¹ Obhusegi bhwa abhahiri bhugendererye. ² Mtaza kwebha kurutya abhagini, kwokubha abhandi bhaginihiri Maraika bila kumenya. ³ Ohite bhosi bhano bhari mukibhohe kyabhu mwanganabho, kwokubha emibhiri gyenyu gikahokeribhwa kya nebho. ⁴ Obhuteti bhusukwe na bhoosi, obhuriri bhwa abhateti bhubhe no omurembe, kwookubha Taatabhgya araza kubhatinira athatungiri naabhasebheti. ⁵ Ezizira zyenyu zya amagendereryo zibhe mwasi kubhusegi bhwe ezihera mutoseke na bhino munabhyo, Taatabhugya omwene akabhuga ntakubhatiga na kubhasukirikanya. ⁶ Tutoseke tugambe kwa kwihema; "Taatabhugya ni musakirya wane, ntakwobhoha omutu arankorabhwii?" ⁷ Mubhisegere bhano bhaukangatiri, bhano bhakerenye eng'ana ya Taatabhugya kuneetwe, muhite amang'ana goobhugendererya bhwaabhu; Mwege obhwigumiriirya bhwabhu. ⁸ Yeesu Kristo niwareero, niizo, nakira ego. ⁹ Otaza kukangaatwa nabhwegibhwa bhwa haarya na hano, bhwa abhagini, ni bhuzomu kubha omwoyo gwoombokwe kwa rubhango na etaari kwa hamuuri kubhyakurya gayo gatakubhasakirya kubhaano bhwa kwikara na gaayo. ¹⁰ Tuna amasengerero gano bhaano bhakwimererera munyumba, bhatakwendeerwa bhaarye. ¹¹ Kukubha amanyinga ge ezityeenyi, zino zirusiibhwe kubhuhokya bhwa amabhi, zikareetwa no omukangatio omukuru ahagiro ahahoreeru, nawe emibhiiri gyaabhu gikokiibhwa igutu we erisengereero. ¹² Kwokubha Yeesu akanyaka igutu weekiseku kyo omugye, nookubha na omurembe abhatu bha Taatabhugya kuhitira amanyinga gaye. ¹³ Tugeende owaaye igutu weenyumba tuzigegiiri ezihera zyaaye. ¹⁴ Kwookubha tutana bhwikari bhwa kimera mumuugye muno, bhoo twendeere omuugye guuno guraaza. ¹⁵ Kuhitiira ku Yeesu murenderwa kira ibhaga kwiruusha mheero gwo okumukumya Taatabhugya kwo okumukumya kubha amang'ana gamuninwa gyetu garikiriirya erina ryaye. ¹⁶ No otaza kweebha kukoora amazoomu, nookusakiranya abheene kwaabheene kwokubha ebhirusiibhwa bhya kwisengereero ego Taatabhugya arabhe no obhuzomereerwa. ¹⁷ Mukyoore, mubhahigamiire abhakangati bhenyu, "Kwookubha bharagendererya kubhariibha kumang'ana geebyu kyabhurya bhano bhakurusya obhubhari, mubhatiganire abhakangati bhenhyu bhanagye okubhimerereera". Netari kwa kuruguura, yino etakubhasakiirya. ¹⁸ Twisasame, tuna obhuhene kubha, tuna amahokya amazoomu, turarohererya okwikara mumagendereeryo mazomu kuumang'ana goosi. ¹⁹ Mwosigo ndabhatera erigina munda mukore gayo, kwokubha ndakyoora bhwangu kweemwe. ²⁰ Taatabhugya webhiigongi, wino yabharetiiri kweeki, kureka kuubhaku, omwimerereeri omukuru wamang'ondu omuturya wetu Yeesu, kumanyinga go obhuhoru bhwee ekimera. ²¹ Arabhaha obhunagya bhwa kira eng'ana nzomu kuumega gaaye, arakora emirimo kunetwe emizomu mumeso gaaye, kuhitiraYeesu Kristo, kunewe bhubhe obhooru bhwa ekimeera neekimeera. Nebhego. ²² Boono ndakwoongeera erigina munda, bhahiri kugegerena ering'ana yookwongera erigina munda, rino rikakamwa kiguhi kunetwe. ²³ Menya kubha, omuhiri wetu Timitheo ahatirwe mwasi, wuno hamwe nawe ndabharora hano akuuza kwibhaga rino. ²⁴ Kerya abhakangati bhazo bhoosi, na abhanyanyangi bhoozi bhano bhakureeka Italia bharakukeerya. ²⁵ Orubhango rubhe na neemwe mwoosi.