¹ Inak kan fi rajil fi medina ta Kaisaria, ismu yau Kornelius, al dabit fi ketiba miya al tabi le jes ta ² Italia. Uwo kan rajil amin, wahid al gi abidu Allah ma kulu usra tou; uwo gi wedi gurus ketir le delin al masakin, wa uwo gi seli be istimrar le Allah. ³ Kan ze sa tisa ta nahar, uwo ayinu roiya wadi malaika ta Allah ja le uwo. Al malaika kelim le uwo,'' Kornelius!'' ⁴ uwo ayinu le malaika wa kan kafu wa kelim, '' De yau sunu, ya said?'' Malaika kelim le uwo, '' Salawat taki wa hadiat taki le al masakin rua fok ze tekdima zekiru fi gidam ta Allah. ⁵ Hasa rasulu rujal le medina ta Yafa ashan jibu al rajil ismu Saman al gi nadi Buturus. ⁶ Uwo gi geni le al dabak ismu Saman, al bed tou fi taraf al bahar.'' ⁷ Zaman al malaika al wonusu ma uwo rua, Kornelius nadi itniin min kudam ta bed tou, wa asakir al umana min wasat ta delin al gi akdimu uwo. ⁸ Kornelius weri le umon kulu haja al hasil wa rasulu umon le Yafa. ⁹ Inak fi yom al tani fi sa sita, ze ma umon fi mamoria wa biga kan gerib le al medina, Buturus rua fi gurfa fok ashan bi seli. ¹⁰ Uwo biga jian wa kan der haja al bi akulu, lakin wekit kan lisa gi rakabu akil, kan wedi le uwo roiya, ¹¹ wa uwo aiynu sama fata wa haja tani ze milaya kebir nezilu tehet le al ard, nezilu tehet fi arba tijahat tou. ¹² Fogo kan kulu sikil ta haiwanat al indu arba kura wa hajat al gi dowuru be dus fi al ard, wa tiyur al fi sama. ¹³ Yela sot wonusu le uwo: '' Gum, ya Buturus, katulu wa akulu. ¹⁴ ''Lakin Buturus kelim, ''La kida, Rabana; ana ma bi akulu ayi haja al ma nedif wa nigis.'' ¹⁵ Lakin al sot kelim le uwo tani mara:'' Haja al Allah kalas nedifu, mata nadi gali uwo nigis.'' ¹⁶ De hasil talata marat; yela biga milaya al fogo mokulugat de kan tawali arfau bara min uwo le sama. ¹⁷ Zaman lisa Buturus lisa mudarbak an sunu yau al roiya al uwo ayinu de bi gasit, tawali , rujal al Kornelius rasulu de wosulu wogifin gidam al bab, bat umon kan asalu le sika al bi silu umon le bed. ¹⁸ Umon nadi wa asalu kan sey Saman, al kaman ismu Buturus, gi geni inak. ¹⁹ Ze ma Buturus kan lisa bi fekir an roiya de, Roho kelim le uwo, '' Fi, talata rujal gi fetisu fogo ita. ²⁰ Gum wa nezil tehet wa rua ma umon. Mata aba ashan bi rua ma umon, ashan Ana yau rasulu umon.'' ²¹ Kida Buturus gum nezil tehet le rujal del wa kelim, ''Ana yau uwo al itakum gi fetisu de. Malu itakum ja ini?'' ²² Umon kelim, '' Al dabit ismu Kornelius, rajila al bar wa al gi abidu Allah, wa al gi wonusu an kuwes tou ma kulu al uma al Yahudia, kan weri ma malaika al kudus ta Allah ashan bi rasulu le ita kede ja fi bed tou, ashan uwo asma le al risala min ita.'' ²³ Kida Buturus rahibu umon fi juwa wa geni ma umon. Fi sabah al tani uwo gum fok wa rua ma umon, ma bat min akuwana min Yafa gedimu uwo. ²⁴ Fi yom al tani umon ja le Kaisaria. Kornelius kan gi istena fogo umon; uwo kan nadi usra tou wa zumala al gerib ma uwo sawa. ²⁵ Al hasil zaman Buturus wosulu , Kornelius gabilu uwo wa raka tehet be rukba tou le ibada ta uwo. ²⁶ Lakin Buturus sadu arfa uwo fok, kelim, ''wegif fok! Ana kaman insan ze ita.'' ^{27 29} Wekit Buturus kan gi wonusu ma uwo, uwo dakalu jua wa ligo nas ketir limu sawa. ²⁸ Uwo kelim le umon, '' Itakum be nefsa takum aruf gali ma ganuni le insan Yahudi ilaka ma au bi rua le ziara ayi wahid min beled tani. Lakin Allah kan weri le ana gali kede ma kelimu ayi zol nijis au ma nedf. De yau le ana ja bidun ayi nengneng, zaman ana rasulu wa hasa ja. Kede ana asalu ita le ita nadi ana?.'' ^{30 33} Kornelus kelim, '' Arba ayam al fat fi zaman zede, Ana kan gi seli fi tisa fi bed tai; wa ayinu, al rajil wagif gidam tai labis gumas al gi lama. ³¹ Uwo kelim, ' Kornelius, salawat taki kalas asmau ma Rabana, wa hadiat taki le al masakin kan zekiru Allah an ita. ³² Kede ita rasulu zol tani le Yafa, wa nadi zol le ita ismu Saman al gi nadi Buturus. Uwo gi geni fi bed ta al dabak ismu Saman, be gadi le bahar.' Kida tawali Ana rasulu le ita. Ita amin wa ja. Hasa kida, anina yau kulu ini mojudin fi gidam ta Allah, le asuma ayi haja al kan weri le ita ma Rabana wa kelimna.'' ³⁴ Biga Buturus fata kasma tou wa kelim, '' Hagiga, Ana aruf gali Allah ma le tija ta zol wahid( unsuria) . ³⁵ Lakin, fi kulu uma ayi wahid al gi abidu wa gi amulu amail al bir uwo mokbul le Uwo. ³⁶ Itakum aruf al risala al Uwo rasal le nas ta Israil, zaman Uwo alinu kabar al kuwes an salam be wasat Yesua al Mesih, uwo yau Rabana ta kulu - ³⁷ itakum be nufus takum aruf al ahadas al kan hasil, al kan hasil hawuli kulu Yahudia, bada fi Jelil, bat al mamudia ta Yuohana al mamadan alinu; al ³⁸ ahadas an Yesua al Nasiri, kef Allah masao uwo ma Roho al Kudus wa ma guwa. Uwo kan gi amulu haja kuwes wa gi aliju kulu delin al kan asuru ma ibilis, lianu Allah kan ma uwo. ³⁹ Anina yau shuhudin ta kulu hajat al Yesua amulu, ⁴⁰ kan fi beled ta al Yahudin wa fi Arselim. Umon katulu uwo be selibu uwo fok al selib, ⁴¹ lakin Allah gawomu uwo fok fi yom nimra talata wa sibu uwo asan bi ayinu, ma be nas kulu, lakin le shuhudin al kan iktaru min bediri ma Allah _ ma anina al akulu wa asrab ma uwo bat uwo gam min bain al amuat del. ⁴² Uwo amiru anina ashan bi besiru le nas wa alinu gali de yau al wahiid al kan iktaru ma Allah ashan bi kun Gadi ta delin al hayi wa al mayitin. ⁴³ De yau le uwo al kulu al ambia kan gi sahidu, ashan kida ayi wahid al bi amin fi uwo bi ligo gufran le katiat be wasat isim tou.'' ⁴⁴ Wekit Buturus kan lisa gi wonusu hajat del, al Roho Kudus nazal fogo kulu delin al kan gi asma le risala tou. ⁴⁵ Al nas al tabein le mojumu ta al mutahirin - kulu ta delin al ja ma Buturus _ kan istagarab, ashan al hadia ta al Roha al Kudus kan kubu kaman le al umamien. ⁴⁶ Biga umon asma Umamien del gi wonusu ma lugaat tani wa gi sabihu Allah. Biga Buturus juabu, '' ⁴⁷ Fi wahid bi abusu moyo min nas del ashan kede umon ma bi amidu, nas del al kaman akudu al Roho al Kudus ze anina kaman?'' ⁴⁸ Yela uwo amiru umon ashan kede amidu fi al isim ta Yesua al Mesih. Biga umon asalu uwo kede geny ma umon le ayom ketir.