¹ De yau elan ta kelima ta Yahwa be kalam ta Israel - elan ta Yahwa, al sabitu be samawat, wa kutu be asasat ta wata, wa shekilu roho ta nas juwa zol. ² "Aynu. Ana gerib bi ja kutu Orshelim fi juwa kubaya lahadi bi sibu nas kulu al gerib min huwo bi leklek. Kaman bi kun zede le Yahuza, fi zaman ta hisar did Orshelim. ³ Fi yom dak, Ana bi amulu Orshelim gowi ze hajer le nas kulu. Ai wahid al bi hawil arfau hajer dak bi awgu gisim bitoshedid kalis, wa kulu beled fi wata hini bi limu did medina dak. ⁴ Fi yom dak - de yau elan ta Yahwa - Ana bi dugu husanat kulu be lakabata wa nas al bi sugu be junun. Ana bi fata ena Tai fi ras ta Yahuza, lakin ai husan ta nas Ana bi dugu be amiyan. ⁵ Biga kada ta Yahuza bi kelim fi geliba tomon, 'Nas al bi geni fi Orshelim yau guwa ta nina, ashan Yahwa ta nas kulu, Allah tomon.' ⁶ Fi yom dak, Ana bi amuu kada ta Yahuza ze gurmata nar fi nus khashab, wa ze lamba al bi wala fi nus dura al bi wogif, ashan humon bi demirunas kulu al fi yemin wa shimal tomon. Orshelim tani mara bi geni fi mahal bito barau." ⁷ Yahwa bi alagu awel kheima ta Yahuza, ashan kede ihtiram ta bet ta Daud, wa ihtiram ta del al bi geni fi Orshelim kede ma kun ahsen min ta bagi Yahuz. ⁸ Fi yom dak Yahwa bi kun difa le nas al bi geni fi Orshelim ms, wa fi yom dak, del al tabanin fi nus tomon bi kun ze Daud, fi zaman al bet ta Daud bi kun ze Allah, ze malaika ta Yahwa gidam tomon. ⁹ "Fi yom dak Ana bi bada karabu beled kulu al bi ja did Orshelim. ¹⁰ Lakin Ana bi kubu roho ta hiniya wa nida fi bet ta Daud wa nas al bi geni fi Orshelim, wa biga humon bi aynu le Ana, al humon awgu. Humon bi kore Ana, ze zol al bi kore jena bito al wahid; humon be waja geliba bi kore be guna ze del al bi kore be guna fi mutu ta jena al bikir. ¹¹ Fi yom dak de kore be guna fi Orshelim bi kun ze kore be guna al kan fi Hadad Rimmon al fi taraf ta Megiddo. ¹² Wata bi kore, ai gebila bi koreu barau min gebila tani. Gebila ta bet ta Daud bi kun barau, wa nusuwan tomon bi kun barau min rujal. Gebila ta bet ta Nathan bi kun barau, wa nusuwan tomon bi kun barau min rujal. Gebila ta bet ta Shemei bi kun barau wa nusuwan tomon bi kun barau in rujal. ¹³ Gebila ta bet ta Lawi bi kun barau., wa nusuwan tomon bi kun barau min rujal. ¹⁴ Ai gebila min bagi gabail tanin al faduu - ai gebila bi kun barau, wa nusuwan bi kun barau min rujal."