¹ TÖ̧Ä̧NÄ̧HUA̧ i̧huȩnȩmä̧ o̧i̧yȩ ja̧'a̧ Joelrö ichinämä̧, Petuel i̧tti̧rö̧. ² Pi̧yȩ ä̧ju̧cuä̧tu̧cui̧, ucutu tämö, ja̧'hua̧ta̧'a̧nö̧ ä̧ju̧cuä̧tu̧cui̧, ucutu o'catoi'önä pi̧jä̧nä̧ ka̧cuä̧tö̧mä̧. ¿Ya'utenä 'cuäopä'ijä tä̧ji̧ ji̧yȩnö̧ cu̧ji̧nö̧ mo̧ro̧mä̧ ja̧'hua̧ta̧nö̧ cuä̧do̧tö̧mi̧nä̧ ttö̧ji̧nö̧'i̧nä̧? ³ Cui̧tti̧mö̧rö̧ ucuocuätucui pi̧yȩmä̧ ja̧'hua̧ta̧'a̧nö̧ juätömä tti̧tti̧mö̧rö̧ jittähuäcua'anö tti̧tti̧mö̧'i̧nä̧ ttahuaruhuä yo̧ttä̧huä̧cuotörö. ⁴ Mä̧rä̧cä̧yu̧ tttä̧yu̧nä̧ kä̧tö̧ tticuipeji'inä, buo märäcäyuhuä ucui'inä, buo märäcäyuhuä icuipeji'inä, märäcäyuhuätä ya̧tȩtä̧ ucuinö, märäcäyuhuä icuipäji'inä, äcahuä ucu'inä. ⁵ ¡Porächätucui, tä̧'ä̧mä̧tö̧ ja̧'hua̧ta̧'a̧nö̧ ajahuätucui! a̧'u̧ru̧ju̧nä̧ ajähuätucui, o'catoi'önä vino isoya ahuahuä ttöjamä, täcu vino isoyamä cho'icuotö pä'i'ätöjä. ⁶ Ja̧'hua̧ta̧'a̧nö̧ jitötä ötahuiyä ttö̧ja̧ chi̧rȩjä̧nä̧ ä̧rä̧mä̧tö̧, juruhuätö ja̧'hua̧ta̧'a̧nö̧ pa̧ja̧cuä̧ jui'ätö. Ttacumä mö̧yähui acutä huotö ja̧'a̧, ja̧'hua̧ta̧'a̧nö̧ mö yähui isaju kacu'inä kö̧nä̧rö̧. ⁷ Uva pättamä juo'epäji ji̧yȩtȩ surojome jö̧nä̧tä̧ ja̧'hua̧ta̧'a̧nö̧ chöäre higueramä 'cui'opö icuinö, ijȩya̧'i̧nä̧ 'cui'opö icuäjijä ja̧'hua̧ta̧'a̧nö̧ do'opu icuejijä; dau o̧cha̧mä̧ te'ächa ju̧tä̧ ka̧'a̧. ⁸ Cua̧'cua̧ tta̧'ȩcuä̧tu̧cui̧ möäyaju 'cö̧a̧ju̧ dotäyuttö 'ca̧tä̧huä̧jö̧ jä̧'i̧nö̧'a̧nö̧ kirecuo mö̧ä̧ya̧ hua'ö icuäjiyäcua. ⁹ Cuäcuähuä o̧tȩ ttiyö'inä ja̧'hua̧ta̧'a̧nö̧ ahuähuä ttiyö'inä TÖ̧Ä̧NÄ̧HUA̧ ojusodettö'inä 'to'opö icuähuä päia'aja sacerdote huotö'inä, TÖ̧Ä̧NÄ̧HUA̧ ömöhuäyotö'inä, cua̧'cua̧ tta̧'ȩcuä̧tu̧cui̧. ¹⁰ Pättiyö orämä pparö juo'ächa'a, ja̧hua̧ta̧'a̧nö̧ rȩjȩ'i̧nä̧ ji̧yuhuächa ja̧'a̧. Ku̧nä̧huä̧ o̧tȩmä̧ pparu icuähuä päi'aja'a̧ttö, jareö vino isoya'inä joicha ja̧'a̧, a̧dȩ'i̧nä̧ surojuoächäja'a. ¹¹ Dä'ättö'ätucui, ppättiyu adicuä ttö̧ja̧, ja̧'hua̧ta̧'a̧nö̧ ajahuätucui, cuähuä ku̧nä̧huä̧ ttö̧ja̧, trigonä'inä cebadanä'inä. Täcu ppätiyunä ku̧nä̧huä̧mä̧ toe'ächajattö. ¹² Cuähuä'inä hua̧'i̧yö̧ juoächa'a ja̧'hua̧ta̧'a̧nö̧ higuera'inä jo'icua'a, cuähuä granadas dau'inä ja̧'hua̧ta̧'a̧nö̧ ojiya'inä, ja̧'hua̧ta̧'a̧nö̧ Manzana jähuä'inä o'cajuiyönä dauhuiyä pättiyu jahuämä jo'icua ja̧'a̧. Ja̧'hua̧nö̧tä̧ ttö̧ja̧ ttahuäröhuä 'cotö tteseu'inä jo'icuina̧'a̧. ¹³ Dö̧tä̧yu̧ttu̧ 'ca̧tä̧huä̧tu̧cui̧ ja̧'hua̧ta̧'a̧nö̧ cua̧'cua̧tta'ȩcu̧ kä̧tu̧cui̧, sacerdotes huotö! ajahuätucui, ku icu iyähuome adicuä otu. I'chätucui, o'cajuiyönä yodomä cuä'opätucui cua̧'cua̧ tta̧'ȩcu̧tä̧, ucutä chu̧ru̧hua̧ Dios ömöhuäyotö. Cuäcuähuä o̧tȩ iyähuänä'inä ahuahuä iyähuä'inä täcu Dios ojusodettömä jȩpö̧ icuähuä päi'aja'a. ¹⁴ Cu̧cuä̧ o̧do̧chö̧ adihuä juei jȩä̧cuä̧huä̧ ji'ähuätucui, ja̧'hua̧ta̧'a̧nö̧ adihuäjue ttö̧ca̧ca̧cua̧ ji'ähuätucui. Ca̧ca̧tä̧tu̧cui̧ buosoturu'inä ja̧'hua̧ta̧'a̧nö̧ pi̧jä̧ ttö̧ja̧ o'catoinärö̧ TÖ̧Ä̧NÄ̧HUA̧ Dios ojusodera, ja̧'hua̧ta̧'a̧nö̧ TÖ̧Ä̧NÄ̧HUA̧ jä'epätucui ajaunu. ¹⁵ ¡Jati ja̧u̧nu̧ mo̧ro̧hue! täcö TÖ̧Ä̧NÄ̧HUA̧ ö̧mo̧ro̧ pȩnȩtä̧ tö'cö päia'a, ja̧u̧cu̧mä̧ surojuächö ichäcua'a o'ca juiyönä ju̧ru̧hua̧ jähuä. ¹⁶ ¿Cuäcuähuämä chottipoco'ö pä'ijö ö̧ja̧ tä̧ji̧ tiäre ä'ca jo̧mȩttö̧ ja̧'hua̧ta̧'a̧nö̧ eseäcuähuä'inä tta̧'cua̧ adiu'inä Tu̧ru̧hua̧ Dios ojusodettömä? ¹⁷ Ö̧huä̧jö̧ o̧tȩmä̧ 'cuä'ö icua'a redä'ca jome ttö̧jö̧no̧mȩ dȩa̧'a̧ttö̧tä̧, ttu̧cuȩ o̧tȩ hua'adö ttutome'inä surohuächina̧'a̧, ja̧'hua̧ta̧'a̧nö̧ isotö ttö̧ja̧cu̧ o̧ca̧'inä mo̧ä̧cha̧'a̧tä̧ ja̧'a̧, täcö cuäcuähuä o̧tȩ joicha ja'a ja̧'a̧ttö̧. ¹⁸ ¡Tocu a̧'u̧ ttu'ätöttö isotumä! pä̧cä̧yu̧ pä̧yö̧ ttö̧jȩi̧ yo̧mȩttö̧ usurä ȩmä̧u̧ kä̧tö̧ ttucuä'cua juitta ja̧'a̧. Ja̧'hua̧ta̧'a̧nö̧ ohueja̧tö̧ pä̧yö̧ kä̧tö̧'i̧nä̧ usurä ȩmä̧huä̧tö̧. ¹⁹ CHÖ̧Ä̧NÄ̧HUA̧ ttö ucuru ajaunu jä'epösä. Ocurämä meje'ca mȩji̧yä̧ isä'cua'inä cuo'ö icunä jȩa̧'a̧, ja̧'hua̧ta̧'a̧nö̧ o̧cu̧rä̧ma̧mä̧ o'cajuiyönä pättiyu dau ku icua ja̧'a̧. ²⁰ De'a isotubutä kä'ädö ucuru tti̧huȩnȩnä̧ huopätö, ja̧'hua̧ta̧'a̧nö̧ ajiya ppuepö'inä joicha'a, ja̧'hua̧ta̧'a̧nö̧ ocurä'inä meje'ca mȩji̧yä̧ ku icua'a.