¹ Sauri wanyore bhaikeereeryania uruku rwaaye. Urusiko ruuyo ndo yashakire kobhanyaankya riseengeero reeno ryaare Yerusalemu; na abhaikeerya bhoonse bhano bhanyaraghanera mo seng'oongo isya Yedea na Samaria, kutigha abhantomwa. ² Abhanto bhano bhakukumya Waryobha bhakamobheka Stefano na bhakakora uruku rwaaye roneene. ³ Kose Sauri akanyahara bhokong'u riseengeero. Yayaanga inyumba ku inyumba arahorotoora kebhara abhakari na abhashasha, na kobhahira mwigereza. ⁴ Abhaikeerya bhano Wanyore bhanyaraghaini mbaghendereei kuraghaania eng'ana. ⁵ Filipo akaitoomera mumughi ghwa Samaria na akamoraghania Kiristo iiyo. ⁶ Hano rikomo bhaighuure na bhakamaaha ebhemanyeeryo bheno yakoore Filipo bhakaanga raara ko keera yaghambire. ⁷ Kuukurwa hayo abhaanto abhaaru bhano bhaighuure, emesambwa emeghogho ghekarwa abhaanto eno bharakuura ko-engamba enene, na ahaaru bhano bhamitira na abhabheru bhakahweenibhwa. ⁸ Ghokabhaho umusheengo omonene mu-umughi. ⁹ Kose yaareho omoonto omwe mu-umughi ghuuyo arabherekeerwa Simoni ono yaare kokoora ubhuturutumbi; bhono yakoore akabharooghoorya abhanto bha ikyaaro ikya Samaria, enkagha yaghambire igha we omoonto umuhiika. ¹⁰ Abhasamaria bhonse kuurwa ko omohe kuyako omonene bhakamwitegheera bhakaghaamba. " Omoonto oono nsi nguru seera isya Waryobha seno sereenge senene." ¹¹ Bhakamwiteegheera ko bhoora yabharooghoori nsiko nshaaru ku-ubhuturutuumbi bhwaaye. ¹² Kose hano bhakumiiri igha Filipo yaraghaneeri ko obhoneene bhwa Waryobha na Kurina irya Yeesu Kristo bhakabhatisibhwa abhashasha na abhakari. ¹³ Na Simoni umweene akakuumia hano ya hooye kubhatiisibhwa akagheendeerya kobha na Filipo hano yarooshe ebhemanyeeryo na ebheroghooro bhenobhyaikoraanga akaroghoora. ¹⁴ Enkagha abhatomwa bha Yerusalemu hano bhaighuureigha Samaria inyoore eng'ana iya Waryoobha bhakabhatoma Petero na Yohana. ¹⁵ Enkagha eeno bhaitumanga, bhakabhasasamera igha bhanyoore enkoro ehooreru. ¹⁶ Ukuhika enkagha iyo enkoro ehooreeru tiyaare araaheekera kuura oomwe wabho he, bhareengeaigho bhabhatisibhwa ju irina irya Omonene Yeesu. ¹⁷ Nho Petero na Yohana bhabhatooreeye amabhoko bhonse bhakanyoora enkoro ehooreeru. ¹⁸ Enkaagha Simoni hano yaarooshe igha enkoro ehooreeru anyoorwe kokohetera okotoorwa amabhoko na abhatomwa akahana kobhahaana gheheera. ¹⁹ Akaghamba, " Mong'ane inguru eeno ono wonse ndatoore amabhoko anyoore enkoro ehooreeru. ²⁰ Kase Petero akamoteebya ehera yaaho na uuwe emwene bheseere haare, Koo-bhoora nkokanyoore igha obhong'oore ubhwa Waryobha moseheera bhukurweera. ²¹ Toona ahase kong'ana eeno ko bhoora omoyo ghwaaho teghoreenge mooronge ko oronge bhwa Waryobha. ²² Igho bhoono highama amaghogho ghaaho na okosasama Waryoobha hanga uryaabheerwa amaitegheero agha omoyo ghwaaho. ²³ Ko-bhoora ndamaha oreenge mu-rirogho irya obhororo na mokebhoohe ikya ebheebhe. ²⁴ Simoni akahonshora akaghaamba momosasame omonene ku- ukughira oni, ko-bhoora amang'ana ghoonse ghano mushumashiire gharatoora kohoionyookera. ²⁵ Enkagha Petero na Yohana na okoraghaania eng'ana iya omonene, Bhakyoore Yerusalemu ko-enshera iyo. bhakara ghaania eng'ana mu ibhishishi ibhyaaru ibhya abhasamaria. ²⁶ Omoraabhu uwa omonene akaghamba Filipo akaghamba, " Syoomeerya na ogheende ghoosi ko enshera eno ekoghera nse iya Yerusalemu kogheera Gaza" ²⁷ Akamaghamagha na akaya. Maana yaareho omoonto uwa Esiopia umushasha ono atakweeebhoorya ono aana obhotoonge obhonene haanse iya kandase, omomarikia uwa Esiopia, ono yatoorwe kighooro emongo yaaye yoonse wonse wanyoore agheeye Yerusalemu koseengera. ²⁸ Yakyooranga yikaaye momatooka yaaye areenge eketabho ikya omoroti Isaaya. ²⁹ Filipo akaya arakeenya akamwiighwa areegha eketabho ikya omoroti Isaya akaghamba, " Ighaa omanyiire keeno ukweegha? ³⁰ Umwisiopia akaghamba, " Iyeke ndatore omonto atantangatiire? akamosasama Filipi ariine momatooka yikare hamwe nawe. ³¹ Umuethiopia akaghamba, na Filipo, " Suuntara haang'i na emotooka eno wighooteeriko." ³² Bhoono rihuuntu irya amang'oring'rori ghano yeeghaanga Umuesiopia ndyo reeno, " Yaangatiibhwi kyaa ring'oondi kuyaa kughooghwa mwighooghero. Kya ring'oondi yakiire kiri tiyaanaanoye munywa ghwaye he. ³³ Ko - Okoreeribhwa kwaaye ekebhoohe kyaaye kekarusibhwaho nnawe areteebhya oroghanda rwaaye? Okomenya kwaaye kwarusibhwaho muukyaaro." ³⁴ Umushasha ono takweebhoorya akamobhoorya Filipo akaghaamba, "ndakosasaama, Mmorootike akushumaasherwa amang'aana ghaaye nu we kose nga omonto woonde? ³⁵ Filipo akashaka kushumaasha akatangata na ring'oring'ori reeno irya Isaya komoraagha neerya amang'ana agha Yeesu. ³⁶ Bhakereenge koonshera bhakahika haano amanshe ghare umushasha ono ataakweebhoorya akaghamba," Maana hano amanshe nhooghare nke kekoreebheera naange kobhatiisibhwa?, ³⁷ Amang'ana ghano, " hayo Umusiopia akahoonshora, " Ndaikeerya igha Yeesu Kiristo no omoona uwa Waryobha" ( Teghareenge momang'oring'ori gha makoorahe). Nho Umuisiopia akahaneerya amatoka yimeere. ³⁸ Bhakaya moomanshe monse hamwe na Filipo na umushasha ono atakwebhoorya Filipo akamobhatiisya. ³⁹ Hano bharuure moomanshe Roho wa Omonene akamuhiira Filipo haare umushasha ono atakwebhoorya tiiyamorooshehe, akagheera enshera yaaye arakiriirya. ⁴⁰ Kose Filipo akahonyookera azoto, akaheta mo orong'ongo roora araraghanua eng'ana ku imighi ghoonse kohekera Kaisaria.