¹ Kukurwa koghano naroshe abhanto abharabhu bhaimereye koshembara inye ghiikyaro mbaakaneri emekama enne ghiikyaro, kwangekobhaho nomokama ghono ghukuhuta mukyaro, na kighoro yinyansha labha komote ghoghonse. ² Nkamaha omonto omorabhu omwe arasha kukurwa roghoro, ono yarenga nomobhaaso ghwa Waryobha omohoru. Akakura inkubha enene kobhanto abharabhu bhanne bhano bhahaywe umweya gokosarya ikyaro na inyansha. ³ Motakasarya ikyaro, inyansha, hande emete kokohekera hano torebhatoora emebhaso kubhusyo bhwe emetwe ghyabbhakori bhemeremo bha-Waryobha weto. ⁴ Nkaighwa ubhwaru bhwa bhanra bhabhasirwe 144,000, bhano bhabhasirwe kukurwa kobheghambo bhyabhanto bha-Israeli: ⁵ 12,000 kukurwa kokeghambo kya Yuda mbabhasirwe, 12,000 kukurwa kokeghambo kya Rubeni, 12,000 kukurwa kokeghambo kya Gadi. ⁶ 12,000 kukurwa kokeghambo kya Asheri, 12,000 kukurwa kokeghambo kya Naftali, 12,000 kukurwa kokeghambo kya Manase. ⁷ 12,000 kukurwa kokeghambo kya Simioni, 12000 kukurwa kokeghambo kya Lawi, 12,000 kukurwa kokeghambo kya Isakari, ⁸ 12,000 kukurwa kokeghambo kya Zabuloni, 12,000 kukurwa kokeghambo kya Yusufu, na 12,000 kukurwa kokeghambo kya Benyamini mbabhasirwe. ⁹ Kukurwa komang'ana ghayo naroshe rikomo rinene reno omotnro wowonse atakatore koreghera, kukurwa kera ikyaro, ekeghambo, abhamwe nebheghambo: Bhaimereye kobhoronge bwikitumbe kyobhokoro na kobhoronge bhwa omona waring'ondi! Marenga bhaibhohire engansho endabhu na mbarenga namatanghara ghemetende momabhoko ghabho. ¹⁰ Mbabherekeranga kurikubha yakighoro: "Okooribhwa nukwa Waryobha ono yikaye kukitumbe kyobhokoro na komona waring'ondi!" ¹¹ Abhanto abharabhu bhonse mbarenga bhaimereye kwinara ikitumbe kyobhokoro nukwinara abhaghaka na abhahoru bhanne, bhakahighama hanse na bhakatoora ubhusyo bhwabho kighoro yikyaro kobhoronge bhwikitumbe kyobhokoro na bhakaighombeerya kuwaryobha, ¹² Bhakaghamba, "Na ebhiigho! Okotonibhwa, obhong'ore, obhomanyi, ubhukumya, esoko, nobhotooro bhwa shinguru bhebhe kuwaryobha netonsiko syonse na nsiko syonso! Na ebhigho!" ¹³ Gwiki omoghaka omwe akamboorya, "Bhano mbabhong'we bhaibhohire engansho endabhu, na hayi bharure? ¹⁴ Nkamoteebya, "Tata omonene, nuwe omanyire" Gwiki akanteebya, "Bhano mbaara bharwa kunyanko insharu. Mbogheri sengansho syabho nokosekora sendabhu komanyinga ghomona wa ring'ondi. ¹⁵ Kuigho mbarenge kobhoronge bhwikitumbe kyobhokoro ikya Waryobha, nabharaighombeerya omobhaso nubhutiko kurisengeero ryaye. Umwene ono yikaye kukitumbe kyo bhokoro naranyaraghani righambero kighoro yabho. ¹⁶ Tebhamahe inshara gwikihe, na inyontahe, iryobha terebhasambehe, na temorongorehe. ¹⁷ Kobhono omona waring'ondi ono yikaaye kukitumbe kyobhokoro narebha umoresya wabho na narebhatangata kobhesekani hya amanshe ghobhohoru, na Waryobha naryeya kera amaisori komaiso ghabho."