¹ Yesus baucap, lawan sesungguhnya, Aku bapada ka ikam, urang nang masuk ka kandang domba lawan kada malalui lawang, malainkan lawan mamanjat malalui jalan lain, urang itu adalah maling wan parampok. ² Tatapi, urang nang masuk malalui lawang, inya adalah gembala domba. ³ Bagi inya, penjaga lawang mambukakan lawang, wan domba-domba mandangar suaranya, inya mangiau domba-dombanya saurang lawan ngaran buhanya, serta manuntun buhanya keluar. ⁴ Imbah mangaluarkan sabaratan dombanya, inya bajalan di muka buhanya wan domba-dombanya cagar maumpati inya sabab buhanya pinandu lawan suaranya. ⁵ Urang asing kada cagar diumpati buhanya, tatapi buhanya cagar lari matan inya sabab buhanya kada mangenal suara urang-urang asing. ⁶ Perumpamaan nitulah nang diucapkan Yesus ka buhanya, tatapi buhanya kada mangarti apa nang baru haja di ucapkan Yesus ka buhanya. ⁷ Uleh sabab itu, Yesus baucap lagi ka buhanya, sesungguhnya, Aku baucap ka ikam, Akulah lawang ka domba-domba itu. ⁸ Sabarataan urang nang datang sebelum Aku adalah maling wan perampok, tatapi domba-domba kada mandangar buhanya. ⁹ Akulah lawang. Jika sasaurang masuk malalui Aku, inya cagar di selamatkan, wan cagar kaluar masuk, serta menemukan padang rumput. ¹⁰ Maling datang hanya gasan mancuntan, mambunuh, wan mambinasakan; Aku datang supaya buhanya memiliki hidup, wan memilikinya secara balimpah. ¹¹ Akulah gembala yang baik; gembala nang baik mambari nyawa-Nya bagi domba-domba. ¹² Saurang upahan, bukan saurang gembala, nang bukan ampun domba-domba itu, malihat serigala datang, inya maninggalkan domba-domba itu wan lari; serigala itu cagar menerkam wan mencerai-beraikan domba-domba itu. ¹³ Inya lari sabab inya saurang upahan wan kada peduli lawan domba-domba. ¹⁴ Akulah gembala nang baik. Aku pinandu domba-domba-Ku wan domba-domba-Ku pinandu lawan Aku. ¹⁵ Sama kaya Bapa pinandu lawan Aku wan Aku pinandu lawan Bapa; Aku mambarikan nyawa-Ku bagi domba-domba itu. ¹⁶ Aku jua mempunyai domba-domba lain nang bukan matan kandang ini; Aku harus mambawa buhanya jua, wan buhanya cagar mandangar suara-Ku; wan buhanya cagar manjadi satu kawanan lawan satu gembala. ¹⁷ Sabab inilah Bapa mangasihi Aku, sabab Aku mambarikan nyawa-Ku supaya Aku kawa maambilnya. ¹⁸ Kada saikung pun maambilnya dari-Ku, malaikan Akulah nang mambari menurut kehendak-Ku saurang. Aku mampunyai hak gasan mambari nyawa-Ku, wan Aku jua mampunyai hak gasan maambilnya pulang. Inilah perintah nang Aku terima matan Bapa-Ku. ¹⁹ Sekali lagi, ada perpecahan di antara urang-urang Yahudi karna ucapan Yesus itu. ²⁰ Banyak matan buhanya nang baucap, Sidin karasukan roh jahat wan manjadi gila. Kenapa kalian mandangarkan Sidin? ²¹ Nang lain baucap, itu bukan ucapan saurang nang karasukan roh jahat. Kawakah roh jahat mambuka mata urang picak? Yesus wan Bapa adalah Satu ²² Pada waktu itu, hari raya penahbisan balangsung di Yerusalem. Saat itu musim dingin, ²³ wan Yesus parahatan bajalan di Bait Allah, yaitu di Serambi Salomo. ²⁴ Lalu urang-urang Yahudi bakumpul mangelilingi sidin wan baucap ka sidin, berapa lama lagi pian membiarkan jiwa kami bimbang? Jika Pian Kristus, ucapkanlah terus terang ka kami. ²⁵ Yesus manjawab buhanya, Aku sudah bapadah ka ikam, tapi ikam kada parcaya. Gawian-gawian nang Aku lakukan dalam ngaran Bapa-Ku, itulah nang mambarikan kasaksian tentang Aku. ²⁶ tatapi, ikam kada parcaya karna ikam kada tamasuk domba-domba-Ku. ²⁷ Domba-domba-Ku mandangar suara-Ku, Aku manganal buhanya wan buhanya maumpati Aku. ²⁸ Aku mambari hidup kekal ka buhanya, wan buhanya kada cagar pernah binasa; wan kada saikung pun kawa merebut buhanya matan tangan-Ku. ²⁹ Bapa-Ku, nang mambari buhanya ka Aku, labih ganal matan pada sabaratan, wan kadada saikung pun kawa merebut buhanya matan tangan Bapa. ³⁰ Aku wan Bapa adalah satu. ³¹ Sakali lagi, urang-urang Yahudi maambil batu gasan malempari Yesus. ³² Tatapi, Yesus baucap ka buhanya. Aku telah menunjukkan ka ikam banyak gawian baik matan Bapa, gawian manakah matan antaranya nang mambuat ikam handak malempari Aku lawan batu? ³³ Urang-urang Yahudi itu manjawab sidin, bukan karna suatu gawian baik kami handak malempari pian lawan batu, malainkan karna hujat; wan karna pian, nang hanya saurang manusia, manjadikan diri pian Allah. ³⁴ Yesus manjawab buhanya, Bukankah tatulis dalam kitab Taurat ikam, Aku telah berfirman, ikam adalah allah? ³⁵ Jikat Allah manyambat buhanya nang manerima firman itu allah, padahal Kitab Suci kada bisa di batalkan, ³⁶ apakah ikam bapadah tentang Sidin nang telah Bapa kuduskan wan utus ka dalam dunia, ikam menghujat, karna Aku baucap ka ikam, Aku adalah Anak Allah? ³⁷ Jika Aku kada melakukan gawian-gawian Bapa-Ku, jangan parcaya ka Aku. ³⁸ Tatapi, jika Aku melakukan gawian-gawian itu, meskipun ikam kada parcaya ka Aku, parcayalah cagar gawian-gawian itu supaya ikam tahu wan mengerti bahwa Bapa di dalam Aku, wan Aku di dalam Bapa. ³⁹ Sekali lagi, buhan mencoba manangkap Yesus, tatapi Sidin lolos matan buhanya. ⁴⁰ Lalu, Yesus tulak pulang manyeberangi sungai Yordan menuju ke wada Yohanes pertama kali membaptis dulu wan Yesus tiggal di sana. ⁴¹ Banyak urang datang ka Sidin wan baucap, Meskipun Yohanes kada melakukan satu tanda ajaib pun, tatapi sabaratan nang diucapkan Yohanes tentang urang ini nujur. ⁴² Wan banyak urang manjadi parcaya ka Sidin di sana.