¹ Ulo capingwile ukuti ifwe tukaye mu bwange Itali, bapele Paulo naba kakwa kuli mushika wa mwanda umo Ogastoni ishina lyakwe Yuli. ² Awe pakunine mubwange bwaku Adramuti ubwakusungamina kuya ku mishi ya fyabu iyamu Asia. Twaile pali bemba. Twali na Aristaki umwina Makedonia uwali Tesolonika. ³ Elo ubushiku bwa konkelepo twafikile ku musumba wa Sidoni, eko Yuli acitile Paulo inkumbu amulekele aye ku banankwe no kusekelelwa. ⁴ Awe pakwima kulya twaile shingilila Kupro, pantu imyela yalefuma ku ntanshi. ⁵ Kabinge pakupita pa nshila iya kulungatana na Kilikia na Pamfilia; twafikile ku Mura, umushi wamu Lukia. ⁶ Nokokwine mushika pa kusanga ubwange bwamu Alexisandria ubwaleya ku Itali, Alinininemo. ⁷ Ulo twaleya panono panono inshiku ishingi twafikile no bwafya apalungatana Kinidi elyo umwela pakutulesha, twailepita natushinguluka Krete apalungatana na Solome. ⁸ Kabinge pakulambako no bwafya, twafikile apantu apetwa fishobe Fisuma, apapaleme ku musumba wakwa Lesea. ⁹ Twali kwete inshita iikalamba,napo ulwendo nomba nomba lwabo ulwabulwani pantu ne nshila yakuleka ukulya yalipitilile. Paulo alabakonkomesha, ¹⁰ nokusosa ai, ''Mukwai ndemona ai ubu ubulendo bukaba ubwamalwa, nokulofya te kunono tefisendo fe no bwange, fyeka lelo naku myeo yesu.'' ¹¹ Lelo mushika alesubila kuti cilongoshi no mwine wa bwange ukucila kufyo Paulo alesosa. ¹² Pa mulandu wakuti icishobo cali icishiweme ku kwikalamo fisuke ifikuku fipwe, icintu bwingi capandile amano ku kufumapo, no kwesha nga kuti bafika ku Foinike, ku kwikala ukufika ifikuko fipwe. Foinike chisobe camu kwete umusongo lubali uko walola kukabanga no lubiye umusango walola kukabanga. ¹³ Ulo umwela wakukabanga ka kulyo wapepeleshe bwino bwino, elo batile nabamo nga ico balefwaya. basumbwile inanga balelambatila Krete, mupepi pepi. ¹⁴ Panuma ya inshita iipi apopene kwaishile umwela wa nkuka, uwaleitwa ai Yura kwilo, walitendeke ukupunga pa cishi. ¹⁵ Eco ubwange pakwikatwa, no kufilwo kulola ku mwela, twanakileko twalasensenunwa ku mwela. ¹⁶ Elo twabutukila ku kushingilila ku cishi icaleitwa ai Kauda, elo twalipilikite no bwafya ukwikata akabwange. ¹⁷ Elo bakasumbula, elo babulile ntambo bafumfunya mwisamba lya bwange. Nokubuka kabili pakutina ukuti benga poswa pa Surti, baposele itanga elo babasenda. ¹⁸ Elo pakusunkana icibi ku nkuka ubushiku bwakonkapo batendeke ukuposa ifipe muli bemba. ¹⁹ No bwalenga shitatu baposelemo ku minwe yabo ine ifibombelo fya bwange. ²⁰ Elo akasuba na intanda pakubulo kukana tubalikila inshiku ishingi, elo ukucetekela kwesu ukwakupusuka kwalipwile. ²¹ Ulo tabalile inshita ikulu sana elo Paulo aiminine mukati kabo ai, ''Mukwai, mufwile ukungumfwa, no kukana fuma ku Krete ku kwisa mona aya malwa elo no boni. ²² Na nomba ndemu koselesha, ukusangalala pantu takwakabepo ukuposa umweo nelo umo uwamuli imwe, kano fe ubwange bweka. ²³ Eico kuli nebo kwiminine ubushiku umutumwa wakwa Lesa uyo nebo ndi wakwe, uyo kabili mpyungila. ²⁴ Asosele ai, 'Witina, Paulo. Uli no kwiminina kuli Kaisare, kabili mona, Lesa nakupela abalendo banabo bonse abali na iwe. ²⁵ Eico sansamukeni, mukwai! Pantu ndecetekela Lesa ndetila ai musango onse alandile kuli nebo ifyo fine efyo cikaba. ²⁶ Elo tuli nokuposwa pa cishi cimo.'' ²⁷ Awe ulo ubushiku bwa kulenga ikumi na shine bwaishile, twale sensemwinwa muli Bemba wa Adria, napakati ka bushiku aba bwange balatungo kuti balapalamina ku mulundu. ²⁸ Awe ulo baposele umutofwe basamgile imikwamba amakumi yabili; napakupitapo panono, no kuposamo umutofwe na kabili balisangile imikwamba ikumi na isano. ²⁹ Awe bena pa kutina ukuti bengaposa pa mabwe, baliposele inanga shine balafwaisha ukuti buce bwangu. ³⁰ Nomba ababwange balafwayo kufulumuka mu bwange ninshi nabasolomwena akabwange pali bemba, mubucejeshi kwati balaswa bashe inanga shali ku cisolo caku ntanshi. ³¹ Elo Paulo asosele kuli mushika elo nakufita ai aba nga tabekele mu bwange, tekuti bapusuke. ³² Elo ifita fyaputwile imyando ya kabwange no kuleka kasesemunwe. ³³ Ulo bapalamina kukuca, elo Paulo alapapata bonse no kuleka balye, asosele ai, ''Ubwalelo ebushiku bwakulenga ikumi na shine mwaikala abasakamikwa ukwabula ukuti mulye. ³⁴ Nde mupapata ukuti mulye, pakuti ekumona amaka. Pantu takwalobepo umushishi nelo fe umo uwaba pa mitwe yenu.'' ³⁵ Ulo ena asosele ifi, no kubulo mukate atotela kuli Lesa pa menso ya bonse. Elo aumokawile atendeke no kulya. ³⁶ Elo bonse balisansamwike lelo bena batendeke ukulya. ³⁷ Awe fwebali mu bwange twalimo imitwe imyanda ibili na makumi cine lubali na mutanda. ³⁸ Awe ulo balile bayangwishe ubwange pakuposa inganu muli bemba. ³⁹ Awe ulo bwacele, bwacele tabaishibe calo cilya, lelo bamwene icisobe cali necisensenga bapangile ukwesha nga benga fishako ubwange. ⁴⁰ Elo baputwile imyando ya nanga ba shisha namuli bemba. Napope banenwine imyando yaba kensha napakwimishe itanga lyaku ntanshi ku mwela; balelola ku lulamba. ⁴¹ Kwena pakuponena pamakumanino. ya bemba babili balisamike ubwange pa musenga cecisolo ca kuntanshi cilishipile, elo calikosele nde. Necisolo cakunumacalalepuka kumaka ya maba. ⁴² Elo ifita, fyapandile amano yakuti bepaye abafungwa epali bamo baowa no kufyuka. ⁴³ Elo mushika pakufwaya ukupususha Paulo, alifileseshe amapange yabo; asosele kubaishiba ukowa ukuti baipose muli Bbemba. ⁴⁴ Elo nabashala bakonkepo, bamo pafipampa, nabambi pa fintu fimbi fya bwange. Kabili efyo cali bonse balipuswike bafikile ku mulundu