¹ Nani Aod chiminin piquëran, Israel ro'saso' naquëranchin co noyahuë niantapi Sinioro ni'tonënquë. ² Sinioro chachin yonin Jabini copirno cananeo piyapiquë. Azor ninanoquëran hua'anëntërin. Sontaro hua'anënso' Sísara itopi, inaso nipirinhuë' Haroset Goyim ninanoquë yahuërin. ³ Israel ninanoso, na'con Yosë chinotopi, Yosëri catahuacaso, marë. Sisaraso' yahuëtërin 900 toronan huana quëran nininso. Naporahuaton Israel ninanoso, cato shonca pi'i chiniquën aparisitopi. ⁴ Napoaton Déboraso' sha'huina'pi sanapi (napidot sa'in inaso'), naporo tahuëri'sa ina sanapiso' jueza nanan anoyatona'pi nisarin Israelro'sa marë'. ⁵ Ina sanapiso' nani tahuëri pochin huënsërin. Inaso inachinterinso' nitón yahuëinën sonamënquë ya'huën sërin ina Rama piteri inapitari ahuancanapirin. Ifrain ninano motopiquë Israiro'sa nonan ya'huetoachinara paatona nanan anoyatopiquë. ⁶ Ina sanapiri apëraterin, Barac, inaso, Abinoam hui'nin. Abinoanso ya'huërin, Cedes itopiquë. Inaso Neftalí huëntonquëran, nipiso. Sanapiriso itapon: "Sinioro, Israiro'sa Yosënën camairinquën, paquë, Tabor tananquë pa'sahuaton 10000 sontaro'sa ayontonquë Neftalí huëntono'sa quëran. Naporahuaton Zabulon, huentono'sa queraonta. ⁷ Cariso Sísara quëparahuë inaso Jabin sontaro hua'an, inarë'quën niquënanco Kishon i'shaquë, inaso ya'huëtërin na'con toronano'sa hua'na quëran sontaronënpitanta, carinquën camaiaranquën quëmari minsëcaso' marë". Itërin. ⁸ Napotopirinhuë' Barariso' itapon, "Quëmaro'co pa'sahuato, pa'sarahuë, nipirihuë' co' quëma pa'patanhuë', co' canta pa'sarahuë' itërin". ⁹ Napotohuachina itapon, "No'tëquën mini quëmaro'co pa'sarahuë itërin. Nipirinhuë' co' quëmaso' na'con na'con pa'yatarinën quëhuë' Siniori chachin sanapi catahuahuachin Sísara minsëarin". Déboraso' huanirahuaton Barac itopisorë pa'pi huachi Cades itopi'pa. ¹⁰ Napoaton Barac sha'huitërin Zabulón inaran Neftalí sontaro'sa inapitarë' Cedes itopi'pa inahuanta pacacaiso' marë'. Shonca huaranca sontaro'sarë' pa'sapi ina huancana Déboranta pa'nin huachi. ¹¹ Napoaton Heber itopiso (Quenita) inaso' nipirinhuë' inaquëra pipirin, inahuaso nipirinhuë' Hobab shinpita inahuaso, (Moisés mi'sën inaso') inaso' pa'sahuaton në'mëtë' pëi' ninin ropri nara yonsanquë Zaanaim itopiquë Cades ya'cariya. ¹² Sísara sha'huitatona napotopi a'napitari Abinoam hui'nin Baraso ni'pirinhuë' pa'nin a'na motopi'pa Monte Tabor itopi'pa, ¹³ ina natantahuaton Sísaraso' nipirinhuë caronënpita 900 nininsopita amatërin hua'naquëran nininso, sontaronënpitarë' chachin Haroset Goyim itopi quëran niaco piso', nicanconpi a'na i'sha Cisón itopiquë huarë yamopiso'. ¹⁴ Déborariso Barac itapon: "¡Ni quë'! Ipora tahuëri chachin Señor ca'tahuarinquën Sísara sontaronënpitarë chachin, quëma sontaro nënpitarëquën minsëtarama'. ¿Co'tanama' Señor catahuainquënhuë pa'? itërin. Napotohuachina Barac itopisoso' Monte Tabor motopiquëran nohuaraimarin 10000 sontaronënpitarë imaquimarapi ahuëtacaiso' marë'. ¹⁵ Señor nohuanton chachin Sísara sontaronënpita hua'yantopiso' pochin ni'pi co' nanitopihuë' ahuëtacaiso', napoaton Sísaraso' toronanën quëran nohuararahuaton ta'arin. ¹⁶ Nipirinhuë Barac sontaronënpitarë' chachin toronanquë ta'apisopita imapi Haroset Goyin itopiquë huarë', ya'ipi Sísara sontaronënpita ni'cantahuatona ata'huatopi. Shonqui nënaquë ahuëatona tiquipi, co a'nayatëranta nicha'ëpihuë'. ¹⁷ Sísaraso' ni'pirinhuë' no'pa ta'ataton Jael në'mëtë' pëi'nën parti ta'arin, Heber sa'in Quenita itopiso', inaso ni'pirinhuë' Hazor copirno Jabin itopisoarë' no'ya nipayapi, Heber Quenita pëinën inaso'. ¹⁸ Jael, inaso' ni'pirinhuë Sísara quënahuaton, na'capirahuaton napotërin, "Huëquë', maistro; huëquë' i'sëquë ama të'huaquësohuë'". Napotahuaton pëinënquë quëparahuaton ichi ya'concontarin. Inapotahuaton sha'huëtëquë imotërin. Ama quëna nacaiso' marëhuë'. ¹⁹ Inaso natantërin, "canta pi'pisha i'sha quëtoco o'oí, pa'pi yamorotërahuë iterin". Napotohuachina sha'huëtë morsaquë cashin ta'paipiso' i'sohuatahuaton quëtërin oocaso' marë', o'shitahuaton naquëranchin imotantarin. ²⁰ Inariso' itantarin, "pëi' ya'coanaquë huania'quë'. Inshatëranta huë'sahuaton na'tahuanchinquën, ¿Co inshatëranta i'sëquë ya'huërinhuë? Itohuachinënquën ca'pa itëquë'". ²¹ Ina quëran Jael (Heber sa'in inaso') inaso nara masahuaton pain topiso' martichonta quëquën nininso', inapita masahuaton osha'quëran Sísara ama të'pacaiso' marëhuë' imotërinquë ni'capon ya'concontarin, ni'contapirinhuë' noya' huë'ëtërin, ina sanapiriso' nara painayatërinquë mo'tën paquëtahuaton martichoquë ahuëantërin, motën aquëtë' huarë' pasatërin, inapotohuachina chiminin huachi. ²² Sísaraso ta'arin ni'ton Barac itopisori yonisarin tëpacaso' marë', Jael Sanapiso Barac quënanahuaton ta'arahuaton na'capirin, "Huëquë, insona yonisaranso' huëquë' carinquën a'nochinquën". Napotohuachina ina sanapi imarin pëinënquë, pëiquë ya'conconpirinahuë Sísara chimipi quënanpi, nara paintopinanquë huëratanamën papitopinan quënanin. ²³ Naporo' tahuëri Yosë chini'quën nanantaton canaan copirno Jabin itopiso minserin. Israel piyapiro'sa nosoroaton nicha'ëantarin parisita'pirinahuë. ²⁴ Inapoaton Israel piyapiro'saso chini chini'quë pochin nipi, copirno Jabin canano'saquëran chini chini'quën nipi, inapoatona Israel ro'saso ya'ipi piyapiro'sa ata'huantopi.