¹ Fata abuwab takum, ya Lebnan, ashan kede nar haragu ruz takum! ² Guna be meskin, ya shejera ta sarow, ashan kede shejerat ta ruz kulu waga! De shunu al kan kuwes yau demiru! Guna be meskin, ya bolut ta Bashan, ashan gaba al gowi dak kalas waga tehet. ³ Ruwaa gum kore, ashan mejid tomon demiru! Sot iyal ta ased bada kore, be takabur ta Nahar taOrdon al demiru! ⁴ De al Yahwa Allah tai yau kelim, "Ze rayi, bi aynu fi ganamayat al kutu be taraf ashan bi dabau. ⁵ (Zol al bi biyu humon wa dabau gubal ma adibu, wa al bi ishterihumon wa bi kelim, 'Yahwa kede kun mubarak! Ana biga ganiyan' ruwaa del al bi ishtakal fi aynu ganamayat' del al sidi tomon ma bi hin fogo). ⁶ Ashan ana kaman tani mara ma bi hin le del al bi geni fi wata hinak - De yau kararat ta Yahwa, aynu, Ana kaman zatu, biga gerib ashan bi selimu ai zol fi idan ta jeran bito, wa fi idan ta melik bito, wa humon bi karabu wata, wa mafi wahid min humon Ana bi alagu min idan tomon. ⁷ Ana biga rayi ta ganamayat al kutu alama fogo ashan bi dabau, le del al bi aruf shokol ta koruf, Ana shilu itnin asayat. Wahid bi nadi gali, "Neima" wa tani de bi nadi gali, "Wihda" be teriga de Ana agder aynu ganamayat del. ⁸ Fi wahid shahar bes. Ana agder demiru talata ruwaa del. Ana biga ma indu sobur le humon, humon kaman biga akrahu ana. ⁹ Ana biga gum kelim, le sidi ganamayat, "Ana tani marama bi ishtakal rayi le inta. Ruwaa del al der mutu - kede mutu. Ruwaa al der karabu - kede humon karabu. Kede korufat del al bi fadulu, akulu lahama ta jeran bito." ¹⁰ Biga ana gum shilu asaya tai al isim bito Neima de wa kasuru huwo ashan bi kasuru be tifagiya al ana amulu ma kulu gabail tai. ¹¹ Fi yom dak kasuru tifagiya, del al kan aruf shokol ta koruf wa kan bi aynu ana, humon aruf gali Yahwa kalas wonusu. ¹² Ana kelim le humon, "Kan bi beinu kuwes le intakum, dafau takum le Ana ujura tai. Lakin kan mafi, mata amulu. Humon biga bada dafau le ana ujura tai - teletin gita ta fidda. ¹³ Biga Yahwa kelim le ana, "Kutu fidda fi sonduk ta, al keimu be ahsen gurus le inta!" Ze de ana shilu teletin gita ta fidda de wa ana kutu humon fi sonduk fi juwa ta Yahwa. ¹⁴ Baad dak ana gum kasuru asaya tai al tani dak, "Wihda" ashan bi kasuru shokol akuwana al fi beina Yahuza wa Israel. ¹⁵ Yahwa gum kelim le ana, tani mara, "Shilu hajat ta rayi al belid de le inta, ¹⁶ wa aynu, Ana bi ruwa kutu rayi tani fi wata hinak. Huwo ma bi ruwa kutu bala le koruf al bi mutu del.Huwo ma bi ruwa ashan fetisu koruf al woduru, wa ma bi aliju koruf al shelel. Huwo ma bi ruwa akilu koruf al kuwes, lakin huwo bi ja akulu laham ta korufat al sumanin del wa bi agilau hawafir tomon bara. ¹⁷ Bi kun mushkila le ruwaa delal nesitu ganamayat! Kede sef ja did idan bito wa ena yemin bito! Kede idan bito shele bara wa kede ena yemin bito tala amiyan!"