¹ Ttö CHI̧Ä̧NÄ̧HUA̧ Dio, ¡ttömä ucu tta̧cua̧ra̧ttö̧ pä'ötä kö̧sä̧! Chö̧ji̧pö̧nä̧ ppä'ädittö jitö ttörö ru̧huä̧rä̧tö̧ttö̧. ² Ja̧'hua̧'a̧nö̧ jo̧ca̧'a̧ jö̧ttö̧mä̧, jahuätötä si'epö tti̧cuä̧cua̧sä̧ mu yähui 'cua̧rö̧nä̧tä̧, po̧u̧cu̧nä̧ sesepö icu, ya̧tȩ'inä to'öttömä ttörö ppä'ädö. ³ Ttö CHÖ̧Ä̧NÄ̧HUA̧ Dio, ttömä jȩpo̧'cö̧ pinö̧sä̧ chabo iyotö jȩchi̧nö̧ pättömä; ttö chu̧mu̧nä̧mä̧ juiya'a suronä jȩchi̧nä̧mä̧. ⁴ Ya̧tȩrö̧'inä suronämä jȩcho̧ca̧'a̧ttö̧ huȩnȩmä̧ jui̧'a̧sä̧, amucuädäcuä juiyönä ttörö öjö'cö juiyönä hua̧rö̧ suronä jȩchi̧nö̧ttö̧mä̧. ⁵ Yapare pädoca'a jö̧ttö̧mä̧, ja̧'a̧tä̧ topittö chabo'iyotä ruhui'ö 'chuttäda'anä; cha̧'cua̧ra̧'a̧nä̧ chidepä rȩjȩ rotö ttite'chähua'anä ja̧'a̧tä̧ topittö ja̧'hua̧ta̧'a̧nö̧ juȩnȩtä̧ i̧sa̧ppȩnä̧ dä'ättu'u chö̧'a̧'a̧nä̧ ja̧'a̧tä̧ topittö. ⁶ CHÖ̧Ä̧NÄ̧HUA̧ cu̧'ä̧i̧cu̧ ä̧rä̧mi̧'i̧tö̧; Chabo'iyotörö cu̧'ä̧i̧cu̧ ä̧rä̧mi̧'i̧; ttörö adihuäcua'anö porächi'i ja̧'hua̧nö̧ pärächi'ö yä̧huä̧'i̧nä̧ ja'huätörö pätetö cu̧ju̧ni̧nö̧ i̧jȩpi̧tö̧. ⁷ Ttö̧ja̧mä̧ ji̧nä̧ yo̧mȩtȩ ca̧ca̧cuä̧tö̧ ucu cu̧jo̧mȩ sobucuächönä; ucutä cu̧juo̧juo̧mȩnä̧ jue'i ja'huätörö. ⁸ CHIÄ̧NÄHUA̧, pi̧jä̧ ttö̧ja̧rö̧ pä'icuähuä'i̧sä̧jä̧; i̧jȩpi̧ttö̧ huȩnȩtä̧rö̧ ttucuocua pe'ömä huocösä, CHIÄNÄ̧HUA̧, jitämä huȩnȩ juiyönä kö̧sä̧, CHIÄNÄHUA̧. ⁹ Ja̧'hua̧nö̧ jö̧ttö̧mä jarodä'chätörömä ro̧ȩpi̧tö̧ juayabo surojö jȩtti̧yä̧cua̧'a̧nö, DIOS päcuta'anö hua̧mä, ttö̧ja̧ päcuta'anö jȩpä̧tö̧rö̧mä jahuätörö ppä'ädi, ucumä, ttämiso'qui'inä ja̧'hua̧ta̧'a̧nö̧ ttämucuädö'inä huo̧ju'a̧jä. ¹⁰ DIOS tä tta̧hua̧ra̧'a̧nä kö̧sä̧ ttörö tto̧'ȩcuä̧rä̧ cuähuäbi jö̧nämä, ttämucuädö o'cajuiyönä ku̧huo̧juä̧'u̧ru̧mä ppäädöjä. DIOSMÄ jue'ötä pä'icuähuäi̧sä̧. ¹¹ DIOSMÄ moro̧ jö̧ a̧'u̧cuä̧ jarodätörötä ujö'quiyönä hua̧. ¹² Ya̧tȩ ttö̧ja̧sa su̧ro̧nä̧ jȩä̧ji̧ jaroi'ö juiyöttömä̧, Diosmä ucurä'chu sa̧huȩpä̧cua̧ ja̧'hua̧ta̧nö̧ jo̧mȩnö̧ jȩpö̧ u̧ju̧nä̧cua̧ u'cuopobunä curä örohuähua pä'ötä. ¹³ Ja̧u̧mä̧ jo̧mȩnö̧ jȩpö̧ ku̧nö̧ curä rohuäucuähuä ja̧u̧cu̧ örohuähua pä'ö; Ja̧u̧mä̧ u̧'po̧pa̧ri̧ ocurä cuo̧á̧ri̧ aditö. ¹⁴ A̧mu̧cuädi ttö̧ja̧sa̧ su̧ro̧nä̧ jȩpö̧rö̧ mucha juo'örö, ja̧u̧ u̧cuä̧ba̧cuä̧ kö̧mä̧ si'epö icuähuätä a̧mö̧cuädö, uhuäbecuäcumä yapare jȩpö̧ surojuoepa pä'ötä hua̧. ¹⁵ Ja̧u̧mä̧ reju sa'ö ja̧'hua̧nö̧ sa'u ku̧nö̧ ja̧'hua̧ta̧nö̧ ja̧u̧ sa'ö u̧ju̧nä̧junä̧tä̧ ma̧'ä̧chö̧ ¹⁶ Ja̧u̧ si'epö icua pä'ö a̧mö̧cuädäjimä̧ churutätä ppa̧huä̧chi̧'ä̧cua̧, ja̧'hua̧ta̧nö̧ ö̧'ä̧i̧nä̧ suronä jȩö̧mä̧ churutätä ppa̧huä̧chi̧'ä̧cua̧. ¹⁷ Ttömä̧ adihua'a pä̧dä̧cua̧sä̧ adihuomenä jȩa̧'a̧ttö̧ TÖ̧Ä̧NÄ̧HUA̧RÖ̧MÄ̧; Ttömä̧ TÖ̧Ä̧NÄ̧HUA̧ mo̧ro̧jä̧nä̧ kö̧rö̧ ra̧dä̧cua̧sä̧.