¹ Wan, Yesus masuk lagi ka sinagoge, di sana ada saikung urang nang tangannya lumpuh sabalah. ² Buhannya mangamati Yesus sambil maitihi apakah Sidin cagar manyambuhakan urang nitu pada hari Sabat sahingga buhannya kawa manuduh sidin. ³ Lalu, Yesus baucap ka urang nang tangannya lumpuh sabalah nitu, "Badirilah di tangah tangah." ⁴ Wan, Yesus baucap ka buhannya, "Apakah kawa babuat baik atawa babuat jahat pada hari Sabat? Manyalamatakan nyawa atawa mambunuh?" Namun, buhannya hinip. ⁵ Imbah nitu, Yesus mamandang sakaliling buhannya lawan sarik. Sidin marista atas kakarasan hati buhannya. Lalu, Yesus baucap ka urang nang tangannya lumpuh nitu, "Ulurakan tangan ikam." urang nitu mangulurakan tangannya, lalu tangannya jadi sambuh. ⁶ Sabab nitu, urang-urang Farisi hancap tulak, wan mulai basekongkol lawan urang-urang Herodian nang malawan Sidin nang kayaapa mambunuh Sidin. Banyak Urang Maumpati Yesus ⁷ Namun, Yesus bajauh lawan murid-murid Sidin ka danau, wan urang-urang banyak matan wilayah Galilea maumpati Sidin, matan Yudea, ⁸ matan Yerusalem, Idumea, daerah sabarang sungai Yordan, wan matan sakitar Tirus wan sidon, banyak urang pas mandangar mujizat nang dilakuakan Yesus, mandatangi Sidin ⁹ Karana banyak urang, Yesus baucap ka bubuhan murid Sidin agar manyiapakan jukung gasan Sidin sahingga buhannya kada manggasak Sidin. ¹⁰ Karana Yesus sudah manyambuhakan banyak urang, maka barataan urang nang baisi panyakit tarus badasakan supaya kawa manggawil Sidin. ¹¹ Katika roh-roh najis maitihi Yesus, buhannya sujud di hadapan Sidin wan bakuciak, "Pian ini Anak Allah!" ¹² Namun, Yesus manangati buhannya supaya kada mambuka rahasia siapa Sidin. Yesus Manatapakan Dua Belas Murid Sidin ¹³ Lalu, Yesus naik ka bukit wan maundang urang-urang nang Sidin kahandaki gasan maumpati Sidin, buhannya datang ka Sidin. ¹⁴ Sidin manatapakan dua belas urang sahingga buhannya kawa maumpati Sidin wan Sidin kawa mautus buhannya bakhotbah, ¹⁵ wan manjulung kuasa gasan mausir setan-setan. ¹⁶ Yesus manatapakan dua belas urang : Simon (Yesus manyambat Petrus), ¹⁷ Yakobus, anak Zebedeus, wan Yohanes dingsanak Yakobus (nang Yesus sambat Boanerges, artinya "Anak-anak Guruh"), ¹⁸ Andreas, Filipus, Bartolomeus, Matius, Tomas, Yakobus, anak Alfeus, Tadeus, Simon urang Zelot, ¹⁹ wan Yudas Iskariot, nang manghianati Sidin Kuasa Yesus Tumatan Allah ²⁰ Imbah nitu, Yesus masuk ka sabuah rumah, urang-urang kambali bakarumun di sana sahingga Yesus wan murid-murid Sidin kada kawa makan roti. ²¹ Katika dingsanak Sidin mandangar hal ini, buhannya datang gasan mambawa Yesus babulik karana buhannya baucap Sidin kada waras lagi. ²² Ahli-ahli Taurat nang turun matan Yerusalem baucap "Sidin kerasukan Beelzebul!" wan "Sidin mangusir setan awan kuasa pemimpin setan." ²³ Lalu, Yesus mangiauw buhannya datang ka Sidin, wan baucap manggunakan parumpamaan, "Kawa kah Iblis mangusir Iblis? ²⁴ Jika sabuah karajaan tapacah-pacah malawan diri saurang, karajaan nitu kada kawa batahan. ²⁵ Wan, jika sabuah rumah tapacah-pacah malawan dirinya saurang, rumah nitu kada kawa batahan. ²⁶ Jika Iblis bangkit malawan dirinya saurang wan tapacah-pacah, inya kada kawa batahan, maka barakhirlah kisahnya. ²⁷ Kadada saurang pun kawa masuk ka rumah urang nang kuat wan marampok hartanya, kacuali labih dahulu inya manjarat urang nang kuat nitu, maka hanyar inya kawa marampok rumahnya." ²⁸ "Aku baucap nang sabujurnya ka ikam, sabarataan dosa manusia kawa diampuni, wan sabarataan hujatan nang buhannya ucapakan. ²⁹ Tapi, siapa nang manghujat Roh Kudus kada kawa diampuni, malainkan basalah karana dosa kakal." ³⁰ Sabab, ahli-ahli Taurat baucap, "Sidin karasukan roh najis." Dingsanak Yesus nang Sabujurnya ³¹ Imbah nitu, uma wan dingsanak Yesus datang wan badirian di luar rumah. Buhannya manyuruh urang gasan mangiauw Sidin. ³² Urang bakarumun mangalilingi Yesus wan buhannya baucap ka sidin,"Itihi, uma Pian wan dingsanak Pian di luar mancari Pian." ³³ Yesus manjawab buhannya wan baucap, "Siapakah uma-Ku wan dingsanak-Ku?" ³⁴ Lalu, Sidin mamandang urang-urang nang duduk mangalilingi Sidin wan baucap, "Itihi, ni uma-Ku wan disangsanak-Ku! ³⁵ Sabab, siapa haja nang malakukan kahandak Allah adalah dingsanak-Ku lakian, wan dingsanak-Ku binian, wan uma-Ku."