانی بێهودە بەفیڕۆ ئەدەن؟ ²⁶ پاشاکانی زەوی و ڕێبەرەکانیان کۆبوونەوە و یەکتریان گرت بۆ دژایەتی پەروەردگار و مەسیحەکەی! ²⁷ ئەم قسانە لە ڕاستیدا هاتنە دی، وەک چۆن هیرۆد و پۆنتیۆس پیلاتۆس و بتپەرستەکان و هۆزەکانی یەسرائیل، هاوپەیمان بوون بۆ بەرەنگاربوونەوەی پیرۆزەکە یەشوا، کە تۆ کردت بە مەسیح، ²⁸ وە هەموو ئەو شتانەیان لەگەڵدا کرد کە دەست و خواستی تۆ بڕیاری دابوو. ²⁹ ئێستا ئەی پەروەردگار، ببینە چۆن هەڕەشەمان لێ دەکەن، بوێری بە ئێمەی خزمەتکارت ببەخشە با وشەکانت ڕابگەیەنین، ³⁰ دەستت درێژ بکە بۆ چاکبوونەوە، تاکو بە ناوی یەشوا خزمەتکارە پیرۆزەکەتەوە پەرجووی سەرسوڕهێنەر ئەنجام بدرێت». ³¹ لە کاتێکدا نزایان دەکرد ئەو شوێنەی کە لێی کۆببوونەوە لەرزی، هەموویان پڕ بوون لە گیانی پیرۆز، بۆیە بە هەموو بوێرییەکەوە دەستیان کرد بە ڕاگەیاندنی وشەی خودا! ³² کۆمەڵگەی باوەڕداران یەک دڵ و دەروون بوون، و کەس نەیدەگوت هەر شتێک کە هەیبوو تەنها هی خۆیەتی، بەڵکو هەموو شتێک بە هاوبەشی هی هەمووان بوو. ³³ نێردراوان شایەتی هەستانەوەی یەشوای پەروەردگاریان دەدا، هێز و بەخششێکی مەزن بەسەر هەموویاندا دادەبەزی. ³⁴ لە نێوانیاندا هیچ هەژارێک نەبوو، چونکە هەموو ئەوانەی کێڵگە و خانوویان هەبوو دەیانفرۆشت و بەهاکەیان دەهێنا. ³⁵ لەبەر پێی نێردراوان دایان دەنا، و بەپێی پێویست بەسەر هەرکەسێکدا دابەشیان دەکرد. ³⁶ لە نێو ئەمانەدا یۆسپ ناوێک بوو کە نێردراوان پێیان دەگوت بەرنابا واتە کوڕی هاندان، ئەو لە هۆزی لێڤی، و خاوەنی ڕەگەزنامەی قوبرسی بوو. ³⁷ خاوەنی کێڵگەیەک بوو، فرۆشتی و بەهاکەی هێنا و لە بەر پێی نێردراوان داینا!