¹ لەبەردەم خودا و مەسیحدا کە بڕیار لەسەر زیندووان و مردووان دەدات، لەبەر دەرکەوتنی خۆی و شانشینەکەی داوات لێدەکەم، ² بەتەواوی سەرقاڵی ڕاگەیاندنی وشەکە بە، ئامادە بە لە کاتی گونجاو و نەگونجاودا خەڵکی ڕاستەڕێ بکە سەرزەنشت بکە و هانیان بدە و بەوپەڕی پشوودرێژییەوە هەوڵی فێرکردنیان بدە. ³ .چونکە کاتێک دێت خەڵکی بەرگەی فێرکاری دروست ناگرن، بەڵام بەپێی ئارەزووی خۆیان مامۆستایان بۆ خۆیان کۆدەکەنەوە (ئەو قسانەیان بۆ دەکەن) کە بە گوێیان خۆشە. ⁴ گوێیان لە ڕاستی لادەدەن، و ڕوو لە گێلایەتی دەکەن. ⁵ بەڵام تۆ، لە هەموو شتێکدا چاو کراوەبە، بەرگەی دژواری بگرە، کاری مزگێنیدان بکە، خزمەتەکەی خۆت تەواو بکە. ⁶ سەبارەت بە من، ئامادەم لە ئێستاوە وەک خواردنەوەی قوربانی بڕژێم، و کاتی مردنم نزیکە. ⁷ من تێکۆشانێکی باش تێکۆشاوم، ئێستاش گەیشتوومەتە کۆتایی پێشبڕکێکە، و باوەڕەکەم پاراستووە. ⁸ بەڵام ئێستا چاوەڕێی تاجی ڕاستودروستیم کە بۆم تەرخانکراوە، کە پەروەردگار دادوەری ڕاستودروست لەو ڕۆژەدا پێم دەدات؛ تەنها بە من نادرێت، بەڵکو بە هەموو ئەوانەی کە تامەزرۆی بینینی ئەون. ⁹ کۆشش بکە خێرا وەرە لام، ¹⁰ چونکە دیماس، کە ئەم ژیانەی ئێستای خۆشدەویست، جێی هێشتم و چووە شاری تەسالۆنیکی. سەبارەت بە كريسكيس، ئەو چووە هەرێمی گەلاتیە، و تیتۆس بۆ دەلماتیا ¹¹ تەنها لوقا بە تەنیا لەگەڵمدا ماوەتەوە. بڕۆ لای مارکۆس و لەگەڵ خۆتدا بیهێنە، چونکە لە خزمەتکردندا سوودی بۆ من دەبێت. ¹² سەبارەت بە تیخیکۆس، من ناردم بۆ شاری ئەفەسۆس. ¹³ کاتێک هاتیت، ئەو کەوایە لەگەڵ خۆت بهێنە کە لە ترۆئاس لەلای کارپۆس بەجێم هێشت، تۆمارەکانیش بهێنە، بە تایبەت دەستنووسەکان. ¹⁴ ئەسکەندەری مسگەر زۆر خراپەکاری کردووە، پەروەردگار بە پێی کارەکانی سزای دەدات. ¹⁵ ئاگاداری ئەو بن، چونکە بە توندی بەرەنگاری قسەکانی ئێمە بۆتەوە. ¹⁶ کاتێک بۆ یەکەمجار لە دادگاییەکەمدا بەرگریم لەخۆم کرد، کەس پشتی نەگرتم، بەڵکو هەمووان وازی لێهێنام، خودا لەسەر ئەمە لێپرسینەوەیان لەگەڵ نەکات! ¹⁷ بەڵام پەروەردگار لە تەنیشتم وەستا و هێزی پێدام، بۆ ئەوەی مژدە لە ڕێگەی منەوە ڕابگەیەنرێت، تا هەموو نەتەوەکان بیبیستن؛ کە لە دەمی شێر دەرباز بووم. ¹⁸ پەروەردگار لە هەموو کارێکی خراپ ڕزگارم دەکات و دەمپارێزێت بۆ شانشینە ئاسمانییەکەی. شکۆمەندی بۆ ئەوە هەتاهەتایە، ئامین! ¹⁹ سڵاو لە پریسکیلا و ئەکیلا، و خێزانی ئۆنیسیفۆرۆس بکە. ²⁰ ئەراستۆس لە کۆرنسۆس مایەوە. بەڵام تروفیمۆسم، لە میلیتۆس بە نەخۆشی بەجێهێشت. ²¹ کۆشش بکە پێش هاتنی زستان بێی بۆ لام. یۆپولۆس و پودیس و لینوس و کلۆدیا و هەموو خوشک و براکان سڵاوتان لێدەکەن. ²² پەروەردگار لەگەڵ گیانت بێت، با بەخششت لەگەڵ بێت!