¹ Paulo, omotomwa wa Kiristo Yeesu, koreng'ana na ubwamori bhwa Waryobha nomotungurya weito Yeesu Kiristo omokare weito. ² Timotheo omona wane wobhoheene, kubhukumya: omorembe, ikyabhero, nobhohoru bheno bhikurwa kuwaryobha taata na Kiristo Yeesu Omonene weito. ³ Kyabhono nakoragheereyi hano natanoye kuya Makedonia, utighare Efeso oragheeri abhanto bhatakeeghya ameghyo ghokokerana. ⁴ Gwiki bhatakaitegheera amaghano ghano ghatana umuhiko, ghayo nkoreta ghare sehakano seno setakoghendeerya kotorya ling'ana rya Waryobha irya ubhukumya. ⁵ Kuigho obhoragheerya bhono nobhoghonshe bhono bhukurwa konkoro endabhu, nakobhomanyi ubhuya nakubhukumya bhobhohene. ⁶ Abhanto bhande mbatighire amaragheeryo nabhakaisyorya amashumasho ghekekangi. ⁷ Bharatuna kobha abheghya bhumughiro, kenobhakwitegheera nakenobhakoghamba tebhake manyire he. ⁸ Okobha ntomanyire umughiro muya hano omonto araghotomere kobhohene. ⁹ Ntomanyire igha, umughiro tighwaretirwe komonto omohene he, nkyarentirwe kobhasarya abhimighiro nabhano bhiyahora, abhasarya nabhano bhatana Waryobha nabhaghogho. Yatorwaho kobhano bhakwita bhasu wabho nabhanyakuwabho, kobhaiti. ¹⁰ Yaretirwe kobhasono na kobhanto abharaya, kobhara bhakoghota abhanto nokobhakora abhatomwa, kobha rongo kobhano bhakwimerera abhorongo na ono wonse akwigharanshora amaragheeryo ghobhoheene. ¹¹ Amaragheeryo ghano nkurwa ghare ku-injili eno yena obhong'ore bhwa Waryobha ono yabharekeywe nukwikereribwa. ¹² Ndakumya Yeesu Kiristo omonene weito. Ono yang'aye singuru kokobha yamghere kobha omwohene. ¹³ Nalenga omonto wokosarya, omotemo wa abhande numutindi, okobha nanyoore amaabhe kobhono nakore kobhokangi na kobhono ntaikereyi. ¹⁴ Okobha omorembe gwa Waryobha weito ngwishoye ubhukumya, nobhoghonshe bhono bhorenge ku-Kiristo Yeesu. ¹⁵ Ekeka keno nkyabhohene nakeratakerwa kwikereribhwa nabhonse kobha igha Kiristo Yeesu yishire mukyaro kotoorya abhasarya. ¹⁶ Okobha kubhuyo oni nahaywe ikyabhero, nakubhuyo monse yane Kiristo Yeesu umwoghomeerya, umworokibhwa. Yakore igho kwiyorokya kobhano bhakumwikerya kobhohoru bhwa shinsiko syonse. ¹⁷ Na bhono omokama ono atana umuhiko, ono atakukwa, ono atakomahekana, Waryobha umwene, ebhe igho obhong'ore netemo inshiya nsiko syonse. Naebhigho. ¹⁸ Omona wane Timotheo, ndareta ling'ana reno mbere yako ndakora igho kobhono obhoroti bhwa rusibbwi kuuwe oghende kuri-he-iriya. ¹⁹ Kora-igho unyoore ubhukumya nobhohene ubhuya, abhanto bhande mbangire ghano bhakaita ubhukumya. ²⁰ Kyabhono Himenayo na Alekizanda bhahaywe lisambwa lebhorokeri bhatakasarya.