¹ Dahulu, ikam mati dalam palanggaran-palanggaran wan dosa dosa ikam, ² nang mana waktu nitu ikam bajalan maumpati jalan dunia, maumpati panguasa karajaan udara, roh nang wayahini bagawi di antara kakanakan nang kada taat. ³ Diantara buhannya, kita sabarataan dahulu jua hidup dalam nafsu kadagingan kita, mamuasakan kahandakan daging wan pikiran kita. Kita pada dasarnya adalah kakanakan durhaka, nangkaya manusia lainnya. ⁴ Akan tatapi, Allah, nang sugih lawan belas kasih wan karana kasih Sidin nang besar nitu Sidin mangasihi kita, ⁵ bahkan waktu kita mati dalam palanggaran-palanggran kita, Sidin mahidupakan kita baimbai lawan Sidin -- oleh anugerah ikam sudah disalamatakan --, ⁶ wan Sidin mambangkitakan kita lawan Sidin wan mandudukakan kita baimbai lawan Sidin di surgawi dalam Yesus Kristus, ⁷ supaya pada masa nang pacang datang, Sidin kawa manunjukakan kakayaan anugerah Sidin nang kada taukur dalam kabaikan Sidin ka kita dalam Yesus Kristus. ⁸ Sabab, oleh anugerah ikam disalamatakan malalui iman wan ini lain dari diri ikam saurang, tapi karunia Allah, ⁹ lain hasil usaha ikam, supaya kadada saurang pun nang manyombongakan diri. ¹⁰ Kita ini olahan Allah, diciptakan dalam Yesus Kristus gasan manggawi gawian nang baik nang disiapakan Allah sabalumnya supaya kita kawa hidup di dalamnya. Diparsatuakan dalam Kristus ¹¹ Karana nitu, ingatakan bahwa ikam dahulu lahir sabagai urang kafir, nang disambat "urang kada basunat", oleh buhannya nang manyambat diri sabagai "urang basunat", yaitu sunat nang dilakukan pada awak oleh tangan manusia. ¹² Ingatakanlah waktu nitu ikam hidup tanpa Kristus, tapisah matan kawargaan Israel wan urang-urang asing gasan ikatan parjanjian nang dijanjiakan, kada baisi pangharapan wan tanpa Allah dalam dunia ini. ¹³ Namun, wayahini dalam Yesus Kristus, ikam nang dahulu sangat jauh sudah dibawa manjadi parak oleh darah Kristus. ¹⁴ Sabab, Sidin saurang adalah damai sajarhtara kita nang sudah maolah kadua belah pihak manjadi satu wan nang sudah mahancurakan tembok parmusuhan nang mamisahakan, ¹⁵ lawan mahapusakan parmusuhan dalam daging Sidin, yaitu Hukum Taurat nang baisi parintah-parintah wan katatapan-katatapan sahingga di dalam diri-Nya Sidin maolah kaduanya manjadi satu manusia hanyar, sahingga tajadi pardamaian, ¹⁶ wan mandamaiakan kaduanya lawan Allah dalam satu awak malalui salib, sahingga mamatiakan parmusuhan. ¹⁷ Sidin datang wan manjulung damai sajahtra gasan ikam nang jauh wan damai sajahtra ka buhan nang parak. ¹⁸ Sabab, malalui Sidin, kita badua baisi jalan masuk ka Bapa dalam satu Roh. ¹⁹ Jadi, ikam bukan lagi urang-urang asing wan pandatang, tatapi sasama warga lawan urang-urang kudus wan anggota-anggota dingsanak Allah, nang dibangun di atas dasar para rasul wan para nabi, lawan Yesus Kristus saurang sabagai Batu panjurunya. ²¹ Dalam Kristus, sabarataan bangunan sedang diparsatuakan basama wan batumbuh manjadi Bait Suci dalam Tuhan. ²² Dalam Sidin, ikam jua dibangun basama manjadi wadah bagana Allah dalam Roh.