¹ Topi, ji̧yȩnö̧ mo̧ro̧, ttidepiyöttö rä'epö tti̧cui̧nä̧'ö̧ru̧ Ttö Judara̧'a̧cu̧ ja̧'hua̧ta̧'a̧nö̧ Jerusalén ra̧'a̧cu̧ ppä̧dä̧di̧po̧mȩnä̧mä̧, ² O'catoi'önärö̧ 'chu̧ca̧ca̧ti̧'ä̧cuä̧sa̧, ja̧'hua̧ta̧'a̧nö̧ Josafat pämä̧roppä päi'omecu̧ chi̧mȩyȩdä̧cua̧sä̧. Juhuoromä adihuome chȩchä̧cua̧sä̧ Ttö chumöhuäyotö jähuänä ja̧'hua̧ta̧'a̧nö̧ ttö chumöhuäyotörö Ttörö iya̧hui̧nä̧u̧ Israel ttö̧ja̧rö̧mä, korotöttö ttu̧'cä̧tȩ juo'ächinä̧tö̧rö̧, ja̧'hua̧nö̧ Ttö chi̧rȩjä̧ttö̧ 'ca̧'ȩcuä̧chi̧nä̧tö̧rö̧. ³ jahuätömä icu topinätö̧ chumöcuäyotö tti̧minä, ji̧'qui̧hua̧ä̧rö̧mä̧ mänä ruhuäjutä päröhuo icui'enätö̧, Ja̧'hua̧ta̧'a̧nö̧ ji̧'qui̧chahuajurumä̧ vino isoyacutä ttahua pä'ö pä'ötä iyi'enätö̧. ⁴ Jitämä, ¿Tta̧'a̧nö pä'ö cuämisurätucua'aja̧ttö̧ Ttörömä, Tiro ttö̧ja̧mä Sidón ttö̧ja̧mä̧ ja̧'hua̧ta̧'a̧nö̧ Filistea ttö̧ja̧ o'catoi'önämä? ¿Ttörö micuä jö̧nä̧ jȩ'cuä̧tu̧cuä̧cua̧'a̧? Ttörö micuä jȩ'cuä̧tu̧cu̧ttö̧'i̧nä̧, yotäcu Ttörö jȩ'cuä̧tu̧cu̧mä̧ ucuturutä ppa̧dä̧di̧pä̧cua̧sä̧. ⁵ Juhua'amä chiäre plata'inä, chiäre oro'inä ȩmi̧pä̧jä̧'cotö, Ttörö chiäre rö̧ä̧nä̧ micuäumä cu̧ä̧nä̧hua̧tu̧cu̧ ö̧jo̧de jacuä i'cächu ku̧nä̧jä̧tö̧jä̧. ⁶ Ucutumä̧ Judá ttö̧ja̧rö̧'i̧nä̧, Jerusalén ttö̧ja̧rö̧'i̧nä̧ Grecia ttö̧ja̧rö̧ iyö icuinä̧tö̧jä̧ tti̧rȩjä̧ttö̧ oto rä'epö icumä. ⁷ Topätucui, ucutu iyö cuicuinätucuo̧mȩttö̧mä̧ rä'epö chicuometä̧ päia'a ja̧'hua̧nö̧ jȩpö̧ jȩ'cui̧nä̧tu̧cu̧ micuämä chimitäcuä̧u̧jä̧. ⁸ Cui̧tti̧mö̧tu̧cu̧ u̧mä̧tö̧rö̧'i̧nä̧, nä̧tö̧rö̧'i̧nä̧ iyö chicuiyäcuotöjä̧, Judá ttö̧ja̧ ttujurunä. Jahuätömä sabeas ttö̧ja̧ otoka̧cuä̧tö̧rö̧ iyö tticuiyä̧cuä̧u̧jä̧. TÖ̧Ä̧NÄ̧HUA̧MÄ̧ ja̧'hua̧nö̧tä̧ ucuocua'attö̧. ⁹ Ttö̧ja̧rö̧ pi̧yȩ ji'ähui: Curä curohuähuätucua jo̧mȩnö̧ ka̧cuä̧tu̧cui̧, u̧mä̧tö̧ juruhuätörö jo̧mȩnö̧ ttö̧ja̧cua̧ ji'ähui, ttötö'cöhuächi'a pä'itö, o'catoi'önä curä rohuähuäcuähuä ttö̧ja̧mä̧ yabocutä tti̧'cha̧ pä'itö. ¹⁰ Cuähuä ttu̧ju̧na̧ pä'ö sahuähuä'chumä curä'chu jö̧nä̧tä̧ pärotö icui, adiyä 'cuiähuodämä dacuodä jö̧nä̧tä̧ pärotö icui. Juiyupätö: "Ttömä ju̧ru̧hua̧sä̧" pätta hue'itö. ¹¹ Yabocutä 'chä̧nö̧ ichätucui, ucutu ttö̧ja̧ tö'cönä̧nö̧ ka̧cuä̧tö̧mä̧, ju̧huȩnȩtä̧ ca̧ca̧cui̧pä̧tu̧cui̧. TÖ̧Ä̧NÄ̧HUA̧ cumöhuäyotö juruhuätörö i'cächi. ¹² Ttö̧ja̧mä̧ jitätä ttö'orähuia'anä̧ ja̧'a̧tä̧ topitö ja̧'hua̧ta̧'a̧nö̧ pamäroppä päi'ome Josafatra̧'a̧cu̧ 'chattächa'anä. Isopäi'önä ju̧huȩtä̧ chö̧'ä̧mä̧dä̧cua̧sä̧ ttö̧ja̧ jäyänä kä̧tö̧ o'catoi'önä̧rö̧ adihuomenä ro̧dȩpä̧cua̧sä̧. ¹³ Nahuodä äcuäcä jodänä 'cui'ätucui, Ichätucui uva cui̧'cuä̧tu̧cua̧, täcö 'cuȩ'cuä̧huo̧mȩmä̧ su̧'pȩ ja̧'a̧. 