¹ muye mwe ya ku nkonchelela nene, ngati vino nani ne mu konchezi wakwe Kilisitu. ² Nomba inku walumba umulandu wakuti mukanjizuka muli vyonsi. Inkuwalumba umulandu wakuti mu mukasunga inthambi ngati muno nazipelile kuli mwemwe. ³ Nonba inkulonda muchimanye ukuti Kilisitu u mutwe wa monsi wensi, ukuti umonsi umutwe wa mwanachi, nu kuti Leza umutwe wakwe Kilisitu. ⁴ Umonsi wensi wino akapepa pamwi akasesema ndi azwazile chimwi ukumutwe akasonzya insonyi umutwe wakwe. ⁵ Kwene umwanachi wensi wuno akapepa pamwi akasesema ukwawula ukuzwala chimwi ukumutwe wakwe akasonzya insonyi umutwe wakwe. Amuno ichilichimwi nu kutiapezile umutwe wakwe. ⁶ Amuno umwanachi ndi atakuzwala kumutwe wakwe, aputule inyele zyakwe zifupike ndi ichansonyi ku mwanachi ukuputula inyele zyakwe pamwi kuli weliwe ukupela umutwe wakwe, a zwike umutwe wakwe. ⁷ Umonsi atazwika umutwe wakwe, amuno ichikozyo nu wuchindami wako Leza. Kwene umwananchi uwuchindame wa monsi. ⁸ Pakuti umonsi atapanzilwe ukufuma uku mwanachi. Lelo, umwanachi wapanzilwe ukufuma ukumonsi. ⁹ Nu kuti umonsi atapanjilwe umwanachi. Lelo, umwananchi wapanjilwe umonsi. ¹⁰ Chii achino umwanachi alingine ukuya ni chimanyilo cha nsambu pa mutwe wakwe, umulandu wa yangele. ¹¹ Insichamachitiko, muli mwene, umwanachi a nsuwa kwimilila pali wenga ku monsi, pawi umonsi asi pali wenga ku mwanachi. ¹² Pakuti ngati vino umwanachi wafumila ku monsi, avino nu monsi wafuma ku mwanachi. Ni vintu vyonsi vikufuma kuli Leza. ¹³ Muyilonge pali mwenga: wuzye ichizima ku mwanachi pa ku pepa kuli Leza ukwawula ukuzwika umutwe wakwe? ¹⁴ Wuzye ichipapilwa chitupu chitakuwasambilizya ukuti umonsi ndi ali ni nyele izitali, ichansonyi kuli weliwe? ¹⁵ Wuzye ichipapilwa chitupu chitakuwasambilizya ukuti ndi umwananchi ali ni nyele izitali, uwuchindame wakwe? Amuno inyele zyakwe zyapelwa kuli weliwe ngati ichakuvimba. ¹⁶ Kwene ndi wumwi akulonda ukususya vyako chii, tusi ni sambilizyo lyuze, ni ng'anda zya mapepo zyakwe Leza zitakweti. ¹⁷ Kwene pa kulondolola kuno kukukonkapo, intama walumba. Pakuti ndi mwakongana, lino nsapachizima kwene pa chiyipe. ¹⁸ Amuno pakutalika, nuvwile ukuti ndi mwakongana ponga umu n'ganda yakwe Leza, pali ukupawunkana pali mwemwe, nu kuti muli vimwi inkuchisuwila. ¹⁹ Pakuti kulingine ukuya ukupawunkana pali mwemwe, ukuti yano yakuzumilizwa yalolechele pali mwemwe. ²⁰ Pakuti ndi mwakongana ponga, insi chakulya chakwe Mwene chino mukulya. ²¹ Ndi mukulya, aliwensi akulya ichakulya chakwe weliwe wenga pano ayawuze yatani yalye ichawo. wumwi ali ni nzala, na muze akaya umukoleke. ²² Mutakwata aman'ganda aya kulilamo nu kun'gwelamo Wuzye mukunyoza in'ganda yakwe Leza nu kuwapepula yano yasi nanthichimwi? Nimavwanga chani kuli mwemwe? Wuzye nimawalumba? Intamawalumba pali chii! ²³ Pakuti napochile kuli Mwene chino nani napile kuli mwemwe, ukuti Mwene Yesu, uwusiku pano walemekwanga, watozile umukate. ²⁴ Watili wasalifya, wawumonywile nu kuti, '' wu umwili wane, wuno uwakwinu. Mwachita chii pa kunjizuka.'' ²⁵ Ichilichimwi watozile ichikombe lino yalya ichakulya cha manguzi, watili, '' Ichikombe chi ichipangano chipya mu wazi wane. Chitanji chii kasita wensi ndi mwala mwamwa, pa kunjizuka.'' ²⁶ Pakuti insita yonsi ndi mukulya umukate wu u nu kumwa ichikombe chii, mukutanda imfwa ya mwene mphaka pano alizila. ²⁷ Alino, wuno, akulya umukate pamwi akumwa ichikombe cha Mwene mu nzila iyawula ukuyana ningo ala yembuchila umwili nu wazi wakwe Mwene. ²⁸ Umuntu ayisande wenga, munzila yikwene alye ivya mukate nu kumwa ivya chikombe. ²⁹ Pakuti wino akulya nu kumwa ukwawula ukuwiluka umwili akalya nu kumwa uwupinguzi kuli weliwe. ³⁰ Achino ayavule pali mwemwe ayafoke nu kulwala, na yamwi pali mwemwe yakaswile. ³¹ Kwene ndi twayisandulula swenga, tutalapingulwa. ³² Kwene ndi tukupingulwa nu mwene, tukusundwa, ukuti tutasulwa ponga ninsi. ³³ Achino, yakundwe, ndi mwakongana pakulya, mwalindililana. ³⁴ Ndi wumwi ali ni nzala, alye ukung'anda, ukuti ndi mwakongana ponga chitize chiye ichawupinguzi. Na vyako vyuze vino mwawalike, indawalondolwela ndi niza.