¹ Co ya'ipi israiro'saso' Canaanquë nitoahuëtopihuë' ni'ton. Señori i'sopita naciono'sa tanapitarin, israiro'sa tinacaso marë'. ² (israiro'sa quëran pi'pipisopita co nitotopihuë ahuëtacaiso ni'ton, achintarin ahuëtacaiso'. ³ I'sopita naciono'sa tananpitërin: A'natrapo filisteos, copiernonënpita, ya'ipi Canano'sa, sidono'sa, Líbano motopiro'saquë heveoro'sa ya'huëpiso', Baal Hermon motopi quëran, Lebo Hamat huarë' ya'huëpiso'. ⁴ Israiro'sa achintacaso marë inapita naciono'sa Señori tanapitërin Canaanquë ya'huërapi. Moisés quëran shimashonëna camaitërinso' nanan natëro'poi ta'ma ta'ton, inapotërin. ⁵ Canano'sa, hititaro'sa, amorreo'sa, ferezeo'sa, heveo'sa, naporahuaton jebuseo'sa, inapita huancana israiro'sa ya'huërapi. ⁶ Inahua hui'nina marapiapi. Naporahuaton hui'ninanta', inahua quëmapiro'sa acohuantopi, inapoatona' mamanshinëna moshapatopi. ⁷ Israiro'sa Señoro a'poatona pa'pi co noyahuë' nipi, inapitaso' Senor naniantopi. Baales, Aseras, inapita moshapatopi. ⁸ Napoaton Señori, pa'pi nohuitaton Israiro'sa anaintërin. Cusán Risataim, Aram Naharaim hua'anëntërinsoari ahuëquiton canairin. Posa pi'ipi Israiro'sa, Cusáni hua'anëntërin. ⁹ Napohuachina israiro'saso' chiniquën Señor nontopi. Nontohuachinara, inaso', a'nara' huayonin israiro'sa catahuacaso marë'. Inaso' Quenaz hui'nin Otoniel itopi. (Quenaz, Caleb pi'quëran nininso'.) ¹⁰ Señor ispiritonëni Otoniel catahuarin ni'ton, chiniquën hua'an ninin. Inaso', israiro hua'anëntaton ahuëtapon pa'nin. Señori catahuarin ni'ton, sontaronënpitarë chachin Cusán Risataim canaipi. Cusán Aram copierno ninin. ¹¹ Israiro'saso', catahuini shonca pi'ipi noya ya'huëantapi. Ina quëran Quenaz hui'nin Otoniel, chiminin. ¹² Israiro'saso naquëranchin , Señoro naniantatona pa'pi co noyahuë,' niantapi. Napoaton Señoroso', Moab copierno, Eglón itopiso: catahuarin, israiro'sa minsëcaiso, marë'. ¹³ Eglón, amonitas, amalecitas, inapitarë nihuëntonatona' israiro'sa, canapi. Canasahuatona' Palmeras ninano, hua'anëntopi, inaso'(Jericó) itopi anta'. ¹⁴ _ Moabo copierno, Eglón itopisori shonca po'sa pi'ipi israiro'sa, hua'anëntërin . ¹⁵ Israiro'saso chiniquën Señoro nontantahuachinara, Señoroso', a'nara ahuaniantarin catahuacaso, marë'. Inaso', Gera hui'nin Aod itopi, inaso benjamin huënton, quëmapi. Naporahuaton ahuënan camayo inaso'. A'na tahuëri israiro'saso' Moab copierno, Eglón itopiso, pahuërëcaso nininso Aod quëtopi, quëpatacaso, marë'. ¹⁶ Aod', sahuëni nisahuaton, catoran chachin noya tonarin. Ina sahuëniso', 46 centímetros pochin naporopitërin. Naporahuaton, inchinan tonanën quëran amorinso a'copo, tonpotërin. ¹⁷ Inaporahuaton, Moad copierno pahuërëapon pa'nin. (Eglonso', pa'pi amonën masho.) ¹⁸ Nani pahuërëhuachina Aod pë'pëtoro'sarë, paantarin. ¹⁹ Aod nipirinhuë,' Gilgal ya'cari mamanshi nonanpiquë canconhuachinara, inaso' tahuërërin., Tahuërësahuaton copierno paaparahuaton itapon: "Señoro copierno, a'na nanan quëmaorachin ya'sha'huitëranquën, itërin." Copiernoso' piyapinënpita itapon: "¡Ta'toco'!", itërin. Napotohuachina, ya'ipi pa'pi.. ²⁰ Aod copierno ya'cariconin. Copiernoso' inapa pa'toanaquë huënsëaton toncatarin. Naporo chachin, Aod itapon: "Señoro nanan apatërinquënso' sha'huichinquën, itërin. Ito'huachina, copirnoso' huënsërin quëran huanirin. ²¹ Aod, inchinan tonanën quëran sahuëni pomorin ni'ton, ahuënan imiranën quëran, ocoirin. Ocoirahuaton copierno pa'pi, pa'pitarin. ²² Copierno yo'namënquë, sahuëni sëquënamën nininso ya'ipi, ya'comarin. Pinënquë huarë' hui'niratën pi'pirin. Naporahuaton tomaquëni ya'ipi, imotërin. Aod, pa'pitërinso' co ocoitërinhuë ni'ton, naporin. ²³ Inapotahuaton ya'ipi ya'coanaro'sa, noya chapitërin. Oncotahuaton huintana, quëran pipirin. ²⁴ Aod pa'nin piquëran, copirno piyapinënpitaso,' huë'pi. Huë'pirinahuë, inapa pa'toana nininso' noya ocotopinan, ni'pi. Inahuaso yonquinënëna quëran tëcapona: "Pa'toanaquë ipora toncatarin, napoaton co i'sohuarinhuë," to'pi. ²⁵ Copierno huaquiarin ni'ton, inahuaso' co napinhuën, cancantopi. Onpoatonta co ya'isohuarinhuë nica," ta'tona', inahuaso' chapi masahuatona i'sohuapi. I'soapirinahuë, copierno chimipi quëhuëanin' quënanpi. ²⁶ Piyapinënpitaso ninatanatona: "¿Ma'ta iporaso onpoahua'," tëcasoi, Aod nani a'quë ta'asarin mamanshi nonanpiso parti, na'huëtahuaton, Seirat quë'pa, nincanconin. ²⁷ Efraín motopiro'saquë canconpachina tronpita, pihuirin. Ina natanahuatona' Israiro'saso', motopia'huaro'sa quëran nohuararahuatona niyontonpi, imacaiso, marë'. Naporahuaton inaso,' quëchitëraarin. ²⁸ Aodri itapon: "Huëco imaquico, Señoro nohuanton moaporo'sa canaarëhua'," itërin. Itohuachina inapitaso,imapi. Jordán pëntoinano'saquë noya' toshitëtonpi. Moab no'pa mapiso notënanquë, toshitëtahuatona co a'naya tëranta quëtopihuë' pëntonacaiso'. ²⁹ Naporo chachin shonca huaranca pochin moaporo'sa tëpapi. Chiniquën, quëmapi'sa nipisopita co a'naya tëranta nicha'ëpihuë'. ³⁰ Naporo quëran huarë' israiro'sa, Moad, hua'anëntërin. 80 pi'ipi israiro'sa noya, ya'huëantapi. ³¹ Aod piquëran, Anat hui'nin Samgar, itopiso', ina ya'huërë hua'an, ya'coantarin. Inaso' saota pasa filisteosa ahuëaton, tëparin. Ohuaca ohuanpiquë ahuëaton, napotërin. Inarinta Israiro'sa, nicha'ërin.