¹ Jezǔ ylɔ́ ahwanvǐ étɔn wyáwe lɛ́ɛ kplí, bo ná acɛ wú yě, ná yě ná dó nya oyɛ nyinylǎ lɛ́ɛ, bo nǎ nɔ́ gbɔ̀ azɔn lɛ́ɛ kpókpó, kpó onǔgblélémɛwǔzɔn lɛ́ɛ kpókpó. ² Mɛɖǒxlán wyáwe lɛ́ɛ we nykɔ́ lɛ́ɛ ke : Jɛ nukɔn, Sinmɔ́ɔ ke ye nɔ lɛ̌ ylɔ́ ɖɔ̀ Piyɛ́ɛ lɔ̌, kpó nɔvyɛ̌ Andlée kpó; Zebedée wé ví awe, Jǎki kpó Jǎan kpó. ³ Filipu kpó Baatelemíi kpó; Tɔmáa kpó Matíe takwáyítɔ́ lɔ́ kpó; Jǎki ovǐ Alufée tɔn, kpó Tadée kpó; ⁴ Sinmɔ́ɔ kanxodotowǔtɔ́, kpó Judáa Isikaliɔ́ti ke wá sa Jezǔ lɔ̌ kpó. ⁵ Yě mɛ wyáwe éxɔn lɛ́ɛ, Jezǔ ɖǒ yě ɖóxlán bo kplɔ́n nǔ yě ɖò: Mi nɔkpɔ́n yi mɛ ke ma nyǐ Jwífu gɛ̌ lɛ́ɛ de gɛ̌, mi nɔkpɔ́n ká lɛɛ́ byɛ́ Samalíinu lɛ́ɛ wé to ɖé mɛ́ gɛ́. ⁶ Izlayɛ́li wé ví ke cí ɖi lɛ̌ngbɔ búbú há lɛ́ɛ de wɛ mi na yi. ⁷ Mi jlǎ le omɔ̌ lɛ́ɛ jí ɖɔ̀: "Axɔ́luɖúɖú Sɛ́xwé tɔ́n kó sɛ́kpɔ́". ⁸ Mi gbɔ̀ azɔn nǎ azɔntɔ́ lɛ́ɛ; mi fɔ́n omɛ kúkú lɛ́ɛ; mi gbɔ̀ azɔn nǎ gudunɔ lɛ́ɛ, bo bló ná yě ní trɔ́ zɔn omɛ mimɛ́; mi nya oyɛ nyinylǎ lɛ́ɛ. Lě ke un ná acɛ wú mi vɔ̌vɔ̌ ɖóo, mye lɔsú mi bo blǒ nǔ lɛɛ́ kpó vɔ̌vɔ. ⁹ Mi nɔkpɔ́n hɛn síká gɛ̌, mi nɔkpɔ́n hɛn akwágan gɛ̌, mi nɔkpɔ́n hɛn kɔ́bɔ ɖǒ bǒsu mitɔn lɛ́ɛ mɛ́ gɛ́; ¹⁰ mi nɔkpɔ́n hɛn tomeyitɔ́ wé sáki gɛ̌; mi nɔkpɔ́n hɛn afɔkpa gɛ̌, mi nɔkpɔ́n hɛn kpokpotín gɛ́; ɖó azɔ̌nwátɔ́ ɖó ná yí azɔ̌nkwá étɔn." ¹¹ Mi yi jɛ toxo ɖaxó, alǒ gletoxo ɖěkpékpé mɛ, mi kan mɛke jǒnɔ mitɔn yiyí ná nyɔ na se, bo yi nɔ éde káká yí jɛ hwe kenu mi nǎ lɛ́ sɔ́n to lɔ mɛ dó. ¹² Ényí mi byɛ̌ xwé ɖé gbe, mi ɖɔ̀:" Fífá ní nɔ xwé lɔ jí." ¹³ Ényí fífá jɛ̌ xa mɛ ke le oxwé lɔ́ gbe lɛ́ɛ, hǔn fífá mitɔn ní bó nɔ yě jí; ná é má ká jɛ̌ xá yě gɛ́, fífá mitɔn ní bó lɛ́ kɔ xodo mi. ¹⁴ Ná e ma yí mi gɛ́, alǒ e gbɛ̌ oxó mitɔn sise le oxwé ɖégbe, alǒ toxo ɖé mɛ, hǔn mi bo tɔ́n sɔ́n flɛn, bo xúxú afɔkɔ́ mitɔn. ¹⁵ Ma ɖɔ̀ xójɔxó ná mi: É wa jɛ hwɛdɔzǎn gbe, é ná kpɔ́nte ná