'Cä̧nä̧ri̧yu̧nä̧ huerächö icua'a, isopäi'önä suronä jȩttö̧mä̧ rö̧ä̧u̧ jähuä ja̧'a̧ttö̧." ¹⁴ Ttö̧ja̧ recuätö ka̧cuä̧tö̧, pä̧mä̧roppä päi'omettö̧ ro̧ȩpä̧cuo̧mȩ. Juhua'amä TÖ̧Ä̧NÄ̧HUA̧ u̧mo̧ro̧ pä̧mä̧roppä päi'omettöro̧ȩpä̧cuȩ tö'cöhuächa'attö̧. ¹⁵ Mo̧ro̧ kä̧hua̧'i̧nä̧, yodo kä̧hua̧'i̧nä̧ na̧tti̧'ä̧cuo̧tö̧ ja̧'hua̧ta̧'a̧nö̧ si̧ri̧'cö̧'i̧nä̧ tejädönä ttö̧rȩjä̧'i̧ja̧'a̧mä̧ tejädocotö ttäcuotö. ¹⁶ TÖ̧Ä̧NÄ̧HUA̧MÄ̧ Siónttö döröä̧cua̧ ja̧'hua̧ta̧'a̧nö̧ Jerusalénttö pä̧i̧cu̧nä̧ huo̧ä̧cua̧. Mo̧ro̧jä̧'i̧nä̧, pi̧jä̧'i̧nä̧ ttö̧ä̧huä̧cua̧'a̧ ja̧'hua̧nö̧ ja̧'a̧nä̧ ttö̧ja̧ umöhuäyotömä TÖ̧Ä̧NÄ̧HUA̧TÄ̧ dajahuächö ttö̧ji̧pa̧ pä'ötä jä̧cua̧'a̧ ja̧'hua̧ta̧'a̧nö̧ ja̧u̧tä̧ jä̧cua̧'a̧ Israel ttö̧ja̧ ttujuru jö̧nä̧ jä̧cua̧mä̧. ¹⁷ Ja̧'hua̧nö̧ jo̧mȩnä̧tä̧ ttu̧huo̧juä̧cuo̧tö̧ TÖ̧Ä̧NÄ̧HUA̧ Dios Siónnä kö̧ pä'ömä, Ttötä chö̧jä̧'ca möä'canä. Ja̧'hua̧nö̧ jo̧mȩnä̧ Jerusalénmä 'cä̧'ȩpö̧ ku̧nä̧huo̧mȩ jö̧nä̧ jä̧cuo̧mȩ juhua'atäcu juȩnȩ kä'conämä yoriso ya̧tȩ'i̧nä̧ su̧ro̧da̧u̧ i̧sa̧mä̧ 'chä̧nö̧mä̧ 'cuä'opocö jä̧cua̧ pä'äjita'anö̧mä̧. ¹⁸ Ja̧u̧nu̧ mo̧ro̧mä̧ möä'canättömä vino sa̧dö̧ rö̧ä̧nä̧ huȩjä̧cua̧'a̧, isotö ttatate isoyamä rö̧ä̧nä̧ 'carachächa'a, Judáttö o'cajuiyönä aje o̧rä̧mä̧ ajiyatä räopäcua'a ja̧'hua̧ta̧'a̧nö̧ TÖ̧Ä̧NÄ̧HUA̧ ojusodettö ajiya rȩjȩttö̧ rä'opö Sitimttö pämäroppä päi'ome iyepäcua'a. ¹⁹ Egiptomä si'epö tticuomenä ttö̧ja̧mä̧ to̧ä̧jä̧tä̧ pärohuächäcua'a, ja̧'hua̧ta̧'a̧nö̧ Edom rȩjȩmä̧ de'amä jui̧yä̧jä̧tä̧ päi'önä ttö̧ja̧mä̧ tti̧cui̧pä̧cuä̧jä̧ Judá ttö̧ja̧rö̧ tta̧'cua̧ tta̧ttȩcu̧nä̧ jȩtti̧nö̧ta'anö, juhua'atäcu tti̧rȩjä̧ttö̧ surojö jȩpo̧co̧tö̧rö̧ cuä'äu tticuinö̧ta̧'a̧nö̧. ²⁰ Ja̧'hua̧nö̧ ja̧'a̧nä̧ Judá rȩjȩnä̧ ka̧cuä̧tö̧ ttö̧ja̧mä̧ 'cuäopönä̧tä̧ ttö̧jä̧cuo̧tö̧, ja̧'hua̧ta̧'a̧nö̧ tti̧tti̧mö̧ juhua'a yabo tti̧tti̧mö̧'i̧nä̧. ²¹ Ttömä micuä jȩchä̧cua̧sä̧ suronä jȩpo̧co̧tö̧rö̧ cuä'äu icuinä̧tö̧rö̧ ji̧nä̧ ro̧ttȩpo̧co̧u̧ pä'ijätörö." Ja̧u̧mä̧ TÖ̧Ä̧NÄ̧HUA̧MÄ̧ Sionnämä̧ 'cuäopönätä̧ kö̧.