¹ Юсуфнинг ўғли, Манашеҳ авлодидан Манашеҳнинг ўғли, Махернинг ўғли, Гилъаднинг ўғли, Ҳефернинг ўғли, Зелофеҳаднинг қизлари келишди, унинг қизларининг исмлари Махлаҳ, Наоҳ, Хоглаҳ, Милкаҳ ва Тирзаҳ эди. ² Улар Йиғин Чодирининг кириш жойида Мусо, руҳоний Элеазар, ҳокимлар ва бутун жамоанинг қаршисида туриб, дедилар: ³ “Бизнинг отамиз саҳрода ўлди, у Раббийга қарши тўпланганлар тўдасида, Кўраҳнинг тўдасида эмас эди. Бироқ ўз гуноҳи учун ўлди ва унинг ўғиллари йўқ эди. ⁴ Унинг ўғли йўқлиги учун отамизнинг исми унинг қабиласи орасидан ўчиб кетиши нима керак? Отамизнинг биродарлари орасида бизга ҳам улуш беринг”. ⁵ Мусо уларнинг ишини Раббийнинг қаршисига олиб келди. ⁶ Раббий Мусога деди: ⁷ “Зелофеҳаднинг қизлари тўғри айтмоқдалар. Уларга оталарининг биродарлари орасида мерос улуши ва оталарининг улушини уларга бер. ⁸ Исроил ўғилларига эълон қилиб айтгин: Агар кимдир ўлса ва унинг ўғли бўлмаса, унда унинг улушини қизига беринглар. ⁹ Агар унинг қизи бўлмаса, унда унинг улушини биродарига беринглар. ¹⁰ Агар унинг биродарлари бўлмаса, унда унинг улушини унинг отасининг биродарларига беринглар. ¹¹ Агар отасининг биродарлари бўлмаса, унда унинг улушини унинг қабиласидан яқин бўлган қариндошига беринглар ва у уни мерос қилиб олсин. Раббий Мусога буюрганидек, бу Исроил ўғиллари учун қонун қилиб қабул қилинсин”. ¹² Раббий яна Мусога деди: “Ушбу Абарим тоғига бор ва Мен Исроил ўғилларига бераётган ерга қара. ¹³ Унга қараганингдан сўнг биродаринг Аҳарўн каби сен ҳам ўз халқингга қўшилгин, ¹⁴ чунки сизлар Зин саҳросида, Қадешдаги Мерибаҳ суви бўйида, жамоанинг тортишуви вақтида, халқнинг кўз ўнгида Менинг муқаддаслигимни намоён қилиш учун Менинг амримга итоат қилмадингиз”. ¹⁵ Шунда Мусо Раббийга сўзлаб деди: ¹⁶ “Барча вужуддаги руҳларнинг Раббий Худоси ушбу жамоанинг устидан шундай одамни қўйсинки, ¹⁷ Раббийнинг жамоаси чўпони йўқ қўйлардек бўлмаслиги учун у уларнинг олдида кириб-чиқиб юрсин, уларни олиб чиқсин ва олиб кирсин”. ¹⁸ Раббий эса Мусога деди: ”Ичида Руҳ бўлган одамни – Нўн ўғли Йешуани олиб, унинг устига қўлингни қўй. ¹⁹ Уни руҳоний Элеазар ва бутун жамоанинг олдига қўйиб, уларнинг кўз ўнгида унга насиҳат бер. ²⁰ Исроил ўғилларининг бутун жамоаси унга қулоқ солиши учун унга ўз шуҳратингдан бер. ²¹ У руҳоний Элеазарга мурожаат қилади ва ундан Раббийнинг қаршисида урим-туммим воситасида олинадиган қарорни сўрайди. Шунда Исроилнинг барча ўғиллари ва бутун жамоа унинг сўзи бўйича чиқишлари ва унинг сўзи бўйича киришлари керак”. ²² Мусо Раббий унга буюрганидек қилди ва Йешуани олиб, уни руҳоний Элеазарнинг ҳамда бутун жамоанинг олдига қўйди. ²³ У унинг устига қўлларини қўйиб, Раббий Мусо орқали айтганидек, унга насиҳат қилди.