¹ Ulo kwashelefye inshiku mutanda kwi pasaka, Yesu aile ku Betani ukwaleikala Lesalo, uo abushishe ku bakufwa. ² Awa bamupekanisha ifilyo, Malita ewale afwilisha mukupekanya ifilyo. Lasalo ena ninshi ali pabalikulya na Yesu. ³ Elo Maria aisamo nasenda ibotolo umwali amafuta aya mutengo uukulu saana, kabili aya cena cisuma ayalikwitwa Nardi. Ayapongolwela pamakasa yawa Yesu. Elo alafuta amakasa ku mushishi wakwe. Awe ing'anda yonse yaisulamofye icena cisuma ica mafuta. ⁴ Umusole wakwa Yesu umo, Yuda Sikalyoti, uwali nokumushitisha ku balwani, asosa ai, ⁵ "Nindo iyo amafuta aya bashishitishafe pa ndalama imyanda itatu, elo bashipela naku balanda?" ⁶ Ico alandile ifi, teico asakamene abalanda, lelo nico ali ni kabwalala. Ewali kasunga wa cipao candalama kali alekwibapo isho balekubikamo. ⁷ Yesu amwasuka ai, "Muleke umwine. Ala nabomba, epakupekanya ubushiku bwakushikwa kwandi. ⁸ Abacushi mukalaba nabo lyonse, nomba tatwakabe nenu lyonse." ⁹ Abayunda abengi ulo baumfwile ai Yesu aliu Betani, ekobaishile, efyo baishile, tekukumonafye Yesu, nomba nokuti bamone Lasalo uyo Yesu abushishe kubafwa. ¹⁰ Bashimapepo bakalamba epakupanga ukwipaya Lasalo wine. ¹¹ Pantu abayunda abengi balebasangukila, balesumina Yesu pamulandu wakwa Lasalo. ¹² Ubushiku bwakokapo iibumba ilya bantu baishile ku nshikunkulu ulo baumfwa ai Yesu ali mu nshila aleisa ku Yerusalemu, ¹³ Balakontaula imisambo ya buncindu bamukonkela balepunda ai, Hosana, nakalebalika, Lesa apaale uyu waisa uo imfumu yatuma! Lesa apaale imfumu ya bena Israeli!" ¹⁵ Witiina iwe we mwana mwanakashi wakwa Sioni, ala mona imfumu ¹⁶ panshita iyi abasole tabaishibe umo calolele; nomba ulo yesu aishile shikuka kubafwa, elo abasole baibukishe ai, "ifi fyose bamucitile fintu fyalembelwe pali ena ¹⁷ Kashi abantu basangilweko ulo yesu asosele lasalo ukufuma mu cilindi, amubuusha nakubafwa bena babikilepofe ukulakushimika ili ilyashi. ¹⁸ Ecalengele ai abantu abengi bese kuku musengela, ico baufwile ici cishibilo ysu acitile. ¹⁹ Abafalise balalanshanya ai, "tumumwene tapali neto tulecita abantu bonse nomba eo balekonka ²⁰ Aba giriki bamo baninika ukuya pali abo baile kukupepa ku nshikunkulu. ²¹ Awe baisa ukwali filipo umwina Betisaida umusumba mu caalo ca Galileya. Bamwipusha ai, "Mukwai ala tukofwaya ukumona Yesu." ²² Filipo ayaeba Andereya, elo bonse babili baya kuli Yesu baya mweba. ²³ Yesu abasuka ai, "Nomba inshita yafika yaku sokolola ubucindami bwa mwana wa muntu. ²⁴ Ndemweba icine cine ai ulubuto lwa ng'anu lushalafe lumo mpo: Kanofye nga lwaponena mwiloba no kufwa twafwa, lyena ngalwafwa, elo lutwala ifisabo ifingi. ²⁵ Uyo uwatemwa umweo wakwe akaulufya; nauyo uwapata umweo wakwe pano caalo, eukausanga, akaba no mweo uwa muyayaya. ²⁶ Uulefwaya ukuba umubomfi wandi, ali nokulankonka. Epakuti uko ndi, no mubomfi wandi nao eko akabe. Kabili Taata akacindamina onse umubomfi wandi. ²⁷ "Umutima