¹ Lakin Saul, lisa gi wonusu tahadidat hata ta katulu did al talamis ta Rabana, uwo rua le reis ta kahana ² wa asalu waragat min uwo le al majame fi Dimask, ashan kan uwo ligoayi wahid al tabi le terik de, kan rajil wele mara, uwo bi jibu umon morbutin le Arselim. ³ Ze ma uwo kan gi safir, haja hasil zaman uwo biga gerib le Dimask, fajaatan inak wala hawuli uwo nur min al sama; ⁴ wa uwo waga le tehet wa asma sot kelim le uwo, '' Saul, Saul, le ita gi azibu ana?'' ⁵ Saul juabu, '' Ita yau munu, ya Said?'' Rabana juabu, '' Ana Yesua al ita gi azibu; ⁶ lakin gum, dakalu fi jua medina, wa bi weri le ita sunu ita lazim bi amulu''. ⁷ Al rujal al kan safir ma Saul wagifu bidun kalam, umon asma al sot, lakin ma ayinu ayi wahit. ⁸ Saul gum min al wata, wa zaman uwo fata uyun tou, uwo ma bi agder ayinu haja; biga umon silu uwo ma iden wa jibu uwo le jua Dimask. ⁹ Le talata ayam uwo kan ma gi ayinu, wa uwo wele akulu la sirib moyo. ¹⁰ Kan inak fi al telmis fi Dimask ismu Ananias. Rabana kelim le uwo fi royia, '' Ananias!'' Uwo kelim, '' Ayinu, Ana yau, Rabana.'' ¹¹ Rabana kelim le uwq, '' Gum , wa rua le sika al bi nadi Adil, wa fi al bed ta Yahuza asalu le al rajil min Tarsis ismu Saul, uwo giseli. ¹² Uwo ayinu fi royia al rajil ismu Ananias gi ja le jua wa kutu idenat tou fogo uwo, ashan kede uwo agder ayinu tani mara.'' ¹³ Lakin Ananias juabu, '' Rabana, Ana asuma min ketirin an rail de, godur sunu uwo amulu batal le nas taki al kudusin fi Arselim. ¹⁴ Uwo indu sulta min al rais ta kahana ashan bi gobudu ayi wahid ini al gi le isim taki.'' ¹⁵ Lakin Rabana kelm le uwo, '' Rua, uwo biga zol al ana iktar le nefsi, ashan bi silu isim tai gidam ta Umanien wa muluk wa le iyal ta Israil; ¹⁶ Ana gi rua weri le uwo godur sunu uwo bi atab le sabab ta isim tayi.'' ^{17 18 19} Kida Anania rua, wa dakalu le al bed. kutu iden tou le uwo, wa uwo kelim,'' Akui Saul, Rabana Yesua, uwo al bainu le ita fi sika zaman ita kan gi ja, yau rasulu ana ashan ita bi akudu ena taki wa bi malau ma Roho al Kudus.'' Tawali haja tani ze gisir waga min uyun ta Saul, wa uwo biga gi ayinu; uwo gum wa kan amiddu; ¹⁹ wa uwo akulu wa kan ligo guwa . Uwo geni ma talamis fi Dimask le ayam ketir. ²⁰ Tawali zaman dak uwo bada besiru an Yesua fi al majame, bi kelim gali uwo yau jena ta Allah. ²¹ Kulu nas al asma uwo kan mustagrabin wa kelim, '' De yau ma rajil al demiru delin al fi Arselim al gi nadi isim de? Uwo ja ini ashan bi silu umon morbutin le al rais ta kahana.'' ²² Lakin Saul biga aktar wa aktar aguwa, wa uwo kan biga sabab dakid fi nus ta yahud al gi geni fi Dimask ma isbatat inu Yesua yau al Mesih. ²³ Bat ayam ketir, al yahudin katit sawa ashan katulu uwo. ²⁴ Lakin kuta tomon kan biga maruf le Saul. Umon ragibu al buwaba nahar wa bilel ashan bi katulu uwo. ²⁵ Lakin talamis tou silu uwo bilel wa nezilu uwo tehet be wasat al heta, nezilu uwo fi gufo. ²⁶ Zaman uwo kan ja le Arselim, Saul hawil dum le talamis, lakin umon kan kulu gi kafu min uwo, ma bi sedek gali uwo biga telmis. ²⁷ Lakin Barnabas silu uwo wa jibu uwo le rosuls, wa uwo weri le umomon kef Saul ayinu Rabana fi sika wa kaman kef Rabana wonusu le uwo, wa kef fi Dimask Saul kan wonusu be suja fi isim ta Yesua. ²⁸ Uwo gabilu ma umon ze umon kan gi ja wa gi tala bara min Arselim. Uwo wonusu be suja fi isim ta Rabana Yesua ²⁹ wa nakis ma al Yunanien al Yahudien; lakin umon hawil ashan bi katulu uwo. ³⁰ Zaman al akwana aruf zede, umon jibu uwo le kaisaria wa rasulu uwo le Tersas. ^{31 32} Yela min ina, kenisa fi Yahudia kulu, Jelil, wa Samiria kan indu salam wa kan abinu fok ; wa, biga douru fi kafu ta Rabana wa fi taazia ta Roho al Kudus, kenisa bada raba fi adad. ³² Ze ma kan kida, Buturus rua hawli al mantika kulu, uwo ja lakadi kaman le al muminien al gi geni fi medina ta Lidia. ³³ Inak uwo ligo rajil tani ismu Anias, uwo kan ragit fi serir tamania senawat, uwo kan mosulul. ³⁴ Buturus kelim le uwo, ''Anias, Yesua al Mesih aliju ita. Gum fok wa sala serir taki,'' wa tawali uwo gum fok. ³⁵ kida kulu wahid al gi geni fi Lidia wa fi Saron ayinu rajil de wa umon rija le Rabana. ³⁶ Inak kan fi Yafa telmiza tani ismu Tabisa, al mana tou '' kazala''. Mara de kan malian ma amail al kuwes wa amail ta rahma al uwo gi amulu le nas al masakin. ³⁷ Kan hasil fi ayam dak hia biga ayan wa mutu; zaman umon beredu hia, umon noumo hia fi gurfa al fok. ³⁸ Zema Lidia kan gerib ma Yafa, wa talamis kan asma gali Buturus kan fi inak, umon rasulu itnin rujal le uwo, ashan asalu uwo, '' kede ja le umon bidun taakir.'' ³⁹ Buturus gum wa rua ma umon. Zaman uwo kan wosulu, umon silu uwo le gurfa al fok, wa kulu al aramil wagifin wa gi kore, gi wori le uwo gumasat al Kazala kan salau kayetu zaman hia kan ma umon. ⁴⁰ Buturus tala umon kulu bara min al gurfa, raka tehet, wa seli; bat dak, agilibu le jusa, uwo kelim, '' Tabisa, gum.'' Yela hia fata uyun, wa ayinu Buturus hia gum fok. ⁴¹ Buturus biga midu le hia iden tou wa arfa hia fok; wa zaman uwo nadi al mumini wa al aramil, uwo gedimu hia hayi le umon. ⁴² Al hadas de kan biga maruf hawli kulu Yafa, wa nas ketir amin fi Rabana. ⁴³ Biga hasal kan Buturus geni ayam ketir fi Yafa ma al rajil ismu Saman, al dabak.