Soɖɔ́munu lɛ́ɛ kpó Gomɔ́ɔnu lɛ́ɛ kpó xúgan oto éxɔn mɛ́ nú lɛɛ. ¹⁶ Í ke, un lê ɖó mi ɖôxlán, bɔ mi nâ cí ɖi lɛ̂ngbɔ le ohla lɛ́ɛ cɛncɛn há; mi bo ɖǒ ayi te ɖi odan há, bo fá xomɛ ɖi hwannɛ̌ há. ¹⁷ Mi cɔ́ miɖě do gbetɔ́ lɛ́ɛ wu, ɖó yě ná wá dɔn mi sɔ́ yi ohwɛ nukɔn, bo nǎ wá ɖɔ̀ hwɛ xá mi, lo bo ná ɖó obǎ ná mi le Jwífu lɛ́ɛ wé ɖɛxotɛn. ¹⁸ Yě ná wa dɔn mi yi tokpɔn gǎn lɛ́ɛ kpó axɔ́lú lɛ́ɛ kpó wé nukɔn ɖo nyɛ wútú, ná mi nǎ dó ɖe kúnnú ná un, le yě kpó mɛ ke ma nyǐ Jwífu gɛ̌ lɛ́ɛ kpó wé nukɔn. ¹⁹ Amɔ̌, hwe ke nu yě ná wá wlé mi sɔ́ yí jóo, mi nɔkpɔ́n jɛ tagba bo lě lin onǔ ke mi nǎ yí ɖɔ́ le dɔ̌n, alǒ lě ke mi na ɖɔ xó ɖó le dɔ̌n kpɔ́n gɛ́, E nǎ zé onǔ ke mi nǎ yí ɖɔ́ le dɔ̌n hwe é xɔ́n nú lɛ́ɛ dó ayi mɛ nǎ mi. ²⁰ Ɖo é má nyí mye lɔsú wɛ́ ja oxó ɖɔ́ gbé gɛ́, Oyɛ Tá mitɔn tɔn wɛ nǎ lé ɖɔ̀ xó gbɔn mi jǐ. ²¹ "Nɔvǐ ná jó nɔvyɛ̌ bo e nǎ hu; otɔ́ ná jó ovyɛ̌ bɔ e nǎ hu; ovǐ lɛ́ɛ ná fɔ́n gǔ dó mɛjitɔ́ yětɔ́n lɛ́ɛ jí bó ná zɔ́n ɖɔ̀ e nǐ hu yě. ²² Mɛ lɛ́ɛ kpókpó ná gbɛ́ wǎn ná mi ɖó nyɛ wútu. Amɔ̌ɔ mɛke nǎ dɛ le oya éxɔ́n lɛ́ɛ nu káká yi vivɔnu, e nǎ hwlɛ̌n ɛ gán. ²³ Ná e dó ya nǎ mi le toxo ɖé mɛ, mi si bo yi toxo ɖěvo mɛ. Má ɖɔ xójɔ́xó ná mi: Mi ma nǎ kó gbɔn Izlayɛ́li toxo lɛ́ɛ kpókpó mɛ fó, hwɛkpó bɔ nyɛ ovǐ gbɛtɔ́ tɔn ná wá gɛ́." ²⁴ "Nǔkplɔ́ntɔ́ ɖé mɔ́ nɔ́ hú gǎn mɛ̌si étɔn gɛ́; lěxá ké, mɛsɛntɔ́ mɔ́ nɔ́ hú gǎn ogǎn étɔn gɛ́. ²⁵ Ényí nǔkplɔ́ntɔ́ sigǎn nyɔ́ nú wi káká wá mɛ̌si étɔn há jíi, é kó kpé. Lěxá ké, mɛsɛntɔ́ ɖó ná cí ɖi ogǎn étɔn há; ɖó ná e ylɔ́ hɛ̌nnugán lɔ́ ɖɔ̀ Bɛluzebúlu oyɛ nyinylǎ xɔ́lú u, nyǐkɔ́ ke e nǎ ná oxwéví lɛ́ɛ ná lɛ́ nylǎ hú lěxá. ²⁶ "Mi nokpɔ́n ɖibǔ ná gbɛtɔ lɛ́ɛ gɛ́; ɖó onǔ ke e le wa le onǔ gɔ lɛ́ɛ, kpókpó ná jɛ agbaungba. ²⁷ Oxó ke un ɖò ná mi le zǎnmɛ, mi lɛ̌ ɖɔ́ le oklě; oxó ke un ɖekpá dó ɖɔ́ ná mi, mi jlǎ le agbaungba ná mɛ lɛ́ɛ kpó ní se. ²⁸ Mi nɔkpɔ́n ɖibǔ ná yě me ke nɔ hu agbaza, bo ma ka kpégo bo ná wa nutí ná alǐndɔn lɛ́ɛ gɛ́; amɔ̌, mi ɖibǔ ná Mǎwǔ ké ɖó acɛ bo nǎ dɔn alǐndɔ̌n kpó agbaza kpó dó zomací mɛ lɔ́. ²⁹ Otíin ma xɔ akwá ɖé gɛ́, co ɖě mɔ́ nɔ́ kú́ nɛ́ Mǎwǔ má jló gɛ́. ³⁰ Mye , oɖa ke le ota ná mi lɛ́ɛ, Mǎwǔ nyɔ́ namǔ ke é nyí. ³¹ Hǔn mi nɔkpɔ́n ɖibǔ gɛ́, ɖó mi xɔ akwá hu otíin susu." ³² «Mɛ ke nǎ ɖɔ le mɛ lɛ́ɛ kpó núkɔn ɖɔ̀ "un nyí ahwanvǐ Jezǔ tɔn", nyɛ lɔsú ná ɖe kúunú nǐ le Táce ke le sɛ́xwé lɔ́ núkɔn. ³³ Amɔ̌, ná mɛɖě gbɛ́ le gbɛtɔ́ lɛ́ɛ núkɔn ɖɔ̀ émye bó má nyɔ́ émye Jezǔ wǐ gɛ́ɛ, nyɛ lɔsú ná gbɛ́ ɛ le Táce ke le sɛ́xwɛ́ lɔ núkɔn ɖɔ̀ un bó má nywɛ̌ wǐ gbá gɛ́.» ³⁴ «Mi nɔkpɔ́n mɔ́ ɖɔ̀ fífá wɛ un hɛn wǎ anyǐzan jǐ gɛ́; fífá mɛ un hɛn wǎ gɛ́, amɔ ohǐ wɛ un hɛn wǎ. ³⁵ Ɖó un wǎ bɔ nyɛ wǔtu, ovǐ súnnu ma nǎ mɔ otɔ́ gbɔ̀ gɛ̌; ovǐ nyɔ̌nu ma nǎ mɔ onɔ gbɔ̀ gɛ̌; ovǐsi ma nǎ mɔ aswɔ́ nɔ́ gbɔ̀ gɛ̌. ³⁶ Oxwé mɛtɔn gbe nu lɛ́ɛ ná trɔ́zun kɛntɔ́ mɛtɔn.» ³⁷ "Mɛ ke yǐ wǎn ná otɔ́ alǒ anɔ húgǎn nyɛ, omɛ éxɔn má jɛxá bo nǎ nyí ahwanvǐ cé gɛ́; mɛ ke ka nǎ yǐ wǎn ná ovyɛ̌ súnnu alǒ ovyɛ̌ nyɔ̌nu húgǎn nyɛ, omɛ éxɔn lɔsú má jɛxá bo nǎ nyí ahwanvǐ cé gɛ́. ³⁸ Omɛ ke ma ɖiɖá aklúzu étɔn, bo jɛ gǒdo cé gɛ́ɛ, omɛ éxɔn má jɛxá bo nǎ nyí ahwanvǐ cé gɛ́. ³⁹ Mɛ ke jlǒ ná hwlɛ̌n ogbɛ élɔsútɔn, ogbɛ étɔ́n ná bú dó e; omɛ ke ke nǎ hɛn ogbɛ étɔ́n bú dó ta cemɛ, é ná lɛ́ mɔ ogbɛ étɔn." ⁴⁰ "Mɛ ke yǐ mi, nyɛ wɛ é yí; mɛ ke ka yǐ nyɛ, mɛ ke ɖǒ un ɖó xlán wɛ é yí gbá. ⁴¹ Mɛ ke yǐ xóyíɖɔ́tɔ́ Mǎwǔ tɔn, ɖó é nyí xóyíɖɔ́tɔ́ Mǎwǔ tɔn wútu, é ná mɔ xóyíɖɔ́tɔ́ Mǎwǔ tɔn wé ajɔ̀. Mɛ ke ka nǎ yí hwɛjijɔnɔ, ɖó é nyí hwɛjijɔnɔ wútu, é ná mɔ hwɛjijɔnɔ wé ajɔ̀. ⁴² Bɔ mɛɖě kpékpé ké ná ná osin fífá kɔ́fo ɖokpó kpoun wú ɖokpó le ovǐ kpɛ́vú éxɔ́n lɛ́ɛ mɛ, ɖó é nyí ahwanvǐ cé wútu, é má ná ba ajɔ̀ étɔ́n kpo kpɔ́n gbeɖě."