¹ Kale uChala akayughagha nabanyenya bitu ukwendela mubasololi mutubalilo utwingi, sona namusila syakulekanalekana. ² Loli mumasiku aghabumalilo agha akuyugha numwe ukwendela mumwana wake, yo akamwimika ukuti apyane ifindu fyosi, sona akapela ichisu chapasi ukwendela mwake. ³ Umwana ko kubala kwa bukulu bwa Chala sona chifwani ichenecho icha Chala. Umwene achikwete ichisu chosi namasyu ghake aghamaka. Bo atisya imbibi sya bandu, akikala pachitengo icha njindi kunyobe indilo iya Chala uwamaka ghosi. ⁴ Umwana wa Chala mukulu ngani ukukila abandumi ba kumwanya pakuba lyita lyo uChala akamupa, lya pamwanya ngani ukukila namita ghabo. ⁵ Pakuti uChala atamubusisyepo nayumo uwandumi wake ukuti, "Uwe, we mwana wangu, umusughu naba ne ghuso." Pamu ukuyughapo isya wandumi yumo ukuti, "Ngwisa pakuba ne wise, po umwene akwisa pakuba mwana wangu." ⁶ Sona bo uChala ali pipi pakumutuma umwana akatote muchisu chapasi, "Abandumi bosi aba Chala aba kumwanya, bamuchindikenge." ⁷ Isya bandumi ba kumwanya uChala akati, "UChala akubapela abandumi bake abakumwanya pakuba ba lubilo ngati yo mbepo, sona akubapela ababombi bake pakuba ndimi sya mulilo." ⁸ Loli bo uChala akuyugha isya mwana wake, akati, "Wee Chala, ichitengo chako icha bunyafyale tise chibeko bwile na bwile. Ubugholofu yo ngomu ya bunfafyale bwako. ⁹ Mukuchighana ichindu ichigholoke, sona mukuchibenga ichibibi. Ichi chocho chifukwa uChala, yo uChala winyu, akabapakasya na mafula gha bugholofu ukukila abamanyani binyu." ¹⁰ UChala akuyugha sona akati, "We Malafyale, uwe, wewe ukala ulufulugha lwa chisu chapasi pabwandilo, sona kumwanya syo mbombo sya nyobe syako. ¹¹ Ifindu fyosi fifi fikuya pakusimila, loli uwe tiukabengeko, tise fimale ngati yo myenda. ¹² Tise ufipetenganie ngati uselekesya, sona tise fichuje ngati gho mwenda. Loli uwe, utakuchenjapo lumolumo." ¹³ Nayumo uwandumi wakumwanya yo uChala amubusisyepo lumo ukuti, "Ikala kunyobe yangu indilo, mupaka mbabike abalwani bako pasi pa nyayo syako". ¹⁴ Loli abandumi ba kumwanya babombibu. Abene syo mbepo syo sikumubombela uChala, sona syo situmiwe pakubabombela abandu, bo bakuya pakupokiwa.