¹ Panuma yaifi pali umutebeto waba Uuda, na Yesu alininine ku Yerusalemu. ² Nomba mu Yerusalemu pa mpongolo ya mpanga mwali icishiba icaleitwa muci Hebere Betesda, icali ne nsaka shisano. ³ Mwalesendama ibumba lya bantu abalwewe, mpofu, ifilema, abalemana na molu, ifite, balesangwa palya. balelolela ukufundaulwa. ⁴ Pantu malaika wakwa Lesa aleika nokutendeka ukufundaula amenshi mucishiba, lelo uwabalilepo ukwingila mu chishiba alepola ku bulwele bwakwe. ⁵ Kwali umuntu umo aleikala apo mwalwele imyaka amakumi yatatu na cine konse-konse. ⁶ Ulo Yesu amwene umuntu walwala nalala, pakwishiba ukuti aba ifi inshita iitali, amwebele ai, ulefwaya ukusangululwa? ⁷ Umuntu uwalwala alimwaswike ai, ''Mukwai, nshakwata uwakutwala mucishiba ulo amenshi yafundaulwa, ulo ndeyako nasanga umbi natentemuka ukwingilamo.'' ⁸ Yesu amwebele ai, ''Ima, senda ubutanda bobe no kwenda.'' ⁹ Apopene umuntu uwalwala alyundepwe, asendele ubutanda no kwenda. Nomba cali nipa bushiku bwe Sabata. ¹⁰ Eico aba Yuda bayebele kuwaundepwe ai, ''Bushiku bwe Sabata taufwile ukusenda ubutanda. ¹¹ Abaswike ai, ''Umuntu uuposeshe, eutile kuli ine senda ubutanda bobe. ¹² Awe balimwipwishe ai, ''Nani umuntu uutitile kuli iwe, 'Senda nobutanda enda'?'' ¹³ Lelo uwaundepwe tamwishibe, pa mulandu wakweba ai, ninshi Yesu nafumapo naongoloka, pa mualndu webamba lya bantu. ¹⁴ Apo papitilefi, Yesu alimusangile mwitempele nokumweba ai, ''Mona, uli mutuntulu! Wibwekeshapo ukubifya, pakuti cabipa ukucila cakuponena.'' ¹⁵ Umuntu umo fe afumine no kuya eba aba Yuda ai uuposeshe uyu muntu ni Yesu eulengele uyu muntu ukupola. ¹⁶ Nomba pa mulandu waifi fintuaba Yudabalamupakasa Yesu, ico alecite fintu pa bushiku bwe Sabata. ¹⁷ Yesu alibaswike ai, ''Tata ucili alebomba, naine wine mfwile ukubomba.'' ¹⁸ Pa mulandu wa ici, aba Yuda balafwaya ukumwipaya tekutoba fe Isabata, lyeka lelo na pakwitwa ukuba umwana wakwa Lesa. ¹⁹ Yesu alibaswike ai, ''Ndemwebe cine, umwana teti acite kantu eka, kamo amonako ico wishi alecita, pantu ifyo ena acita efyo nomwine acita fe. ²⁰ Pantu wishi atemwa umwana kabinge amulanga fyonse ifyo ena acita, ne milimo iyacisha ifi ali no kumulanga. ²¹ Pantu ifyo wishi busha abafwa nokupela ubumi, efyo umwana wine akabalenga ukuba no bumi uyo atemenwe. ²² Pantu na wishi tapingula muntu nelo umo, lelo ukupingula fe konse apela Mwane. ²³ Ukutila bonse bacindike mwane ifyo bacindika wishi. Uyo onse uushicindika Mwane tacindika wishi uwamutumine. ²⁴ Ndemwebe cine, nkososa ai, uumfwa icebo candi no kucetekela uwantumine aba no mweo tesa mubupingushi alipula mumfwa no kuba no mweo. ²⁵ Ndemweba icine, cine, Nkososa ai inshita ikesa, nanomba epoili, elo bonse abafwa bakomfwe shiwi lya kwa Mwana wakwa Lesa, nokufumamo no kuba no mweo. ²⁶ Pantu efyo Wishi aba no mweo, efyo apela na Mwane ukuba no mweo wine. Kabili amupela amaka ku kucito bupingushi. ²⁷ Elo no kumupela amaka ku kucito bupingushi pakuti Mwana wa Muntu, ²⁸ Mwisunguka pali ici, pantu inshita ikesa kuli bonse ababa mu nshishi bali nokumfwa ishiwi lyakwe no kufumamo. ²⁹ Bonse abalebomba fisuma bali nokubukila ku mweo, abalecita fyabipa bakabukila kubupingushi. ³⁰ Ine nshicita kanta nemwine neka. Ifyo ngumfwa, kuli Tata efyo ncita, no bupingushi bwandi bwa mulinganya pakuti nshipingula nemwine mukufwaya kwandi kano kuwantumine. ³¹ Nebo nganaishimiko ubunte nemwine, ubunte bwandi tebwacishinka. ³² Umbi eushimiko bunte bwandi ico ninjishibo kuti bwacishinka ubunte ashimika bwa cine. ³³ Imwe mwantumine kuli Yoani, nao ashimike ubunte bwa cine. ³⁴ Awe ine tekuntu fe mpokelela ubunte, lelo ndesose fi ukuti mupusuke. ³⁵ Yoani ali lubuto ulwaleaka, kabili inyali iyalebalika naimwe mwabekele ukwanga panono mu lubuto lyakwe. ³⁶ Pantu ubunte ndi nabo bwacilapo pa bunte bwakwa Yoani, pantu imilimo Tata ampela yakuti mpwishe, imilimo iyi ndecita. ³⁷ Tata uwantumine kabili ashimika bucishinka bwa cine. Ishiwi lyakwe tamwalyumfwa nangu kamo ne mimonekele yakwe. ³⁸ Kabinge icebo cakwe tamwacikwata ukwikala muli imwe. Pantu ulya uo uwatumine tamwa mutetekela. ³⁹ Mulafwayafwaya mu malembo ico imwe mutontonkanya kuti emwaba umweo wape, kabili yalya eyalenshika ubunte. ⁴⁰ Nomba tamufwaya ukwisa kuli nebo pa kuti meluba no mweo. ⁴¹ Nshasakama kutashiwa ku bantu. ⁴² Lelo naishiba imwe ukutila tamwakwata kutemwa Lesa muli imwe. ⁴³ Nebo naishila mwishin lyakwe Tata, naimwe ukunsekelela iyo. Umbu nga aishila mwishina limbi wene kuti mwamusekelela. ⁴⁴ Mwinga cetekela shani mwebo mwebapokelela no kutasha ukutasha kufuma kuli Lesa eka tamukufwaya? ⁴⁵ Mwitila nkomiseba kuli Tata, eko ali ulemuseba kuli Tata ni Mose uyo mwacetekelako. ⁴⁶ Pantu amucetekela Mose, nga mwacetekela na nebo, pantu ena alembele ulwaine. ⁴⁷ Lelo nga mwakana ukucetekela amalembo yakwe ulya kuti mwacetekela shani ifyebo fyandi?''