¹ کاتێک ڕۆژی پەنجاهەم هات، براکان لە یەک شوێن کۆبوونەوە، ² لەناکاو دەنگێک لە ئاسمانەوە هات وەک دەنگی بایەکی بەهێز، ئەو ماڵەی پڕ کرد کە تێیدا دانیشتبوون. ³ پاشان زمانەکان وەک ئەوەی ئاگر بن بۆیان دەرکەوتن، و دابەشبوون و سەر هەر یەکێکیاندا، ⁴ هەموویان پڕ بوون لە گیانە پیرۆزەکە، و دەستیان کرد بە قسەکردن بە زمانەکانی تر، هەروەک ئەوەی گیانەکە دەسەڵاتی قسەکردنی پێبەخشیبن. ⁵ لەو کاتەدا یۆرشەلایم بە هۆی ئەو یەهودییە لەخواترسانەی لە سەرجەم نەتەوەکانی جیهانەوە هاتبوون قەرەباڵغ بوو. ⁶ کاتێک گوێیان لەم دەنگە بوو، جەماوەرەکە بە سەرسوڕمانەوە کۆبوونەوە، چونکە هەریەکەیان گوێیان لە قسەکردن بە زمانی خۆیان بوو. ⁷ هەمووان سەریان سوڕمابوو. پرسیاریان دەکرد: «ئایا ئەمانە کە قسە دەکەن سەرجەمیان خەڵکی گەلیلی نین؟ ⁸ ئەی چۆنە هەر یەکێک لە ئێمە زمانی ئەو وڵاتە دەبیستێت کە تێیدا لەدایک بووە؟ ⁹ هەندێکمان پارت و ماد و ئیلامین. هەندێکمان خەڵکی میزۆپۆتامیا و یەهودیا و کەپادۆکیا و پۆنتۆس و ئاسیاین. ¹⁰ هەندێک لە فریگا و پامفیلیا، میسر و بەشەکانی لیبیا بەرامبەر قیرەوانین. لە ناوماندا زۆرێک لە ڕۆمەوە بۆ سەردان هاتوون، ¹¹ یەهودی و ئەوانەی بوون بە یەهودی. هەندێکیان کرێتی وهەندێکی عەرەبن. ئەوەتا گوێمان لێیە کە بە زمانەکانمان قسەمان لەگەڵ دەکەن و کارە مەزنەکانی خودامان پێڕادەگەینن». ¹² هەمووان بە سەرسوڕمان و سەرلێشێواوی لە یەکتریان دەپرسی: «مانای هەموو ئەمانە چییە؟» ¹³ هەندێکیشیان بە گاڵتەجاڕیەوە دەیانگوت: «ئەوان جگە لە سەرخۆش هیچی تر نین!» ¹⁴ پاشان پەترۆ لەگەڵ یازدە نێردراوان وەستا، و بە دەنگێکی بەرز وتاری بۆ دان، و گوتی: «ئەی یەهودییەکان، و هەموو ئەوانەی لە یۆرشەلایم نیشتەجێن! گوێ لە قسەکانم بگرن بۆ ئەوەی ڕاستی بابەتەکە بزانن! ¹⁵ ئەمانە سەرخۆش نین، وەک ئەوەی ئێوە بیری لێ دەکەنەوە، خەڵکی کاتژمێر نۆی بەیانی سەرخۆش نابن. ¹⁶ ئەمە هەر ئەوەیە کە لە زمانی پێغەمبەر یوئێلەوە وتراوە: ¹⁷ خودا دەفەرموێت: لە ڕۆژانی کۆتاییدا گیانی خۆم بەسەر هەموو مرۆڤایەتیدا دەڕێژم، کوڕ و کچەکانتان پێشبینی دەکەن، گەنجەکانتان بینین و پیرانتان خەون دەبینن. ¹⁸ لەو ڕۆژانەدا لە گیانی خۆم بەسەر هەموو خزمەتکارەکانمدا دەڕێژم، چ ژن و چ پیاو، ئەوانیش پێشبینی دەکەن. ¹⁹ نیشانەی سەرسوڕهێنەر لە ئاسمان و زەوی ئەنجام دەدەم ، خوێن و ئاگر و دوکەڵی چڕ دەبێت! ²⁰ وە پێش ئەوەی ڕۆژی پەروەردگار بێت، ئەو ڕۆژە مەزن و بەناوبانگە، خۆر تاریک دەبێت، مانگ دەگۆڕێت بۆ ڕەنگی خوێن. ²¹ بەڵام هەرکەسێک بە ناوی پەروەردگاروە بانگی بکات ڕزگاری دەبێت! ²² ئەی نەوەی یەسرائیل، گوێ بگرن لەم قسانە : یەشوای ناسیرەیی مرۆڤێک کە خودا بۆتانی سەلماند لە ڕێگەی ئەو پەرجوو و سەرسوڕهێنەر و نیشانە باوەڕپێکراوانەی بە ئەو لە نێوانتاندا کردوویەتی، وەک خۆتان دەزانن. ²³ بەڵام خودا بەپێی خواست و زانستی پێشوەختی دیاریکراوی خۆی، ڕێگەی دا کە بیگرن و لە خاچی بدەن و بە دەستی گوناهباران بکوژرێت. ²⁴ بەڵام خودا لە مردن