¹ Kakanakan, taatilah kuitan ikam dalam Tuhan karana ini adalah hal nang bujur. ² "Hormatilah abah wan uma ikam," ini adalah parintah partama nang disertai lawan janji ³ "supaya hidup ikam baik wan ikam pacang baumur panjang di bumi". ⁴ Abah-Abah, janganlah mamicu anak-anak ikam manjadi sarik, tapi ganalakanlah buhannya dalam disiplin wan nasihat Tuhan. Nasihat gasan Hamba wan Tuan ⁵ Budak-budak, taatilah tuan ikam nang ada di dunia ini lawan hormat wan gentar, wan lawan katulusan hati kaya gasan Kristus. ⁶ Jangan kaya urang-urang nang manggawi gawian hanya gasan di lihat urang -- gasan mahimungakan manusia, tapi sabagai hamba-hamba kristus nang manggawi kahandak Allah dari hati. ⁷ Malayani lawah sepenuh hati kaya gasan Tuhan bukan gasan manusia. ⁸ Sabab, ikam tahu, entah inya budak atawa pun urang merdeka, jika inya manggawi hal nang bujur, Tuhan pacang manjulung upah ka inya. ⁹ Tuan-tuan, lakukanlah jua ka hamba-hamba ikam. Ampih mangancam karana tahulah Tuan ikam atawa Tuan bubuhannya sama-sama ada di surga, wan Sidin kada pilih kasih. Pakailah Sabarataan Sanjata Allah ¹⁰ Akhirnya, jadilah kuat dalam Tuhan wan dalam kuat kuasa Sidin. ¹¹ Pakailah sabarataan parlangkapan sanjata Allah supaya ikam kawa badiri malawan tipu daya Iblis. ¹² Sabab, parjuangan kita bukan malawan daging wan darah, tapi malawan pamarintah-pamarintah, panguasa-panguasa, kakuatan-kakuatan dunia kegelapan ini, wan malawan kakuatan roh dari si jahat nang ada di langit. ¹³ Karana nitu, pakailah sabarataan parlangkapan sanjata Allah supaya ikam kawa batahan waktu hari nang jahat tu datang, wan imbah sabarataan habisan ikam tatap badiri. ¹⁴ jadi, badirilah teguh, lawan kancangakan ikat pinggang kabanaran di pinggang ikam wan pakailah baju zirah kaadilan, ¹⁵ wan pasanglah alas kaki ikam lawan kasiapan Injil damai sajahtra. ¹⁶ Dalam sagala hal, ambillah parisai iman gasan ikam kawan mamadamakan sabarataan panah api dari si jahat. ¹⁷ Ambilah katopong kasalamatan lawan parang Roh, yaitu firman Allah, ¹⁸ sambil badoa satiap waktu dalam Roh lawan sabarataan doa wan parmohonan. Dalam doa ikam nitu, bajaga-jagalah lawan sagala katakunan sambil manaikakan sabarataan parmohonan gasan sabarataan urang kudus. ¹⁹ Badoalah jua gasan ulun supaya waktu ulun mambuka muntung ulun, pandiran dikaruniakan gasan ulun sahingga ulun wani mahabarakan rahasia Injil. ²⁰ Karana Injil nitulah, ulun manjadi utusan nang terbelenggu. Doakanlah supaya ulun kawa mahabarakannya lawan wani kaya apa saharusnya ulun bapandir. Salam Terakhir ²¹ Tikhikus, dingsanak saiman ulun nang terkasih wan palayan nang satia dalam Tuhan, pacang mahabarakan sagala sasuatu ka ikam supaya ikam jua tahu kaya apa kaadaan ulun wan apa nang ulun olah. ²² Ulun memang mautus inya ka ikam gasan tujuan ini, yaitu supaya ikam tahu habar kami wan supaya ikam kawa mahibur hati ikam. ²³ Damai sejahtera gasan dingsanak-dingsanak saiman, wan kasih lawan iman dari Allah Bapa wan Tuhan Yesus Kristus. ²⁴ Anugerah menyertai sabarataan urang nang mangasihi Tuhan kita, Kristus Yesus, lawan kasih nang kada pacang binasa.