¹ Pi̧yȩ ji̧na̧'a̧ TÖ̧Ä̧NÄ̧HUA̧ i̧huȩnȩ rä̧bȩhui̧nö̧mä̧ Miqueas Moresét ttö̧ja̧sa̧rö̧, Jotám ö̧ji̧nö̧ mo̧ro̧, Acaz'inä ja̧'hua̧ta̧'a̧nö̧ Esequias'inä, Judáttö ruhuotö'inä, 'cuäopa'a topö pä'inö Samariattö ja̧'hua̧ta̧'a̧nö̧ Jerusalénttö'inä. ² O'catoi'önä ötahuiyä ttö̧ja̧mä̧ ä̧ju̧cuä̧tu̧cui̧. Jä̧ju̧cui̧, o'catoi'önä pi̧jä̧ rȩjȩnä̧ ko̧cuä̧tö̧mä̧. Ucuturu jä̧cuä̧mä̧ TÖ̧Ä̧NÄ̧HUA̧TÄ̧ pä'anä ja̧'a̧tä̧ topötucui, TÖ̧Ä̧NÄ̧HUA̧TÄ̧ pä̧cua̧ adihuänä ö̧jo̧mȩttö̧. ³ Topätucui, TÖ̧Ä̧NÄ̧HUA̧ ö̧jo̧mȩttö̧ rä'opö; Ja̧u̧ i̧mȩyȩhuä̧cua̧ pi̧jä̧ttö̧ ju'toju jo̧mȩ ö̧jä̧da̧ pä'ö. Muä'quiyu'inä eripächäcua'a ja̧u̧ ö̧jä̧pö̧ dȩa̧'a̧ttö̧; ⁴ De'a pämärome'inä dirächipäcua'a i̧sä̧ju̧ ocurättö diähua'a jä̧'i̧nö̧'a̧nö̧, ajiyä pä̧i̧cu̧nä̧ dö'ö icua'a jä̧'i̧nö̧'a̧nö̧. ⁵ Ja̧'hua̧nö̧ 'cuäopömä Jacob ahuaruhuä o'cottö ttöaroda'attö, ja̧'hua̧ta̧'a̧nö̧ Israél ttö̧ja̧ jarodö ttidepä hue'ötä jȩpö̧ ttö̧ja̧'a̧ttö̧. ¿Tta̧'a̧nö̧ pä'ö ji̧nä̧ttö̧ Jacob jarodö surönä jȩi̧na̧'a̧mä̧? ¿Samaria ötahuiyättö mä̧cö̧ ji̧na̧'a̧? ¿Torö ji̧nä̧ttö̧ yapareb ttö̧ä̧nä̧hua̧rä̧ ttesetina̧'a̧mö̧ Judá ahuaruhuä o'cotö? ¿Jerusalénttö mö̧cö̧ ji̧na̧'a̧? ⁶ "Ja̧'hua̧nö̧ ja̧'a̧'ttö̧ TTÖTÄ si'epö'icu isarätä chöti'äcuome Samaria ötahuiyämä, uvas ttu̧ju̧na pä'ö ttaditarä jä̧'i̧nö̧'a̧nö̧tä̧. De'a pämäromemä inähuiyättötä rȩä̧dö̧ chicuäcuome; Ja̧u̧nu̧tä̧ chu̧juo̧juä̧cua̧sä̧ däjettö todehua pä'ö. ⁷ Ö'cajuiyönä 'co̧'ö̧ adicuämä dirö icuähuäcua'a i̧sa̧ppȩ päi'önä̧tä̧; ja̧'hua̧ta̧'a̧nö̧ ttiäre iyähuä jä̧'i̧jö̧'i̧nä̧ ku icuähuäcua'a. Yapare tö̧ä̧nä̧hua̧ o'ca'inä si'epö chi̧cuä̧cua̧sä̧. Jua'amä kidepä u̧mä̧tö̧rö̧ pärätänä iyäu kö̧ca̧ca̧tä̧'i̧jö̧ ja̧'a̧ttö̧, ja̧'hua̧nö̧ kaditä'ijömä jitörötä ppa̧huä̧chä̧cuä̧." ⁸ Ja̧'hua̧nö̧ ji̧yä̧cu̧ cha̧'cua̧ tta̧dȩcuä̧cua̧sä̧ ja̧'hua̧ta̧'a̧nö̧ ajuäu'inä cha̧ja̧huä̧cua̧sä̧; chö̧'ca̧tä̧huä̧ta̧ jui'ö cuȩdä̧chä̧cua̧sä̧; yodo ähuiri ja̧hua̧ta̧'a̧nö̧ juarara juoa'a jä̧'i̧nö̧'a̧nö̧ juo̧chä̧cua̧sä̧. ⁹ Ja'huätörö rä̧bȩu̧mä̧ ya̧tȩ'i̧nä̧ ttoepa pä'ömä juiya'a, Judá ahuaruhuä o'cotörö rä̧bȩhuä̧'a. Chahuaruhua tto̧jo̧mȩ Jerusalennä rä̧bȩhua̧'a̧. ¹⁰ Gat ttö̧ja̧rö̧mä̧ jicuähuätucuä; yaparemä cuajuähuätucuä. Bet Le Afráttömä i̧sa̧ppȩnä̧tä̧ borepö pö̧sä̧. ¹¹ Juȩnȩnä̧ 'cuo'opätucui, Safir ötahuiyä ttö̧ja̧, su̧ro̧do̧u̧mä̧ ttö̧'ca̧tä̧huä̧tta̧ jui'ö 'chä̧no̧ dä'ä ttuttunä jȩpä̧tö̧. Zaanán ötahuiyänä kjo̧cuä̧tö̧mä̧ räcuopätucuä. Bet Eselmö tta̧'cua̧ tta̧'ȩcuä̧tö̧, ja̧huä̧tö̧rö̧ tta̧'a̧rä̧i̧jä̧tö̧rö̧ 'chodipa'attö. ¹² Ja̧'hua̧nö̧ ja̧'a̧ttö̧ Marot ötahuiyä ttö̧ja̧mä̧ tta̧'a̧rä̧tö̧ adihuä huȩnȩ ttä̧ju̧cua̧ pä'ötä, TÖ̧Ä̧NÄ̧HUA̧MÄ̧ surojötä huȩ'ä̧cua̧ Jerusalén apate ä'camä. ¹³ Ti̧'ä̧dä̧tu̧cui̧ ca̧hua̧yu̧tu̧ caruquiyä'inä, Laquis ötahuiyä ttö̧já̧. Ucú, Laquis, ucu ji̧na̧'a̧ ä̧cuo̧mȩnä̧ suronä jȩpi̧nö̧mä̧ Sion ötahuiyä ttö̧ja̧rö̧, jua̧'a̧mä̧ u̧cu̧ jä̧'a̧ jueähuä huȩnȩ jarodö jȩpä̧ji̧mä̧ Israél ttö̧ja̧ jȩtti̧nö̧'a̧nö̧. ¹⁴ Ja̧'hua̧nö̧ ja̧'a̧ttö̧ ucu jä̧cua̧'a̧ röji te'ähui'ö iäre mippoönä cui̧yä̧cua̧mä̧ Moréset Gat'rö; Aczib ötahuiyä ttö̧ja̧mä̧ yaparetä jittähuäcuotö Israelttö ruhuop hue'ätörömä. ¹⁵ TTÖ pä'äjita'anö huȩdä̧cua̧sä̧ ya̧tȩ ö̧ro̧huä̧huä̧cua̧rö̧, Meresa ötahuiyänä ko̧cuä̧tö̧; Iraelttö ucuounä kö̧sä̧ pä'ö'inä ppa̧huä̧chä̧cua̧ Adulam ra̧'a̧cu̧tä̧. ¹⁶ Ja̧'hua̧nö̧ ja̧'a̧ttö̧ cuäcä isä'che 'cui'äu icuätucui ja̧'hua̧ta̧'a̧nö̧ cuhuo'chetucu'inä kiräu icuätucui cui̧tti̧mö̧tu̧cu̧ru̧ rȩrö̧jö̧ä̧nä̧ tocu'ätucuttumä. Cuhuo'che kiräu icuätucui pare jä̧'i̧nö̧'a̧nö̧, jua'amä cui̧tti̧mu̧tu̧cu̧mä̧ ucututtu'inä oto tti̧'chä̧cuo̧tö̧.