wandi; waikatwa ubulunda, namponga nsose shani? Bushe isose, 'Taata wi ngampususha kuli aya macushi? Nomba ni pamulandu wa macushi yene aya efyo naishila. ²⁸ Taata, cindika ishina lyobe." Elo ishiwi lyaumfwikile ukufuma ku mulu ai, "Nalilicindika, elo nakabili nkalalicindika." ²⁹ Ibumba ilyalipo lulya lyaumfwa ifi, lyasosa ai, "Cabulukuta. Bambi bena balasosa ai, "Mungeli ewalanda nankwe." ³⁰ Yesu abeba ai, "Tepa mulandu wandi mwaumfwila ishiwi, nipa mulandu wenu. ³¹ Npmba ino enshita abantu ba pano caalo bali nokupingwilwa. Ino kanshi enshita kateeka wabo pano caalo ali nokuposwa kunse. ³² Nomba nebo ulo nakwimwikwa pa musalaba nishi nacincitila abantu bonse bakesa kuli nebo." ³³ Ifyo asosele ifi, ni pakulanga umusango wa mfwa iyo aali no kufwako. ³⁴ Ibumba lyamwasuka ai, "Amafunde yakwa Mose yakweba ai Kristu alinokwkalilila umuyayaya. Nga kanshi webo wasosa shani ai bakabika umwana wa muntu pamusalaba? Ngoyo umwana wa muntu ninani?" ³⁵ Yesu abasuka ai, "Mucili no lubuuto pa nshitafe iinono. Kanshi akwendeni ulo mucili no lubuto, epali mwafimbwa ne mfishi. Umuntu uuleenda mu mfinshi tshiba uko akoya. ³⁶ Ulo mucili no lubuto. sumineni mu lubuto lwena mukaba abana ba lubuto." Lulya Yesu apwa ukusosa ifi, afumapo aya fisama. ³⁷ Nanguline Yesu acitile ifishibilo ifingi, aba Yuda bena tabamucetekele. ³⁸ Nipakuti amashiwi kasesema Esaya asosele yakafikilishiwe, ayo asosele ai, "We imfumu, ngo wingasumina ifi fintu tuleshimika ninani? Nga nikuli nani imfumu yasokolwela amaka yaiko? ³⁹ Nipali ici tekuti basumine, pantu kasesema Esaya asosele ai, ⁴⁰ Lesa alibapofwisha amenso, alenga ne mitima yabo ukukosa. Epali baimwen a na menso yabo, no kwiluka na mumitima yabo. Epali bayalukila kuli nebo, naine nabondapa." ⁴¹ Esaya alanda ifi pali Yesu, ico amwene ubucindami bwakwa Yesu, efyo asoselepo. ⁴² Lelo kwena napa ntungulushi shaba Yuda pena ingapalifye abengi abasumune Yesu. Lelo umulandu wakutina aba Falise, balefilwa ukuisokolola. Pantu baletina ukubatafya; no kubakanya ukya mu sinagogi. ⁴³ Kansi basakamene ukucindikwa na bantu ukucila ukucindikwa na Lesa. ⁴⁴ Yesu elo aikatisha ishiwi asosa ai,.''uwasumina muli nebo ,tenebo nekafe asumina,lelo asumina namu wantuma. ⁴⁵ Elo uwamona nebo ninshi amona nowantuma. ⁴⁶ Nebo naisa pano calo ukuba ulubuto ku bantu ,kanshi onse uwnsuminamo tekala mumfimfi. ⁴⁷ Onse uwaumfwa amashiwi yandi nomba akana ukulaya sunga ,tenebo nkomupela umulandu .Nebo nshaisa pano caalo kukupela abapano calo umulandu awe naisa kukubapususha . ⁴⁸ Onse uwansuula,akana nokupokelela amashiwi yandi ,eko ali uwa kumupela umulandu .Amashiwi yene mwebo ,mwebo eya kumupela umulandu pabushiku bwakulekelesha. ⁴⁹ Pantu efyo mwaba tefya pamutwe wandi awe,Tata uwantuma ,ewankonkomesha ifyakusosa nenshila yakusoselamo. ⁵⁰ Kaili nalishiba ai amashiwi yakwe yapela ubumi bwamuyayaya .Kanshi ifyo nsosa,fintu Tata anjebele ukusosa."