¹ Akhirnya, dingsanak sabarataan, badoalah hagan kami, nyaman firman Tuhan dapat lakas tasebar wan dimuliaakan, nang kaya tajadi diantara buhan pian, ² wan supaya kami dilepasakan dari urang-urang nang kejam wan jahat karena kada sabarataan urang nang baisi iman. ³ Namun, Tuhan tu setia. Sidin akan manguatakan wan malindungi pian matan nang jahat. ⁴ Kami baisi kayakinan dalam Tuhan tentang pian bahwa pian parahatan manggawi wan akan tarus manggawi apa nang kami parintahakan. ⁵ Kiranya Tuhan mearahakan hati pian ka kasih Allah wan kepada ketabahan Kristus. (Kawajiban gasan Bagawi) ⁶ Dingsanak barataan, wahini kami perintahakan ka pian, dalam ngaran Tuhan kita, Yesus Kristus, supaya pian manjauhakan diri dari dingsanak-dingsanak nang hidup baleha-leha wan kada sasuai lawan ajaran nang pian terima dari kami. ⁷ Pian tahu surang kaya apa pian musti meneladani kami karena kami kada baleha-leha katika kami bersama pian. ⁸ Pabila kami makan wadah urang, kami tatap mambayarnya. Wan jua, kami barusaha wan bakarja karas siang wan malam nyaman kami kada manjadi beban hagan siapa haja diantara pian ⁹ Lain karena kami kada baisi hak gasan ngitu, melainakan gasan mambariakan diri kami sorangan contohnya gasan pian nyaman pian umpati. ¹⁰ Katika kami masi lawan pianpun, kami mambari parintah ngini:"Mun urang kada handak bagawi, kada usah inya makan." ¹¹ Sabab, kami mandangar ada beberapa diantara pian nang hidup baleha-leha, kada hanadk bagawi , tapi haur awan hal-hal nang kada bafaidah. ¹² urang nang kaya itu kami parintah akan wan kami nasihati dalam ngaran Tuhan Yesus Kristus bagawi awan tenang wan jua makan rotinya saurang. ¹³ Padahal pian, dingsanak-dingsanak ulun, janganlah pian lapah babuat baik. ¹⁴ Mun ada urang nang kada paham apa nang kami padahakan dalam surat ngini, tandailah urang itu wan kada usah bagaul wan inya nyaman inya supan. ¹⁵ Tapi, jangan maanggap inya nang kaya musuh, tatapi tagur inya sabagai dingsanak. (Kata-kata Panutup) ¹⁶ Tuhan damai sejahtera sakiranya mambari pian kadamaian sampai salawasan wan dalam sagala kaadaan. Tuhan manyertai pian sabarataan. ¹⁷ Ulun, Paulus, manulis salam ini awan tanganku surang sabagai tanda keaslian surat ulun. kaya itu ulun manulisnya. ¹⁸ Anugerah matan Tuhan kita, Yesus Kristus mairingi pian sabarataan.