¹ Wayahini, manganai kadatangan Tuhan kita, Yesus Kristus, wan rahat dikumpulakannya kita basama lawan Sidin, kami maminta bubuhan dingsanakku, ² supaya pian kada lakas bingung dalam pikiran pian atawa galisah saat mandangarakan bahwa hari Tuhan cagar datang, baik matan roh atawa surat nang saulah-ulah matan kami. ³ Jangan biarakan ada urang manyasatakan pian lawan cara apapun. Sabab, hari tu kada kawa datang sebelum kamurtadan datang wan si manusia jahat dinyataakan, yaitu si anak kabinasaan. ⁴ Nang malawan wan maninggiakan dirinya tahadap sabarataan nang disambat allah atawa nang disambah urang; wan inya cagar mangambil wadah duduk di Bait Allah wan manyataakan dirinya sebagai Allah. ⁵ Kada ingatkah pian bahwa katika ulun masih basama pian, ulun mambaritahukan hal ini gasan pian? ⁶ Wayahini pian tahu apa nang manahan inya sahingga hanyar saatnya kaina, inya cagar dinyataakan. ⁷ Sabab, misteri kedurhakaan sadang bagawi, hanya inya nang wayahini manahannya cagar tatap manahannya sampai inya disingkirakan. ⁸ Imbah nitu, urang jahat cagar dinyatakan. Amun, Tuhan cagar mambunuhnya lawan pahinakan mulut Sidin wan manghilangakannya lawan kadatangan Sidin. ⁹ Kadatangan urang jahat nitu cagar sama lawan gawian Iblis, diimbaiyakan lawan sagala macam kuasa, tanda-tanda ajaib, wan mujizat-mujizat palsu; ¹⁰ lawan nang sabaratan niat jahat buhannya nang cagar binasa sabab buhan manolak gasan mangasihi kabanaran pacangan disalamatakan ¹¹ uleh sabab itu, Allah mangirim kesesatan nang hibat ka atas buhannya supaya buhannya parcaya lawan kabuhungan, ¹² sahingga buhan barataan kawa dihakimi, yaitu buhan nang kada parcaya lawan kabanaran wan sanang lawan kajahatan. ¹³ buhan dingsanak nang dikasih Tuhan, kami kami harus salalu basyukur lawan Allah gasan pian. Sabab, Allah sudah mamilih pian tumatan dahulu gasan disalamatakan malalui pangudusan uleh Roh wan iman dalam kabanaran. ¹⁴ gasan itulah Allah mangiau pian malali Injil nang kami habarakan supaya pian mandapatakan kamuliaan Tuhan kita, Yesus Kristus. ¹⁵ maka, buhan diangsanak, badirilah taguh wan pingkuti ajaran-ajaran nang sudah diajarakan gasan pian, baik malalui pandiran atawa malalui surat kami. ¹⁶ Wayahini, kiranya Tuhan kita, Yesus Kristus saurang, wan Allah Bapa kita, nang sudah mangasihi kita wan mambari kita panghiburan kakal wan pangharapan nang indah malalui anugerah, ¹⁷ manghibur wan manguatakan hati pian dalam satiap gawian wan panderan nang bujur.