¹ Hasil fi Sabit Yesua kan mashi min mahal zira wa talamiz tuo kan bi gata ras ta sanabil, bein edenat tuomon wa huwomon bi akulu sanabil. ² Lakin bad min Firiseen kelimu, ''lei intkum bi amulu haja al ma ganuuni fi yom Sabit?'' ³ Yesua juwabu huwomon, kelimu, ''Hal itakum kulu kulu ma agara haja al Daud amulu wokit huwo kan zalan, huwo wa rijal al kan ma huwo? ⁴ Huwo ruwa le beit ta Allah, wa shilu al raigif ta tegdima wa akulu juzu wa kaman wodi juzu le rijal al ma huwo ashan bi akulu, hata lo kan huwo ganuuni le kahan ashan bi akulu. ⁵ ''huwo kelimu le huwmon, ''Jena ta Insaan huwo Rabuna ta Sabit ⁶ Hasil fi yom Sebit tani huwo ruwa le kenisa wa derisu nas inak. Kan fi rajil inak eden tuo al yemiin yabis. ⁷ Al kataba wa Firiseen kan bi ragebu huwo ashan bi ayenu hal huwo bi aliju fi yom Sabit, ashan huwomon bi ligo saba le ishteki huwo. ⁸ Lakin huwo arufo sunu huwmo bi fekir wa huwo kelimu le rajil al eden tuo yabis, ''Gum fok, wa wogif ini fi nus ta kulu nas. '' Fa rajil gum fok wa wogif inak. ⁹ Yesua kelimu le huwmon, ''Ana asalu itakum hal huwo ganuuni fi Sabit ashan bi amulu kwes wala batal, wala bi alagu haya wala bi demiru?'' Fa ¹⁰ huwo ayenu le huwmon kulu wa kelimu le rajil, ''Midu eden taki huwo midu, wa eden tuo kan tala tamum. ¹¹ Lakin huwomon kan zalan wa huwomon wonusu le bad tuomon an sunu huwomon bi amulu le Yesua. ¹² Hasil fi ayamat tanin huwo ruwa le jebel ashan seli. Huwo istemir belel kulu fi sala le Allah. ¹³ Wokit kannahar huwo nadi talamiz le huwo, wa huwo iktar etnashar min huwomon semi huwomon rusuul. ¹⁴ Asmma ta rusuul kan Samaan (al huwo kaman Butros) wa aku tuo Andarauos, Yakub,Yuhana, Filipos, Bartilimaus, ¹⁵ Matta, Toma, Yakub jena ta halfi, Samaan al kan nadi gayur, ¹⁶ Yahuza jena ta Yakub, wa Yahuza al Iscarioti, al ja selimu Yesua. ¹⁷ Yesua nezil ma huwmon min jebel wa wogif fogo mahal al sawa sawa ma talamiz tuo al ketir wa ma adad keir ta nas min Yahudia wa Uruselim wa min Suur wa Seida. ¹⁸ Huwomon ja asuma le huwo wa ashan aliju huwomon min ayanat. Nas al kan indu roho shirir kaman kan aliju. ¹⁹ Kulu nas al fi zahm hawil lemesu huwo la anu guwa le ilaj kan bi tala min huwo, wa huwo aliju huwomon kulu. ²⁰ Huwo ayenu le talamiz tuo, wa kelimu, '' Baraka le del al masakin, la anu malakut ta Allah de tuomon. ²¹ Baraka le del al ja anin hasa, la anu itakum bi shaban. Baraka le del al bi kore hasa, la anu itakum bi atako. ²² Baraka le del al nas bi akrah itakum wa gesimu itakum wa shitimu itakum, ashan jena ta Insaan. ²³ Afarah fi yom dak wa kun murta, la anu itakum endu ujura kebir fi sama, la anu judud tuomon amulu le anbia bi nefsu teriga. ²⁴ Lakin woe le itakum al ganiyanin, la an itakum kalas shilu taziya ²⁵ takum. Woe le itakum al shabanin hasa, la anu itakum bi kun ja an baden. Woe le itakum al bi atako hasa, la anu itakum bi kun haznanin wa bi kore baden. ²⁶ Woe le itakum, al nas wonusu kwes ta takum, la