¹ Ujutumä ä̧ju̧cuä̧tö̧jä̧ ujututä tä̧ja̧nä̧, Dios; ttä̧o̧tö̧mä̧ ji̧ä̧hui̧nä̧tö̧ UCU cuaditähuä jȩ'cui̧nö̧ ja̧u̧nö̧ mo̧ro̧, ja̧u̧nö̧ mo̧ro̧ pä̧nä̧. ² Ucutäjä räopinömä pi̧jä̧ cu̧mu̧nä̧tä̧, ja̧'hua̧nö̧ ja̧'a̧ cu̧ni̧nö̧jä̧ u̧ju̧tu̧ ti̧dȩpi̧yö̧; ucumä tidepiyö ttöja 'ta'cua 'tattȩcu̧nä̧ jȩpi̧nö̧jä̧, ja̧'hua̧nö̧ ja̧'a̧ tȩä̧di̧nö̧jä̧ ti̧ä̧rȩ ö̧tahuiyä yabocutä pi̧jä̧tö̧mä̧. ³ Ja̧'hua̧nö̧ ja̧'a̧ juätömä̧ pi̧jä̧mä̧ i̧yä̧hui̧'o̧co̧'u̧ pi̧nä̧tö̧ ttö̧ja̧ pä̧'ö̧mä̧ 'ta̧mo̧nä̧ ttu̧ju̧ru̧nä̧ ttu̧ro̧huä̧huo̧mȩnä̧, ja̧'hua̧ta̧'a̧nö̧ 'ta̧mo̧nä̧ ttu̧ju̧ru̧mä̧ ppä̧do̧co̧'u̧ pi̧nä̧tö̧; ja̧'hua̧nö̧ ja̧'a̧ttö̧ UCU cu̧mu̧ cu̧huo̧jua̧'a̧na̧mä̧, UCU cu̧jo̧ ja̧'hua̧ta̧'a̧nö̧ cu̧jo̧mȩ tȩa̧mä̧, ju̧hua̧'a̧mä̧ ppä̧'ä̧du̧jä̧ ju̧huä̧tö̧rö̧ ⁴ Dios, ucutäjä ttö chu̧ru̧hua̧mä̧; huȩi̧ Ja̧co̧b u̧ju̧ru̧nä̧tä̧. ⁵ Ujutumä̧ ucunä̧tä̧ ttaboiyotöttömä̧ 'cuäto'äcuotöjä; ucu cui̧mi̧nä̧tä̧ kȩdö̧ ticuäcuotö, ujutucu tturohuähua pä'ätörömä̧. ⁶ Ja̧'hua̧nö̧ ja̧'a̧ ttömä chu'popobumä̧ cha̧'cua̧ huȩnä̧ro̧cö̧ chä̧cua̧sä̧, ja̧'hua̧ta̧nö̧ chucurä'chu'i̧nä̧ chu̧ji̧pö̧nä̧mä̧ ppädoca'a jä̧cua̧'a̧. ⁷ Ja̧'hua̧nö̧ Ucutä ja̧'a̧ ttaboiyötöttö tö̧ji̧pö̧nä̧ ppä'ädinömä ja̧'hua̧ta̧nö̧ jitö ujuturu kö'cocotörömä̧ dä'ä ttu'epä'ijöjä. ⁸ Mo̧ro̧ji̧nö̧'a̧cuä̧ Diosnä̧tä̧ ucuo te'ähuä'ijätöjä ja̧'hua̧ta̧nö̧ 'cuäopönä̧tä̧ cui̧mi̧nä̧mä̧ adihua'a jö̧nä̧tä̧ pätäcua̧jä̧. ⁹ Ja̧'hua̧nö̧ ja̧'a̧nä̧ Ucumä ujuturu ya'ocuinö̧jä̧ ja̧'hua̧ta̧nö̧ dä'ä ttuhuähuätä i'cächinö̧jö̧, juhua'atäcu Ucumä tumähuäyotö su̧ru̧da̧u̧cu̧mä̧ 'cho̧cö̧ cuä̧cua̧jä̧. ¹⁰ Ucumä taboiyotöttö ppa̧tä̧chä̧chö̧nä̧ jȩpi̧nä̧jä̧; ja̧'hua̧ta̧nö̧ jitö ujuturu ku'cocotömä tta̧mö̧nä̧ pa̧ja̧tö̧tä̧ 'chotticuäcuotö. ¹¹ Ucumä̧ ujuturu ovejastö̧ cuäcuähuotö jä̧'i̧nö̧'a̧nö̧ jö̧nä̧ pätetö ku̧ni̧nö̧jä̧ ja̧'hua̧ta̧'a̧nö̧ ujuturumä ttö̧ja̧ ttö̧'cä̧tȩ pperetö icuinö̧jä̧. ¹² Ucumä micuä juiyönä̧tä̧ iyä'chu icujä̧ cumöhuäyotärämä̧; Ucu cuiäre rö̧ä̧nä̧ mi̧cuäumä ja̧'hua̧nö̧ jȩ'cua̧ pä'ötä. ¹³ Ucumä tippeyä kä̧tö̧ ttöjö'cö juiyönä jö̧nä̧tä̧, ya̧ttä̧huȩö̧nätä, tippeyänä kä̧tö̧'i̧nä̧ ya̧ttä̧huȩ'ä̧cuo̧tö̧jä̧. ¹⁴ Ucumä ttö̧ja̧rö̧ ye'epö'chöjä̧, ja̧'hua̧nö̧ jo̧mȩnä̧ ttö̧ja̧mä̧ ttö poporiri jepätö. ¹⁵ 'Cuä'opönä mo̧ro̧ jö̧ta̧'a̧nö̧ micuähuocöjä pättäcusä, ja̧'hua̧nö̧ pättomenä dä'ättu'usä ¹⁶ ttörö ichö pä̧'i̧cu̧nä̧ cha̧bo̧'i̧ya̧ 'chodipäcujä pä'ö huoa'attö. ¹⁷ Ja̧'hua̧nö̧ huoömä ttöro suronä jä̧cu̧sä̧; Ja̧'hua̧nö̧ ja̧'a̧nä̧'i̧nä̧, ujutu ucurumä unichi'ocotöjä, yapare'inä jȩpo̧co̧tö̧jä̧ ucu esecu huecuinömä. ¹⁸ Ujutumä ucurumä jaropiocotöjä; ucutu'inä ti̧'cho̧mȩmä̧ 'cä̧i̧pä̧cho̧co̧tö̧jä̧. ¹⁹ Ja̧'hua̧nö̧ ja̧'a̧nä̧ UCUMÄ pä̧i̧cu̧nä̧ ro̧cuȩpi̧nä̧u̧jä̧ dea ä̧hui̧ri̧tö̧ ttö̧jo̧cuo̧mȩttö̧mä̧ ja̧'hua̧ta̧nö̧ cua'are tä̧tȩcuä̧ ko̧mȩttö̧ ppäcuädinäu̧jä̧. ²⁰ TU̧RU̧HUA̧ DIORÖ ucuo tetähuoca'a jarotiäittömä ko̧ro̧nö̧mä̧ yapare ttö̧ä̧nä̧hua̧rö̧ ucuo teäu tu̧mu̧ cätepäijöttömä, ²¹ ¿TÖ̧Ä̧NÄ̧HUA̧MÄ̧ DIOMÄ ieruhua'anö ja̧'a̧ tä̧jí̧? JA̧U̧MÄ̧ huo̧jua̧ yȩhuä̧'i̧nä̧ cuamiso'quinä cuamuhuädö'inä. ²² Iso päiönä̧tä̧, UCU cuihueyenä mo̧ro̧ jö̧ta̧'a̧nö̧ usurä ȩmä̧huä̧tö̧jö̧; ohuejarö 'cuä'ö tticua pä'ö jä̧i̧nö̧'anötä̧ to̧ttä̧u̧jä̧. ²³ Porächi'i, ¿Dä̧bö̧ recuo cuä'ä, CHU̧RU̧HUA̧? Ä̧rä̧mi̧'i̧, 'cuäopönämä jarocu'ätö. ²⁴ ¿Dä̧bö̧ 'cua̧'cua̧juä̧ dajömä cuicuä ja̧'hua̧nö̧ dajömä cunichi'ä ujutu tusuräumä ja̧'hua̧ta̧'a̧nö̧ ujuturu tusuräunä u̧ni̧chi'äjijä tä̧ji̧? ²⁵ Dä̧bö̧ teripächa'a jättö i̧sa̧ppȩnä̧tä̧mä̧; ujutu tidepämä rȩjȩtä̧ pȩjä̧u̧jä̧. ²⁶ Ä̧rä̧mi̧'i̧ ppäcuädatö ja̧'hua̧nö̧ suronä huȩttä̧ra̧'a̧nä̧ ttö̧jo̧mȩttö̧ ucu esecu ppä̧dä̧dä̧cua̧sä̧ päcuina'a̧ttö̧.