¹ سەبارەت بە پرسی سەردەم و کاتە دیاریکراوەکان پێویست ناکات دەربارەیان بۆتان بنووسم. ² چونکە بە دڵنیاییەوە دەزانن کە ڕۆژی پەروەردگار دێت وەک چۆن دز لە شەودا دێت. ³ لە کاتێکدا خەڵک دەڵێن: ئاشتی و ئارامی هەیە! لەناوچوونێکی لە ناکاو دێتە سەریان، وەک ئازاری ژنێکی دووگیان، و هەرگیز ناتوانن لێی دەرچن. ⁴ جگە لەوە ئێوەش،ئەی برایان، ئەو ڕۆژەی کە وەک دزێ لە ناکاو دێت لە تاریکیدا نابن. ⁵ چونکە هەمووتان ڕۆڵەی ڕووناکی و ڕۆژن. ئێمە نە خەڵکی شەوین و نە خەڵکی تاریکی. ⁶ بۆیە، با نەخەوین وەک چۆن ئەوانی تر دەخەون، بەڵکو با بەئاگا و هۆشیاری بمێنینەوە، ⁷ چونکە ئەوانەی بە شەو دەخەون با بخەون و، ئەوانەی لە شەودا سەرخۆشن با سەرخۆش بن ⁸ بەڵام ئێمە، کە خەڵکی ڕۆژین، دەبێت بە ئاگایی بمێنینەوە، و باوەڕ و خۆشەویستی بکەین بە قەڵغانێک بۆ سینگمان، و هیوای ڕزگاربوون کڵاو بۆ سەرمان. ⁹ چونکە خودا ئێمەی دیاری کردووە نەک بۆ ئەوەی تووڕەیی بەسەرماندا بێت بەڵکو بۆ ئەوەی بە یەشوای مەسیحی پەروەردگارمان ڕزگارمان بێت، ¹⁰ کە لە پێناو ئێمەدا مرد بۆ ئەوەی هەموومان لەگەڵیدا بژین، جا چ لە بەئاگابوونی ژیاندا بین یان لە خەوی مردندا! ¹¹ بۆیە دڵنەوایی یەکتر بکەن و یەکتر بە هێز بکەن، هەروەک چۆن دەیکەن. ¹² بەڵام داواتان لێدەکەین، برایان، ئەو کەسانە بناسن کە لە نێوانتاندا زۆر کۆشش دەکەن، وەک چۆن پەروەردگار دەیەوێت شوانایەتیتان دەکەن، و ئامۆژگاریتان دەکەن، ¹³ ڕێزیان بگرن بە ڕێزلێنانی خۆشەویستی لە پێناو کارەکانیان. بە ئاشتی لەگەڵ یەکتردا بژین. ¹⁴ داواتان لێدەکەین، ئەی برایان، ئامۆژگاری تێکدەرەکان، و بێ ورەکان بکەن، و پشتگیری لاوازەکان بکەن، و بە پشوو درێژییەوە لەگەڵ هەمووان ڕەفتار بکەن. ¹⁵ ئاگادار بن هیچ کام لە ئێوە خراپە بە خراپە وەلام نەدەنەوە هاوشێوەی ئەوان. بەڵکو بەردەوام هەوڵبدەن بە چاکە لەگەڵ یەکتر ولەگەڵ هەمووان رەفتار بکەن. ¹⁶ بەردەوام شاد بن؛ ¹⁷ بێ بڕانەوە نزا بکەن؛ ¹⁸ لە هەموو بارودۆخێکدا سوپاسگوزار بن: چونکە ئەمە خواستی خودایە بۆ ئێوە لە مەسیحی یەشوادا. ¹⁹ گیانەکە خامۆش مەکەن، ²⁰ سووکایەتی بە پێشبینیەکان مەکەن؛ ²¹ هەموو شتەکان تاقی بکەنەوە و دەست بە باشەوە بگرن. ²² خۆت بە دوور بگرە لە هەموو شتێک کە گومانی خراپەی تێدایە. ²³ خودای ئاشتی خۆی بە تەواوی پیرۆزتان بکات، و خۆتان و گیان و جەستەتان تەندروست بکات، تا لە گەڕانەوەی پەروەردگارمان یەشوای مەسیحدا بێ کەموکوڕی بن. ²⁴ چونکە خودا کە بانگهێشتتان دەکات ڕاستگۆیە، و ئەوەش بە ئەنجام دەگەیەنێت. ²⁵ ئەی برایان، لە پێناوماندا نزا بکەن. ²⁶ بە ماچێکی پاکەوە سڵاو لە هەموو برایان! ²⁷ بە پەروەردگار داواتان لێدەکەم کە ئەم نامەیە بۆ هەموو براکان بخوێندرێتەوە. ²⁸ بەخششی پەروەردگارمان یەشوای مەسیح لەگەڵتان بێت.