anu de yau judud tuomon amulu le anbia al kadabiin ²⁷ Lakin ana kelimu le itakum del al bi asuma, hibu adu takum wa amulu kwes le del al bi akrah itakum. ²⁸ Barako del al la anu itakum wa seli le del al amulu itakum batal. ²⁹ Le de al dugu bangiri taki al yemin wodi le huwo bangiri ta tani. Iza zol shilu gamis, taki wodi le huwo bantalon kaman. ³⁰ Wodi le kulu zol al asalu inta. Iza zol shilu haja taki, mata asalu huwo ashan bi rija le inta. ³¹ Ze ma intakum der nas kede amulu le intakum amul takum kaman le huwmon. ³² Kan intakum hibu bes ans al bi hibu itakum, yatu faida yau le intakum? La anu katein bi hibu del al bi hibu huwomon. ³³ Kan itakum amulu kwes bes le nas al amulu kwes intkum, yatu faida yau le intakum? La anu hata katein bi amulu kaman. ³⁴ Kan itakum bes deyinu nas al intakum bi itwaka huwomon bi dafa le intakum, yatu fada le intakum? hata katein bi deyinu le katein, ashan bi ligo nefsu gurush. ³⁵ Lakin hibu adu takum wa amulu kwes le huwomon. Deyinu ma itwaka haja bi rijao wa ujura takum bi kun kebir wa intakum bi kun iyal ta Allah al fok, la anu huwo nefsu ameen le nas al bi shokuru wa nas al batalin. ³⁶ Kun rehim, ze ma abu taki huwo rehim. ³⁷ Ma takum gata gadia, wa ma bi gatao gadia takum. Ma takum hukumu, wa bi hukumu itakum. Afi nas tanin, wa bi afi intakum. ³⁸ Wodi wa bi wodi le intakum. Al ketir bi asuru tihit, bi hizu ma bad wa bi dofugu fi guaa aki. La anu godoor al inta wodi bi wodi le inta, '' ³⁹ Wa huwo wori le huwomon misaal. ''Hal zol amiyan bi agder gedimu zol amiyan? Kan huwo amulu, huwomon kulu ma bi waga fi hufura? ⁴⁰ Tilmiz ma kebir min mualim, Lakin kulu zol kan timu tedrib bikun ze mualim tuo. ⁴¹ Le inta bi ayenu le gesh al fi ena ta aku taki lakin inta ma lahizu le kashab al fi ena taki? ⁴² Kefe inta bi kelim le aku taki, 'Aku, kede ana shilu gesh al fi ena taki, ' wa inta bi nefsak ma ayenu kashab al fi ena taki? Intakum al marai awel tala kashab bara min ena taki, wa inta bi ayenu kwes ashan bi tala gesh min ena ta aku taki. ⁴³ La anu mafi shejera al kwes bi tala samar al batal, wa la fi shejera batal bi tala samar al kwes. ⁴⁴ La anu aye shejera bi arufu ma shikil ta samar al bi tala. La anu ns ma bi limu Teen min shok, wa la huwomon bi limu enab min gaba. ⁴⁵ Al insan al kwes min gelba tuo bi tala haja al kwes, wa insan al shirir min gelba al shirir bi tala haja al shirir. La anu al mala fi gelba yau kasam bi wonusu. ⁴⁶ Le intakum bi nadi ana, 'Rabuna, Rabuna,' wa intakum ma bi ihteramu hajat al ana kelimu? ⁴⁷ Kulu zol al ja le ana wa asuma kelimat tai wa ihteamu, Ana bi wori le inta huwo ze sunu. ⁴⁸ Huwo ze zol abinu beit, hafura tihit wata wa abinu asas fi hajer, wokit moyo ja, mala tija ta beit, lakin ma hizu, la anu huwo kan abinu tamum. ⁴⁹ Lakin zol al bi asuma kelimat tai wa ma bi ihteramu, huwo ze zol abinu beit fi wata bidon asas. Wokit moyo mala tija ''.beit, tawali waga, wa kan waga tuo azim