¹ Kuma caca ubushiku bwakonkapo ubwakutampa umulungu ,balile ku manda ,baletele ifya cena cisuma efyo bapekenya. ² Basangile icilibwe cilikunkunkulukile pa manda. ³ Balingile mukati,lelo tabasangilemo umubili wakwa shikulu Yesu. ⁴ Cacitike icakuti,libe balelanguluka palwa ici,mukupumikisha ,abaume babili baliminine pali bena namalaya aya bengeshima. ⁵ Elo banamayo baiketwe umwenso nokukontamina ifinso fyabo panshi, malaika asosele kuli bana mayo ai,nindo mukofwaila uwabumi kubafwa. ⁶ Talimo muno ,lelo alibukile!ibukisheni ifyo alikumyeba ulo ali ku Galileya. ⁷ Asosa ai umwana wamuntu akupelwa kuminwe yababembu abaume nokutanikwa,napabushiku bwakulenga shitatu akabuka nakaili." ⁸ Bana mayyo baliibukishe amashiwi ayo. ⁹ Kaili balifumineko ku manda nokuya mukweba ifi fintu ku bekumi na limo naba shala. ¹⁰ Nomba Maria madalena, Joana, Mary nyina wakwa Yakobo,naba namayo bambi abo bali nabena balitwele insebo ishi kuba sole. ¹¹ Lelo aya mashiwi yalikumoneka kwai cilande-lande kuba sole, kaili tabasumine muli bana mayo. ¹² Petelo alimine nokubutukila kumanda,nokwiminina nokuloleshamo, alimwene amalaya ya nsalu abene. Petelo elo abwelele ku ng'anda yakwe, alilapile pafyacitike. ¹³ Kaili, babili muli bena ubushiku ubo bwine baleya ku mushi wa Emaus. Apali intamfu mutanda ukufuma ku Yerusalemu. ¹⁴ Bali kulanshana pa fintu ifyacitike. ¹⁵ Cacitikile ifi, bacili balelanshanya nokwipushanya pamo, Yesu umwine alipaleme nokwenda nabo. ¹⁶ Lelo amenso yabo yalicingililwe mukukana mwibukisha. ¹⁷ Yesu asosa kuli bena, "Milandu ndo mukolanshanyapo ulu muko enda?" Baliminine nokulolesha bulanda. ¹⁸ Umo pali bena, uweshina lya Cleopas, alibasukile ai, "Niwefye weka weushishibile ifintu ificitike mu Yerusalemu muli shino nshiku?" ¹⁹ Yesu asosa kuli bena ai, "findo fyo?" Bayasukile ai, "Ifintu ifilelanda pali Yesu waku Nasaleti, uwali kasesema, uulanda icine na icebo pali Lesa nabantu bonse, ²⁰ Kaili nefyo bashimapepo bakalamba naba shicilye bampele mukutanikwa nokwipaiwa. ²¹ Lelo tukosubila ukuti eumo uwakwisa kwimya Israeli. Emukwai, nakai findo fimbi, lelo ebushiku bwalenga shitatu apo ifi fintu fyacitikila. ²² Lelo nabana mayo abena mwesu batulengele ukupeshiwa amano, ukuya sangwa ku manda ku macaca. ²³ Ulo tabasangile umubili tamuli, balibwelele, nokusosa ai, bacimona nakaili mucimonwa bamalaika balesosa ai, ali uwa mweo kubafwa. ²⁴ Abaume bamo abali nafwebo balile ku manda, na ukusanga ifyo bana mayo ba cisosa. Lelo tabamumwen. ²⁵ Yesu asosa kuli bena ai, mwempelwa mano baume kaili mwafina imitima mukutetekela fyonse ifyo bakasesema bali kumweba! ²⁶ Bushe tacayana Kristu ukucula muli ifi fyonse, nokwingila mubukata?" ²⁷ Elo ukutendekela kuli Mose nakupita muli bakasesema bonse, Yesu alibelwilile fyonse ifyapali ena mu malembo. ²⁸ Lintu balepalama mumushi uo baleyako, Yesu aipange ngo uleya apatali. ²⁹ Lelo balikumupatikisha, abai, "Ikaleni naifwe, pantu ciletwala ku cungulo nobushiku bwalaila." Yesu alingile nokwikala nabena. ³⁰ Icacitike cakutila, ubo aikele nabo mukulya, alibulile umukate, aupala, nokumokaula, abapela. ³¹ Elo amenso yabo yaisukile, kaili balimwishibile, nokuluba kumenso yabo. ³² Batampile ukusoshanya, "Bushe imitima yesu tataibilimine muli ifwe, lilya acilalanda naifwe munshila, nalilya acilakwisula amalembo kuli ifwe?" ³³ Balibukile iya ine nshita ukubwelela ku Yerusalemu basangile abekumi na umoo balilongene nabonse abo abali naena, ³⁴ Basosa ai, "cishinka mfumu yalibuka, nakuli Simoni alimonekele." ³⁵ Lelo balilandile ifintu fyonse ifyacitikile munshila, nefyo Yesu aishikilwe kuli bena pa kumokaula umukate. ³⁶ Bacili balesosa ifi, Yesu umwine aliminine pakati kabo , nokusosa kuli bena ayi, umutende ube kuli mwebo." ³⁷ Lelo baiketwe ukututuma nokwisushiwa no mwenso ukutontonkanya ai, twamona iciwa. ³⁸ Yesu asosa kui bena, "Nindo mwasakamanina? Nindo imitima yenu yakwatila amepusho. ³⁹ Moneni ndupi shandi na makasa yandi, ukuti ninebo. Injikateni nokumona. Pantu umupashi tawakwata umubili nama fupa, ingefyo mumwene nkwete." ⁴⁰ Ulo acili alesosa ifi, alibalangile indupi shakwe namakasa yakwe. ⁴¹ Lelo nangu tabacetekele kumulandu nensansa, nokusunguka. Yesu alibebele ai, "Bushe namukwata ifyakulya ifili fyonse?" ⁴² Balimupele isabi ilya kwipikwa, ⁴³ Alibulile nokulya libe bena tabalalya. ⁴⁴ Asosele kuli bena ai, "Aye emashiwi yandi ayo namyeba ulo nali na mwebo, ukuti fyonse ifyalembelwe mumalango yakwa Mose naba kasesema na mu mushikakulo fifwile ukufikilishiwa." ⁴⁵ Kaili alibeswile amatontonkanyo yabo, pakuti bomfwikishe icalembwa. ⁴⁶ Asosele kuli bena ai, "Calilembwa, acili Kristu ali noku cula kaili nokwimishiwa kubafwa ubushiku bwalenga shitatu. ⁴⁷ Ukulapila nokulekelelwa imembu kufwila kwashimikilwa mwishina lyakwe ku nko shonse, ukutampila ukufuma mu Yerusalemu. ⁴⁸ Muli bakamboke muli ifi fyonse. ⁴⁹ Lolesheni, namituma ngefyo tata andaile. Ikaleni mumusumba mpaka mukafwikwe amaka ukufuma kuwa sumbulwa." ⁵⁰ Kaili Yesu alibafumishe nokubatungulula nokufika mupepi naku Betani. Aimishe indupi shakwe noku bapala. ⁵¹ Ici cacitike ai, ebo alebapala, alibashile noku sendwa mumulu. ⁵² Bali mupepele nokubwekela ku Yerusalemu no kusangalala uku kalamba. ⁵³ Lonse basangwa mwi Tempele, ukupala Lesa.