¹ Salam dari Paulus, Silwanus, wan timotius, gasan jemaah di Tesalonika dalam allah, Bapa kita, wan Tuhan Yesus Kristus. ² Anugerah wan damai sejahtera gasan pian dari Allah, Bapa kita, wan Tuhan Yesus Kristus. ³ Kami kada bisa kada basyukur wan Allah gasan pian, dingsanak barataan, wan mula harus kaya itu. Sabab, iman pian batumbuh malimpah wan jua kasih pian gasan sasama kita samakin ganal. ⁴ Ulih sabab itu, kami bangga bakisah tentang pian di muka babuhan jemaah Allah karana kasabaran wan iman pian di tangah panganiayaan wan kasangsaraan nang pian rasaakan. (Tentang Penghakiman Allah) ⁵ Inilah bukti panghakiman nang adil dari Allah, bahwa pian dianggap layak gasan Karajaan Allah karana pian sudah mandarita jua. ⁶ Adil gasan Allah mambalas awan panindasan urang nang maulah pian mandarita, ⁷ tapi Sidin mambari kelegaan gasan pian nang ditindas, kaya itu jua lawan bagian kami, waktu Tuhan Yesus dinyatakan dari surga baimbai wan malaikat Sidin nang dahsyat, ⁸ dalam api nang manyala, gasan mambalas urang nang kada pinandu lawan Allah wan kada maasi lawan injil Yesus , Tuhan kita. ⁹ buhannya pacangan marasaakan hukuman kabinasaan nang kekal, jauh dari hadirat Tuhan wan kemuliaan kekuasaan Sidin. ¹⁰ waktu Sidin datang gasan dimuliakan di antara urang-urang kudus Sidin wan gasan dikatujui sabarataan urang nang parcaya -- Sabab kasaksian kami gasan pian dipercaya. ¹¹ Ulih sabab itu, kami badoa gasan pian, mudahan Allah maanggap pian layak akan panggilan wan mamanuhi sabarataan kahandak pian gasan manggawi nang baik lawan iman wan kuasa Sidin, ¹² supaya ngaran Tuhan Yesus dimuliaakan di dalam pian, wan pian di dalam Sidin, sasuai lawan anugerah Allah kita wan Tuhan Yesus Kristus.