هەڵیستاندەوە، لە ئازارەکانی مردن ڕزگاری کرد، وەک چۆن نەدەکرا مردن لە چنگی خۆیدا بیهێڵێتەوە! ²⁵ چونکە داڤید لەو بارەیەوە دەڵێت: من هەمیشە پەروەردگارم لە پێش خۆمەوە دەبینی چونکە ئەو لە ڕاستی منە تاوەکو نەهەژێم، ²⁶ بۆیە دڵم شادە و زمانم شادی دەردەبڕی. جەستەم بە هیواوه پشوو دەدات. ²⁷ گیانم لە ناو مردووەکاندا بەجێ ناهێڵیت، و ڕێگە نادەیت تاکە پیرۆزەکەت گەندەڵی ببینێت، ²⁸ تۆ ڕێنماییت کردم بۆ ڕێگاکانی ژیان، بینینی ڕووخسارت پڕم دەکات لە شادی! ²⁹ ئەی برایان، با ڕاشکاوانە پێتان بڵێم کە داڤیدی باوکمان مرد و بە خاک سپێردرا، و گۆڕەکەی تا ئەمڕۆش لای ئێمەیە. ³⁰ چونکە داڤید پێغەمبەر بوو، دەیزانی کە خودا سوێندی بۆ خواردووە کە مەسیح لە رەچەڵەکی ئەو ئەبێت و لەسەر تەختەکەی دادەنیشێت، ³¹ باسی هەستانەوەی مەسیحی کرد وەک چۆن پێشتر بینیبووی، گوتی لە جیهانی مردوواندا نەمایەوە، جەستەی گەندەڵیی وەرنەگرت. ³² یەشوا لە مردن هەستایەوە و هەموومان شایەتحاڵی ئەوەین. ³³ کاتێک بەرزبۆوە بۆ ڕاستەی خودا، و گیانە پیرۆزەکەی بەڵێندراوی لە باوک وەرگرت، و بەسەر ئێمەیدا ڕشت. ئەوەی ئێستا دەیبین و دەیبیستن دەرئەنجامی ئەوەیە. ³⁴ چونکە داڤید بە جەستەی خۆیەوە بەرز نەکرایەوە بۆ ئاسمان. پاشان بۆ خۆی دەڵێت: پەروەردگار بە پەروەردگارمی فەرموو: لە راستەی من دابنیشە ³⁵ تا دوژمنەکانت بکەمە تەختە پێت. ³⁶ کەواتە با هەموو نەوەی یەسرائیل بە دڵنیاییەوە بزانن، کە خودا یەشوا ئەوەی ئێوە لە خاچتاندا، پەروەردگار و مەسیحە!» ³⁷ ئەوانەی ئامادەبوون ئەم قسانەیان بیست، کاری کرد لە دڵیان، بۆیە لە پەترۆ و نێردراوانی دیکەیان پرسی: « برایان، چی بکەین؟» ³⁸ پەترۆ وەڵامی دانەوە: «پاشگەز ببنەوە، و بە ناوی یەشوای مەسیح لە ئاوهەڵکێشرێن خودا لە گوناهەکانتان خۆش دەبێت و گیانە پیرۆزەکە بە دیاری وەردەگرن، ³⁹ چونکە بەڵێنەکە بۆ ئێوە و منداڵەکانتان و هەموو ئەوانەیە کە دوورن، هەرکەسێک پەروەردگار خودامان بانگهێشتی کردبێت وەریدەگرێت!» ⁴⁰ پاشان پەترۆ شایەتحاڵی بۆ ئامادەبووان دا و بە چەندین وتاری تر ئامۆژگاری کردن، و گوتی: «خۆتان لەم نەوە لاڕێیە ڕزگار کەن!» ⁴¹ ئەوانەی قسەکانیان پەسند کرد لە ئاو هەڵکێشران. نزیکەی سێ هەزار کەس لەو ڕۆژەدا پەیوەندیان کرد. ⁴² هەمووان بەردەوام بوون لە وەرگرتنی فێرکاری نێردراوان، و ژیانی هاوبەش و شکاندنی نان و نزاکردن. ⁴³ کاتێک زۆر سەرسوڕهێنەر و نیشانە لەلایەن نێردراوانەوە ئەنجامدرا، هەمووان تووشی سەرسامی بوون. ⁴⁴ باوەڕداران هەموویان پێکەوە یەکگرتوو بوون، و لە هەموو ئەو شتانەی کە هەیانبوو بوون بە هاوبەش، ⁴⁵ کەلوپەلی خۆیان دەفرۆشت و بەهاکەیان بە پێی پێویستی هەر کەسە دابەش دەکرد، ⁴⁶ ڕۆژانە بە یەک دڵ و بەردەوام دەچوون بۆ پەرستگا، و لە ماڵەوە نانیان دەشکاند، و بەدڵخۆشی و دڵفراوانییە پێکەوە نانیان دەخوارد، ⁴⁷ ستایشی خودایان دەکرد، و لەلایەن هەموو گەلەوە پێشوازییەکی باشیان لێکرا. پەروەردگار، هەموو ڕۆژێک، ئەو کەسانەی بۆ کڵێساکە زیاد دەکرد کە ڕزگاریان ببوو.