¹ 1 Odehe Joseph Pharao niha thandada thiba, “Ani Abai ode ani buphlungthu , ode bonsini dongbasi khe labuhi Canaan raji niphrang phailakha. Nai, bonsi Goshen raji ha phaihi dong.” ² Bo boni daphlung bwa khe langhi Pharao niha phunuhi tharmailairiba. ³ Pharaoh bonsi khe shingba, “Nisila nadi khusi dangre?” Ar bonsi Pharaoh khe thiphinba, “Nini lengthude melma raokhiyarao se, jini bupa bujuraolaining jingbo melma raokhiyarao se.” ⁴ Bonsi Pharaoh khe thiba, “Jingde phungsi dongdamane sening ebo haphai ha phaiba. Canaan raji hade asari raohi, nini lengni melma buthune saam jimane girikha. Khasaohi nini lengthukhe Goshen raji ha dongri.” ⁵ Odehe Pharaoh Joseph khe thiba, “Nini bupha ode nini daphlungrao nini sophaikha. ⁶ Egypt nini sagang ha dong. Nini bupha ode daphlungrao khe hamdaothao yaba haphai, Goshen raji ha donglathing. Odehe sereba mi naisoyaba blaiyaba dongkhade , ani mi-melma khebo naisothing. ⁷ Odehe Joseph boni bupha Jacob khe Pharaoh niha phunuhiba. ⁸ Jacob Pharaoh khe hamthai riba. Pharaoh Jacob khe shingba: “Ningla bislai rakha?” ⁹ Jacob Pharaoh khe thiba, “And dongyabade Rajasi thimzi. Ani hayu de bangya ode dukhu ni hayu se. Angde ani ajuthulaide rayakho.” ¹⁰ Odehe Jacob Pharaoh khe hamthai rihi Pharaoh dongyaba niphrang thanglaba. ¹¹ 11 Odehe Joseph boni bupha ar daphlungrao khe Egypt ni hamdaothaoyaba haphai ha dongriba ar hah riba, Pharaoh sanibalaining Rameses ni hah ha dongriba. ¹² Joseph boni bupha, boni daphlungrao khe ar khrip nokhor khe ar nana buthu khe dongbasikhe naihi makham ronba. ¹³ Ar boni haphai ha, asari bothor jabani makham jimane girihi dongba. Egypt raji ar Canaan raji ha jabani raingphatharba.

¹⁴ Joseph bo haphai ha dongyarao khe mai phainghi Egypt ar Canaan raji ni khrip rang khe bojomba. Odehe Joseph bo rangkhe Pharaoh ni dongthanha labuba. ¹⁵ Bakhali Egypt ode Canaan ni rang yawaitharhi jamtharkha, Egypt ni subung buthu Joseph niha phaidada thiba, “Jingkhe makham ri. Jini rang jambani jing sumjabani maijiyahi thima nangma nini sagangha?”

¹⁶ Joseph thiba, nisini rang jamkha thikhade, nisini dao-mi khe mai braislaima ne labu, ode ang nisine mai rinang.”

¹⁷ Odebani bonsi Joseph niha bonsini dao-mi khe labuba, Joseph bonsine, gorai, melma, mi ar mileng ni baslai mai riba. Dao-mi ni baslai bonsikhe hon jirikha. ¹⁸ Maithai jambaha, maithaisi jambani yahonha bonsi boniha thiba, “Jini rang jamthar thihi ebo grao khe nini niphrang huiya. Jini dao-mi dongbasi khrip jini bobra gedema ni jatharkha. Duhade nini muthai sgang ha jini saomang ar jini hah khe garhi musibo girikha.

¹⁹ Jing ar jini hah, sumjabani nini muthai sagang ha thima nangma? Jingkhe ar jini hah khe mai ni baslai barai la, odehe jing ar jini hah Pharaoh ni leng jahi dongma. Jingkhe bumuh gaimane bumuh ri, hah hakhma jayamane. ²⁰ Odebani Joseph Egypt ni khrip hah khe braitharlaba. Sumjabani thikhade khrip Egypt ni subung buthu asari jabani hah phaingjitharba, ode khrip hah Pharaoh ni jatharba.

²¹ Odehe subung buthu khrip khe Egypt ni ejang nar niphrang oajang nar sosi bo leng slamtharba.

²² Hah baraiyahi thaoyabade jonthaima ni hah sening thaosiba. Sumjabani thikhade Pharaoh jonthaimani khlaihi saingruji rire. Odebani jonthaima hah phaingjiyakha. ²³ Odehe Joseph subung buthu khe thiba, “Nai, nisikhe ar nisini hah khe Pharaoh ne phantha ang braikha. Ge eraha bumuh dong, ebokhe hah ha gai.” ²⁴ Mai rablaihi, Pharaokhe phantha bwa ha phantha bri de nisini phantha dengla bumuh gaiphinmane ar nini nokhor ode nini basa basa nana buthu ne deng. Thikha Phanthasi de Pharaoh ni se jama. ²⁵ Bonsi thiba, “Ning jini hayu sogoba, Jing nini muthai rogong ha khasaoma maithing. Jing de Pharaoh ni leng jahi dongma se.”

²⁶ Odebani Joseph thiba, phantha bwa ha phanthasi de Pharaoh ni jama thihi dara slamba, bo dara dini sosi yawaidu, jonthaima ni hah khe garhi khrip Pharaoh ni hah jatharba. ²⁷ Ode Israel Egypt ni haphai ha, Goshen raji ha dongba. Boni subung, hah noh ni bobra jaba. Bonsi yerdau yerdau hi gabangning banglanglakha. ²⁸ Jacob Egypt ni haphai ha maithai zisni dongba, Odelaining Jacob maithai jang rajashibisagni maithaisni rakha. ²⁹ 29 Bakhali Israel hapsau garma ne bubli sophaikha, bob oni basa Joseph khe longhi thiba, ang nini muthai rogong ha khasaoma maijaokhade, nini yaokhe ani yaphong bakhla ha denghi lonjaoyaba jala. Angkhe Egypt ha daphip. ³⁰ Bakhali ang hapsau garma ning angkhe Egypt niphrang langhi ani ajuthu phipjaoyaba hathanihase angkhe phip. Joseph thiba, “ning sanibalaining ang dangma.” ³¹ Israel thiba, “Smai dang,” ode Joseph boni ha smai dangba. Odehe Israel boni thuthani bokhro gede khlimba.