¹ Barapa hari imbah nitu, katika Yesus babulik ka Kapernaum, tadangarlah habar bahwa Sidin ada di rumah. ² Lalu, Banyak urang bakumpul sampai kadada ruang lagi, bahkan di higa lawang pun, Sidin manyampaiakan firman ka buhannya. ³ Lalu, buhannya mandatangi Sidin, mambawa urang lumpuh nang diusung oleh ampat urang. ⁴ Buhannya kada kawa mambawa urang nitu ka parak Yesus sabab banyak urang, buhannya mambuka atap di atas Yesus. Imbah mambukanya, buhannya manurunakan tilam wadah urang lumpuh nitu barabah. ⁵ Pas Yesus malihat iman buhannya, Sidin baucap ka urang urang lumpuh nitu, “Hai anak-Ku, dosa ikam sudah diampuni.” ⁶ Namun, babarapa ahli Taurat nang duduk di sana mulai bapikir dalam hati, ⁷ “Kanapa urang ini baucap kaya itu? Sidin manghujat! Siapa nang kawa maampuni dosa kacuali Allah saurang?” ⁸ Yesus langsung tahu dari dalam Roh Sidin bahwa buhannya bapikir dalam hati. Sidin baucap ka buhannya, “Mangapa ikam bapikir nangkaya itu dalam hati? ⁹ Manakah nang paling mudah, baucap ka urang lumpuh nitu, ‘dosa-dosa ikam diampuni’, atawa baucap, ‘bangun, angkat tilam ikam wan bajalanlah’? ¹⁰ Tapi, pahamilah bahwa Anak Manusia baisi kuasa di bumi gasan mangampuni dosa-dosa.” Yesus baucap ka urang lumpuh nitu, ¹¹ “Aku baucap ka ikam : bangun, angkat tilam ikam, wan bulik ka rumah ikam .” ¹² Urang lumpuh nitu hancap badiri, maambil tilam, wan tulak ka luar, dihadapan banyak urang. Barataan urang takjub wan mamuliakan Allah, sarta baucap, “kami kada sua malihat hal nangkaya ini!” Lewi Maumpati Yesus ¹³ Yesus tulak ka pinggir danau, wan barataan urang babondong-bondong datang ka Sidin, lalu Sidin mangajar buhannya. ¹⁴ Pas Sidin lewat, Sidin malihat Lewi, anak Alfeus, haratan duduk di wadah pambayaran pajak. Lalu, Yesus baucap ka inya, “Umpati Aku.” Lalu, Lewi badiri maumpati Sidin. ¹⁵ Paharatan Yesus duduk makan di rumah urang lewi nitu, ada banyak panagih pajak wan urang-urang badosa nang makan basama lawan Yesus wan murid-murid Sidin, karana di sana ada banyak urang, wan buhannya maumpati Yesus. ¹⁶ Katika babarapa ahli Taurat dari kalompok Farisi malihat Yesus parahatan makan basama lawan urang-urang badosa wan panagih-panagih pajak, buhannya batakun ka murid-murid Sidin, “mangapa Sidin makan lawan para panagih pajak wan urang-urang badosa?” ¹⁷ Pas Yesus mandangar, Sidin baucap ka buhannya, “Urang nang sehat kada parlu duktor, malainkan urang nang garing. Aku datang kada mangiaw urang-urang nang bujur, malainkan urang-urang badosa.” Partanyaan Tantang Bapuasa ¹⁸ Murid-murid Yohanes wan urang-urang Farisi haratan bapuasa. Buhannya datang wan batakun ka Sidin, “Kanapa murid-murid Yohanes wan murid-murid urang Farisi bapuasa, tapi murid-murid Pian kada bapuasa?” ¹⁹ Lalu, Yesus baucap ka buhannya, “Kawakah para pangiring pangantin bapuasa samantara pangantin lakian masih ada lawan buhannya? Salama pangantin lakian masih ada lawan buhannya, buhannya kada kawa bapuasa. ²⁰ Namun, harinya cagar datang pas pangantin lakian diambil dari buhannya, wan pada hari nitulah buhannya cagar bapuasa. ²¹ Kadada urang nang manambal baju lawas nang rabit lawan kain nang hanyar. Amun kaya nitu, tambalan kain nang hanyar cagar marabitakan baju nang lawas, wan rabitnya batambah ganal. ²² Kadada urang nang manuangakan anggur hanyar ka dalam kantong kulit nang lawas. Amun kaya nitu, anggurnya cagar marabitakan kantong kulit sahingga baik anggur maupun kantongnya cagar rusak sabaliknya anggur hanyar disimpan kadalam kantong kulit nang hanyar.” Yesus adalah Tuhan atas Hari Sabat ²³ Pada suatu hari Sabat, Yesus malewati ladang gandum, dalam parjalanan, murid-murid Sidin mulai mamatik bulir-bulir gandum. ²⁴ Lalu, urang-urang Farisi baucap ka Sidin, “Lihat, kanapa buhannya malakuakan apa nang malanggar hukum hari Sabat?” ²⁵ Lalu, Sidin baucap ka buhannya, “Balum suahkah ikam mambaca apa nang diolah Daud waktu inya wan urang-urang nang basama inya haratan kakurangan wan lapar? ²⁶ Kaya apa inya masuk ka Rumah Allah pada masa Abyatar manjabat sabagai Imam Basar, wan makan roti parsambahan, nang hanya kawa dimakan oleh para imam, wan manjulung roti nitu ka urang-urang nang maumpati inya?” ²⁷ Imbah nitu, Yesus baucap ka urang-urang Farisi “Hari Sabat dibuat gasan manusia, bukan manusia gasan hari Sabat. ²⁸ Jadi, Anak Manusia adalah Tuhan, jua atas hari Sabat.”