¹ Yaarigo Merkizeediki, omukangati wa Saleemu, mukyeru we Eryoobha wuno ariguru mwisaaro, wuno yasikeni na Abrahamu ahakyora okureka okwita abhakangati akamuha orubhango. ² Abrahamu akamuhana kimwe kya kwikumi kubhigiro bhino ahabha abhogotiri mwihi. Eriina ryaaye "Merkizeediki" eheene yaryo "Omukangati we eheene." hateego "Omukangati wa Saleemu" yoosi ni "Omukangati we eheene". ³ Atana wise, atana nina, atana abhibhuri, atana bhwemero bhwo rusiku no obhuteero bhwo obhwikari bhwaye. Kweego arasaaga kubha mukyeru we eng'aana ye Eryoobha kirakeego kyo omwana we Eryoobha. ⁴ Bhoono iseega kyeego omutuuno yaari woomukuno. Omwibhuri weetu Abrahamu akamuhana kigiro kimwe kye erikumi kye ebhigiro ebhizomu bhino yagegiri mwihii. ⁵ Eheene, oruganda rwa abharawi bhano bhagegiri ezinyumba zyee ekikyeeru zya amahokeryo ge eng'ana ya Eryoobha bhahabha neerihatike kurwa ku-makumiriryo go okukumania yimwe yeerikumi kurwa kuubhatu, nayo ni kurwa ku Abhaisraeri abharikyaabhu, kwookubha bhosi ni ruganda kureka ku Abrahamu. ⁶ Nawe Merkizeediki, wuno ataari na oruganda kurwa kubharawi, akagega yiomwe yeerikumu kurwa ku Abrahamu, na akamuhaka orubhango, ewe wuno yaari na obhurage. ⁷ Hayo etakwangwa kubha mutu muusuuhu arahakwa orubhango na omukuru. ⁸ Kweeng'ana yino omutu wuno akagega yimwe yerikumi arazakukwa rusiku rumwe nawe kuung'ana eyindi wumwe wuno agegiri yimwwe yeerikumi ku Abrahamu ekaragiriribhwa kya wuno akubhaho kirakeego. ⁹ Na kweetemwa ya aokurwaza, Lawi wuno yagegiri yiomwe yeerikumi kweki akariha yimwe yeerikumi ku Abrahamu. ¹⁰ Kwookubha Lawi yaari mubhibhono bhya wise wabhu Abrahamu kwibhaga Merkizeediki hano yasikeni na Abrahamu. ¹¹ Bhoono aribha obhuhikirirya bhukanagika kwoo okuhitira obhukyeeru bhwa Lawi, (kwego iyaasi waye abhatu bharikirirya amakumiriryo). ¹² Kweego obhukyeeru, bhuriiza kwikyora na amakumiriryo ghosi garikyoora. ¹³ Kuumwe wuno amang'ana gano gakagaambwa iguru we ehamati eyindi kureka kwewe atareho wuno akahokya emirimo gya mwisengerero. ¹⁴ Bhoono ni mwaasi kubha Taatabhugya wetu akarweera mu-oruganda rwa Yuda; Oruganda runo Musa ataruhayiiku iguru abhakyeeru. ¹⁵ Na gano tukugamba garimwasi kwookubha omuseengeri owuundi araza okusimuka kweekirengyo kya Merkizeediki. ¹⁶ Omusengeri wuno omuhya ataei wumwe wuno abheri musengeri iguru woobhemero bhwa amakumiriryo gano gakugya hamwe no obhwibhurwa bhwo oomutu , nawe ighuru woobhwemero bhwe ezinguru zya kirakeego yino etakusarika. ¹⁷ Kweego amakaamo gakwerekenia iguru waye: "Awe ni omusengeri kirakeego hana eribhaga rya Merkizeediki rirahite. ¹⁸ Kwookubha amakumiriryo gano gakangatiri gakatuurwa embarika kwookubha gaahabha manyaaku nago gataari amzomu. ¹⁹ Kweego amakumiriryo gataakoriri kyokyosi kyeego yekwenderwa. Nawe bhwari bhureho obhusubhesubhe obhuzomu kuubhuyo turamwisukirirya Eryoobha. ²⁰ Ne ekisubhesubhe kino kizomu kitasimukiri kwo okutama okubhaho amakerenio gookurya emuma; Kuurino abhasengeri abhaandi bhatagegiri hamwe akurya emuma yoyosi. ²¹ Nawe Eryoobha akagega emuuma kwibhaga rino akagamba iguru wa Yeesu, Taatabugya ariri emuuma atakukyora amang'ana ga amiseego gaye. Awe ni musengeri kirakeego. ²² Kuurino Yeesu wosi yiziri kwa dhaman yo ubhurage bhuzomu. ²³ Kweehene, oruku rurahibhira abhasengeri kusengera kirakego. Rino ni kwookubha bharibhareho abhasengeri bhaaru wumwe no owundi. ²⁴ Kwookubha Yeesu arikara kirakeego, obhusengeri bhwaye bhutakwikyoora. ²⁵ Kweego ewe aranagya kwo obhuhikya no ubhuhikirirya kubhaturya bhano bhakumwisukirira Eryoobha kuhitira kwewe, kwookubha ewe areho kira keego kwa okusabha kwiighuru yabhu. ²⁶ Kweego omusengeri wo obhugungo bhuno arenderwa kunetwe , wuno atan ebhibhi, isaryo, muzomu wuno aturirwe embarika okurwa muubhakori bhe ebhibhi, na abheri ighuru kuhitira erisaaro. ²⁷ Ewe atahabha na bhwendi, ekirengyo kya abhasengeri bhoobhugungu, okusarya omukemba kira keego, kwe ebhibhi bhyaye, na kuubhibhi bhyaabhatu akakoreego rumweego kuubhosi, hano akirusya ewe omwene. ²⁸ Kwoobhukumirirya arabhasora abhatu bhayaku bhabhe abhasengeri bhoobhugungu, nawe eng'ana yeemuma, yino akaza okurusyaho obhukumirirya, akamsora omwana, wuno akakorwa kubha mweru kirakeego.